Yobu
40 Yehova mwasyasubirya Yobu ati:
2 “Oyukasonda-sonda amakosa
Anganakuba obuhaka n’Omutoki w’Ebyosi?
Oyo wanzire erihabula oMungu asubiraye.”
3 Yobu mwasubirya Yehova ati:
4 “Lebaya! Ingye sinitolere.
Nangakusubirya nitiki?
Namahira ebyala byaghe oko buno bwaghe.
5 Mungabugha kaghuma, aliwe sinendisyasubirya;
Kabiri, aliwe sinenditasyabugha.”
6 Neryo Yehova mwasubirya Yobu erilua omo kihunga kinene ati:
7 “Ngakusaba, wimane ng’omulume;
Ngendikubulya amabulyo, neryo naghu ukendimbwira.
8 Wanganatika-tikira* eritswera ryaghe eritunganene?
Wangananihirako olubanza neryo iwasingana?
9 Unawite okuboko kw’amaka ng’ok’oMungu w’ekwenene,
Kutse omulenge waghu anganalusya omulumo ng’owiwe?
10 Uyipambe omo lukengerwa n’omo bukulu;
Wambale erisikya n’erikangabasania.
11 Ubohole obuhitane bwaghu bunene;
Usamalire obuli mundu oyukayihaghata, neryo umukimaye.
12 Usamalire obuli mundu oyukayihaghata, neryo umukehaye,
N’erilyatangira ababi aho bimene.
13 Ubise abosi omo lututu;
Uboherebo* ahabisamire,
14 Neryo aho, nibya naghe ingendiligha* embere syaghu
Ngoko okuboko kwaghu kw’amali kwanganakulamya.
15 Lebaya, e Behemoti* y’eno hano,
Eyo nahangyika ngoko nakuhangyika.
Ikalya ebiti ng’enume y’ende.
16 Ulebaye amaka awali omo mbindi yayo
N’akaghala akali omo misisa y’enda yayo!
17 Ikakala-kalaya omukira wayo ng’omuerezi;
Emiki y’ebihinga byayo iluka-lukene.
18 Amakuha wayo ali ng’emiseke y’ekwivre;*
Amaghulu wayo ali ng’emighamba y’ekyuma.
19 Ye y’erimbere* omo mibiiri y’oMungu;
Oyo wahangyikayo musa yo wangahika aho yiri n’omuyali wiwe.
20 Kusangwa ebitwa bikahayo eky’erirya,
Aho esyonyama syosi sy’omoli sikatsangira.
21 Ikaghotsera ahikwa sy’omuti w’omuyungi-yungi,
Omo kitsutsu ky’olubingu lw’omo kisesa.
22 Emiti y’emiyungi-yungi ikaswikayo omo kitsutsu kyayo,
N’emierebi y’omo musya* ikatimba kuyo.
23 Olusi nomo lwangaghunga, siyirihandabuka.
Ikabya iyinasikire, nomo amaghetse we Yorodani angayiswirya oko buno bwayo.
24 Omundu anganahambayo iyinalolire,
Kutse eritobola enindo yayo omo ndoghano?*