Omughambuli
9 Neryo munalengekania oko byosi ebyo omo mutima waghe, neryo kino kyo nalangira: Abatunganene n’abamenge, n’ebyo bakakola, biri omo byala by’oMungu w’ekwenene. Abandu sibasi olwanzo n’eripona ebyabya embere sy’omughulu wabo. 2 Abandu abatunganene n’ababi, abandu abuwene n’aberire n’abaterire, abakaherera amahere n’abateherera amahere, abosi bakahikirawa n’omwatsi mughumerera. Omundu oyuwene alingene n’omukoli w’amalolo. Oyukalapa ali ng’oyukasagha erilapa. 3 Hane omwatsi owakita obulighe owakabya oko kihugho:* Kundi abandu bosi bakahikirawa n’omwatsi mughumurera, emitima y’abandu yiswiremo obubi. Kandi omo ngebe yabo erisire rikabya irine omo mitima yabo, n’enyuma sy’aho ibahola.*
4 Hane amaha oko mundu oyuli omo bandu abaliho, kundi embwa eyiriho yilengire esimba eyiholire. 5 Kundi abaliho banasi ngoko bakendisyahola, aliwe abaholi sibasi kindu, kandi sibakiwite ekihembo* kyosi-kyosi, kundi babiribiriranwa. 6 Kandi olwanzo lwabo, eripona ryabo, n’eritsuro ryabo byabirihwa. Kandi sibangasyakola oko byosi ebikakolawa oko kihugho.*
7 Ghenda, ulye akalyo kaghu n’obutseme, kandi unywe edivai yaghu n’omutima owatsemire, kundi oMungu w’ekwenene abiritsemera ebyo ukakola. 8 Mughulu wosi esyongyimba syaghu sibye isine sy’omusohe.* Isiwabya ukabula erihira amaghuta w’oko mutwe waghu. 9 Utsemere engebe haghuma n’omukali waghu mwanzwa omo biro byosi by’engebe yaghu eyite na mughaso eyo oMungu abirikuha oko kihugho, omo biro byaghu byosi ebite na mughaso, kundi eryo ryo righabo ryaghu omo ngebe n’omo mubiiri waghu owakalire ogho ukakola oko kihugho.* 10 Ekyosi-kyosi ekyo ebyala byaghu byangatoka erikola, ukolekyo n’akaghala kaghu kosi, kundi sihali omubiiri, emipango, eriminya emyatsi, kutse amenge omo Yisinda,* eyo ukaya.
11 Ono w’oghundi mwatsi ogho nalangira oko kihugho:* Abandu abanguhire bo batesinga amatangwa mughulu wosi, n’abandu b’amaka bo batesinga amalwa mughulu wosi, abandu b’amenge bo batebya n’akalyo mughulu wosi, n’abandu b’ehakili bo batebya bateke mughulu wosi, n’abasi emyatsi mingyi bo batetoka mughulu wosi, kundi emighulu eyikalire n’emyatsi eyo omundu atayilindirireko yikahikira abosi. 12 Kusangwa omundu syasi endambi yiwe. Ngoko esyosamaki sikahambawa omo butimba bubi n’ehinyunyu ihyahambwa omo kitegho, kutya abandu nabo bakahambawa omo kitegho omughulu w’obuhanya, omughulu obuhanya bukabahikira kitsumbukirania.
13 Kandi nabere nabitsopolya amenge, munalangira na kino oko kihugho,* nakyo mukyaniswekya: 14 Habya omuyi muke owalimo abandu bake, neryo omwami mughuma w’amaka mwasyalwa n’omuyi oyo, amatimba kugho, n’eritimbyako ebindu binene ebikendimuwatikya erilwa nagho. 15 Omo muyi muke oyo mwabya enzama nguma, aliwe iyiwite amenge, neryo muyasabula omuyi oyo omo menge wayo. Aliwe muhatabya omundu n’omughuma oyukibuka enzama eyo. 16 Neryo munayibwira niti: ‘Amenge alengire akaghala; aliwe nomo bine bitya, amenge w’enzama akapokibawa n’ebinywa biwe sibyetsomanawa.’
17 Kyuwene erikwama ebinywa ebihehere by’omundu w’amenge kulenga kw’erikwama emilenge-lenge y’omundu oyukatabala omo kati-kati k’abakiru.
18 Amenge alengire ebindu by’amalwa, aliwe omukoli mughuma w’amalolo anganatsandya emyatsi mingyi eyuwene.