Yobu
39 “Unasi esyombene sy’omo bitwa nga sikabuta mughulu wahi?
Wanabirilangira engabi ikabuta ekyana kyayo?
2 Ukanaghanza emisi eyo sikabugha isinahakire?
Unasi nga sikabuta mughulu wahi?
3 Sikasunama omughulu sikabuta ebyana byasyo,
N’obulumi bwasyo bw’eributa ibwahwa.
4 Ebyana byasyo bikayira amaka ibyakulira omoli;
Bikayighendera ibitasyasubula.
5 Nindi yo waha epunda y’omoli y’obwiranda bwayo,
N’oyo wakundula ekikoba ky’epunda y’omoli nindi?
6 Nabirihayo embwarara eribya nyumba yayo
N’ekitaka ky’omunyu eribya bwikalo bwayo.
7 Ikaseka olukanda lw’omuyi;
Siyiryowa olukanda lw’oyukaghendaya esyonyama.
8 Ikatimba-timba omo hitwa ikasonda-sonda olulisiryo,
Ikasonda-sonda ekiti kibisi.
9 Enume y’ende y’omoli* yanganaligha erikukolera?
Yanganaghotsera omo kibungo* kyaghu?
10 Wanganaboha enume y’ende y’omoli omo lukoba uti ikutwire amahya,
Kutse yanganakukwama enyuma eriyalima* omusya?
11 Wanganayiketera amaka wayo manene
N’erilekayo ikukolere omubiiri waghu owakalire?
12 Wanganalindirira uti ikendisyakukulukirya ebyo ulyeraya,*
Kandi yanganakuleterabyo omo kihumbiro kyaghu?
13 Ebipupa by’embuni* bikapiperera n’obutseme,
Nikwa ebipupa byayo n’ebyeya byayo byanganahika oko by’ekirobi?
14 Kusangwa ikasigha amayaya wayo oko kitaka,
N’erihuhyagho omo lututu.
15 Ikibirirawa ngoko ekisando kyanganatulangagho
Kutse ngoko enyama y’omoli yanganalyatiragho.
16 Ikakolera abana bayo omo bukatsu, nga sibana bayo;
Siyirisagha ngoko omubiiri wayo anganakwira busa.
17 Kusangwa oMungu mwimayo* amenge
Kandi mwataghabirayo oko bwenge.
18 Aliwe omughulu ikahangana n’eripika-pika ebipupa byayo,
Ikaseka esabayiri n’oyukaghenda kuyo.
19 N’iwe ukaha esabayiri y’akaghala kayo?
Ukanambalayayo ebyeya byayo by’oko ngoto ebikabugha-bughaya?
20 Wanganaleka iyatwa ekika ng’engyike kwehi?
Erihuruta lyayo rinene rikubahaya kutsibu.
21 Ikahala-hala ekitaka omo musya n’eritsemera akaghala kayo kanene;
Ikaya eyiri amalwa* iyinemutibita.
22 Ikaseka obuba kandi siyirisagha kindu.
Siyiribinduka busana n’omuyali.
23 Olubo lukabughiraya kuyo k’olukanda,
Eritumo n’akatumo kake bikakangabasanaya.
24 Ikalola embere* iyinemusuka-sukana busana n’erikangamuka,
Omulenge w’erihembe syangaleka ikimana.
25 Omughulu erihembe rikabuhawa ikabugha yiti, ‘Eheee!’
Ikowa obumba bw’amalwa iyine hali
Neryo iyowa omulenge w’abakasondola amalwa n’omulenge w’amalwa.
26 Obwenge bwaghu bo bukaleka akasara ikaghuluka kwehi,
N’erisanza ebipupa byako erilolera oko luhande lw’eyikwa?
27 Kutse erisamba likaghulukira endata omw’ihamula lyaghu kwehi
N’erihimba oluto lwalyo endata kutsibu,
28 Iryaghotsera oko lukuka,
N’eriikala oko bihalange by’olukuka* ahakalire erihika?
29 Irine eyo rikasondaya akalyo;
Ameso walyo akalangira hali kutsibu.
30 Ehyana* hyalyo hikanyonya omusasi;
N’ahosi-hosi ahali ekinda, likabyaho.”