Emisyo
29 Omundu oyukabyamo erighundu* abikungwa kangyi-kangyi,
Akendisyalw’iniatsutsangwa isihali n’amaha w’erilama.
2 Abatunganene bakabya babibya bangyi, abandu bakatsema,
Aliwe omubi akabya abitabala, abandu bakasimba.
3 Omundu oyo wanzire amenge akatsemesaya baba wiwe.
Aliwe oyukasiba n’abambalaka akatsatsanga obuteke bwiwe.
4 Omwami akawataya obwami bwiwe omw’ikola ebitunganene
Aliwe oyukasondaya ebyutuliro akateraya obwami bwiwe.
5 Omundu oyukapipa-pipa mulikyabo
Akabya iniakahira ekitegho* embere sy’ebisando by’omulikyabo oyo.
6 Ekosa y’omundu mubi ikamutegha,
Aliwe omundu oyutunganene akatsema n’eriyisyandira.
7 Omundu oyutunganene akatsomana esyombangwa sy’abera,
Aliwe omubi iye syatsomenesyo.
8 Abandu abakayiheka bakaleka omo muyi imwabya ekukuku,
Aliwe abandu b’amenge bakabonderaya ekinigha.
9 Omundu w’amenge akabya akuba obuhaka n’omukiru,
Hakabya emipuro, erisekererya, aliwe omundu w’amenge oyo syalitoka mwatsi.
10 Abandu abanzire eryuta omusasi baponire omundu oyute n’ekosa.
Kandi bakasonda eriita omundu oyulungukere.*
11 Omukiru akalw’iniakangania ebyosi ebiri omo mutima wiwe,*
Aliwe omundu w’amenge akabikabyo kandi inianatulere.
12 Omughulu omusondoli akahulikirira amabehi,
Abaghombe biwe bosi bakabya babi.
13 Omwera n’oyukaghalaya abandi,
Yehova yukaleka ababiri bosi ibalangira ekyakakala.*
14 Omughulu omwami akatswera abera omo ritunganene, ekitumbi kiwe ky’obwami kikasika omo mughulu muli.
15 Efimbo* n’ebinywa by’erikunga bikaha omundu y’amenge,
Aliwe omwana oyo bakalekeranaya akahemula mama wiwe.
16 Omughulu ababi bakakanya, n’amakosa akakakanya,
Aliwe abatunganene bakendisyalangira ababi abo bakatera.
17 Ukunge omwana waghu, neryo akendikuluhukya;
Kandi akendikuletera* obutseme bunene.
18 Abandu bakakola ebyo banzire ahate enzoli,*
Aliwe abakasikaya omughambo batsemire.
19 Omughombe syaliligha erikungwa omo binywa,
Kundi nomo angowabyo, syalikwamabyo.
20 Unewatalola oko mundu oyukahumayira omw’ibugha?
Hali amaha oko mukiru kulenga oko mundu oyo.
21 Wamabidekesya omughombe eritsuka omo bulwana,
Isyedisyabya akasima.
22 Omundu oyukahitana luba-luba akaleka ihabya obuhaka.
Oyukahitana-hitana akakola amakosa mangyi.
23 Eriyiheka ry’omundu rikendisyamukimya,
Aliwe oyukayikehaya akendisyabana olukengerwa.
24 Omwira w’omwibi ayiponire.*
25 Erititimana embere sy’abandu* ni kitegho.
Aliwe oyukayiketera Yehova akendisyateghibwa.
26 Abandu bangyi bakasondaya akanya k’erikania n’omukulu,
Aliwe Yehova yukasoha omundu omo ritunganene.
27 Omundu oyutunganene aponire oyutatunganene
N’omubi aponire oyukakola ebyuwene.