Omughambuli
3 Obuli kindu kiwite endambi yakyo,
Hali endambi y’erikola obuli mwatsi oko kihugho:*
2 Hali endambi y’eributwa n’endambi y’erihola,
Endambi y’erihera n’endambi y’erikula ekiryaherawa,
3 Endambi y’eriita n’endambi y’erilamya,
Endambi y’erihimbula n’endambi y’erihimba,
4 Endambi y’erilira n’endambi y’eriseka,
Endambi y’eribya omo bulighe n’endambi y’erisata,*
5 Endambi y’erighusa amabwe n’endambi y’erikuma-kuma amabwe,
Endambi y’erikumbatira n’endambi y’erileka erikumbatira,
6 Endambi y’erirondya n’endambi y’eriligha ngoko ekindu kyabirihera,
Endambi y’eribika n’endambi y’erighusa,
7 Endambi y’eritulanga n’endambi y’erisona,
Endambi y’eribya bukutu n’endambi y’eribugha,
8 Endambi y’eryanza n’endambi y’eripona,
Endambi y’amalwa n’endambi y’obuholo.
9 Oyukakola omubiiri akabana ndundi yahi omw’iyikasa riwe ryosi? 10 Munalangira omubiiri ogho oMungu aha abandu bakasyabula eky’erikola. 11 Mwabumba ebindu byosi ibyuwene* oko ndambi eyitolere. Nibya mwahira omo mitima y’abandu mw’erikota. Nomo bine bitya, abandu sibendisyafumbula n’ahake ebyo oMungu w’ekwenene akola eritsuka oko nzuko erihika oko nduli.
12 Munalangira ngoko sihali ekyuwene okw’ibo kulenga kw’eriyitsemesya n’erikola ebyuwene omo ngebe yabo, 13 kandi sihali ekyuwene okw’ibo bosi kulenga kw’erirya, erinywa, n’eritsemera emibiiri yabo yosi eyikalire. Ekyo ni kihembo ky’oMungu.
14 Munafumbula ngoko ebyosi ebyo oMungu w’ekwenene akakola bikendisyabyaho kera na kera. Sihali ekyo omundu angatomekako kutse ekyo omundu angalusyako. OMungu w’ekwenene mwakola emyatsi yatya abandu batoke erimusagha.
15 Ekikabya kikabya ikyabiribya; n’ekikendisyabya kyabiribya; aliwe oMungu w’ekwenene akarondaya ekyo abandu babirikwamirira.*
16 Munalangira n’omwatsi ono oko kihugho:* Omo mwanya w’eritunganene, habya obubi; n’omo mwanya w’ebyuwene, habya obubi. 17 Neryo munayibwira omo mutima waghe niti: “OMungu w’ekwenene akendisyatswera omundu oyutunganene n’omubi, kundi obuli mubiiri n’obuli mwatsi awite endambi yagho.”
18 Kandi munayibwira omo mutima waghe niti oMungu w’ekwenene akalenga oko bandu atoke eribakangania ngoko bali ng’esyonyama, 19 kundi hali ekikahikira abandu n’esyonyama kutya; omwiso wabyo ni mughumerera. Ngoko ekighuma kikahola, n’ekindi ko kikanahola kitya; ebyosi birimo ekirimu kighumerera. Neryo omundu syalengire esyonyama, kundi ebyosi ni bule. 20 Ebyosi bikaya ahaghumerera. Ebyosi byalua omo lututu, kandi ebyosi bikasuba omo lututu. 21 Oko kwenene-kwenene, nindi yo wasi ekirimu ky’abandu nga kikerukira endata, n’ekirimu ky’esyonyama nga kikandaghalira omo kitaka?. 22 Kandi munalangira ngoko sihali ekyuwene kulenga omundu eritsemera omubiiri wiwe, kundi ekyo kyo kihembo kiwe; kusangwa nindi yo wangamuwatikya erilangira ebikendisyabya abighenda?