Emisyo
20 Edivai ikayira omundu mo kiwere-were, n’obwabu bukaleka omundu iniayiwata kitya-kitya;
Oyukalua omo nzira eyuwene busana n’emyatsi eyo syawite amenge.
2 Obwaka* obuli oko mwami buli ng’eriruruma ry’esimba;*
Omundu oyukamuhitanaya akahira engebe yiwe y’omo bwiko.
3 Omundu oyukaghana erikuba oko buhaka akasikibawa,
Aliwe abakiru bakalw’ibayitoberya omo buhaka.
4 Omughata syalilima omughulu w’embeho nene,
Neryo akendisyasabirirya omughulu w’erighesa, kundi isyawite kindu.*
5 Amalengekania w’omo mutima w’omundu ali ng’amaghetse awalimo mutobero,
Aliwe omundu oyukayiteghereraya akalusaya w’omo.
6 Abandu bangyi bakabugha bati bali n’olwanzo oluteleghula,
Aliwe nindi yo wangasunga omundu mutaleghula?
7 Omundu oyutunganene akakola emyatsi eyiluyirirene.
Abana* biwe abakasa enyuma siwe batsemire!
8 Omughulu omwami akikala oko kitumbi ky’obwami atoke eritswera,
Ameso wiwe akalangira* emyatsi mibi yosi.
9 Nindi yo wangabugha ati: “Nabiryerya omutima waghe;
Nierire, sinirimo rilolo”?
10 Ebilo ebitaleghire ndeke n’ebilengero by’amabehi,*
Yehova aponire ebyosi bibiri ebyo.
11 Nibya n’omwana* akakanganaya omo mikolere yiwe
Emighendere yiwe nga yinerire kandi nga yinalungukere.
12 Okutu okukowa n’eriso erikalangira,
Yehova yo wahangyika ebyosi bibiri ebyo.
13 Isiwanza ehighotseri, kundi ighukendibya mwera.
Ukingule ameso waghu, neryo ighukendibya n’akalyo kanene.
14 Oyukaghula akabugha ati: “Si kiri loko, si kiri loko;”
Neryo iniayighendera n’eriyayihalamba busana n’ekyo alyakola.
15 Hali ehoro, hali n’esyokoraye* sinene,
Aliwe eminywa eyasi emyatsi mingyi ni y’obughuli.
16 Omundu amabiyisinga eriliha edeni y’omundu oyo atasi, iwamwimyako olukimbwa lwiwe,
Amabya inialyakolera atya omukali w’omo kindi kihugho,* iwimya ekindu ekyo alyabikisaya.
17 Omundu akasihirawa omukati ogho alyabana omo bwibi,
Aliwe akabya abiryagho, obuno bwiwe ibusulamo ehibwe hike-hike.
18 Emyatsi ikatokekana* omughulu omundu akasaba erihano,
N’omughulu ukayalwa, ukalagha oko busondoli obuwene.
19 Oyukalegha abandi akaya eyi n’eyi akabisula emyatsi eyitatolere eribisulwa;*
Isiwabya ukasiba n’omundu oyo wanzire eritonga abandi.*
20 Oyukatakira baba wiwe na mama wiwe,
Etala yiwe ikendisyalima omwirimya abitoghonga.
21 Omwandu ogho mundu akabana omo mururu
Syendisyabya muyisa omo biro ebikasa.
22 Isiwabugha uti: “Naghe ngendimukolera ekibi!”
Uyiketere Yehova, akendikusabula.
23 Yehova aponire ebilengero ebitaleghire ndeke,*
N’ebilo by’amabehi si byuwene.
24 Yehova yukasondola ebika by’omundu;
Omundu angaminya ati enzira eyo atolere erilabamo?
25 Ni kitegho omundu erihahamuka ati, “Ni kibuyirire!”
N’enyuma sy’aho imwalengekania oko ebyo alyalapa.
26 Omwami w’amenge akayingila ababi,
N’eribalabyako ekiringo ky’erihumbamo.
27 Omuka w’omundu ni tala ya Yehova,
Eyikakoleraya emwisi-mwisi siwe.
28 Olukogho* n’obutaleghula bikateghaya omwami;
Olwanzo oluteleghula lukaleka ekitumbi kiwe ky’obwami ikyasika.
29 Olukengerwa lw’abalwana k’akaghala kabo,
N’obubuya bw’abasyakulu sy’esyombwi syabo.