Omughambuli

10 Ngoko esisuki esiholire sikaleka amaghuta w’oyukakokotaya amaghuta awakakumba ndeke iniakumba muhanda n’eribyako erihulo, kutya n’obukiru buke bukatsandaya amenge n’olukengerwa.

2 Omutima w’omundu w’amenge akamulabaya omo nzira eyuwene,* aliwe omutima w’omukiru akamulabaya omo nzira eyituwene.* 3 Nomo omukiru angalaba omo nzira yahi, syawite bwenge.* Kandi akaleka abandu bosi ibalangira ngoko ni mukiru.

4 Omukulu amabikuhitanako, isiwalua oho uli. Kundi eritulera rikabonderaya amalolo awakalire.

5 Munalangira oko kihugho k’omwatsi ono owakita obulighe,* ekosa eyo batabali bakakola: 6 Obukiru ibwahabwa ebitumbi bingyi by’endata, aliwe abandu abawite obutoki* ibasighala omo bitumbi by’ahisi.

7 Munalangira abaghombe ibane oko syosabayiri,* aliwe abakulu ibanemughenda omo bisando ng’abaghombe.

8 Oyukatakula ekyuna anganatoghera mukyo; n’oyukahira ekitobo ky’omo luhimbo lw’amabwe anganalumwa n’enzoka.

9 Oyukatakula amabwe anganayihutalya mugho, n’oyukatulanga ebitika anganayihutalya mubyo.*

10 Ekyombo ky’ekyuma kyamabibya kikungu kandi ibatatalyakyo, aho ikikendisaba erikolesya akaghala kanene. Aliwe amenge akaleka emyatsi iyatokekana.

11 Enzoka yamabiluma omundu embere basatayeyo, oyo wasi erisatyayo* isyakiwite omubiiri.

12 Ebinywa ebikalua omo buno bw’omundu w’amenge bikaleta olukogho, aliwe eminywa y’omukiru ikamutoghotaya. 13 Ebinywa ebikatsuka erilua omo buno bwiwe ni bukiru, n’ebinywa biwe by’omwiso ni risire erikaleta obuhanya. 14 Aliwe omukiru syalileka eribugha.

Omundu syasi ebikendisyabya; nindi yo wangamubwira ebikendisyabya abighenda?

15 Omubiiri owakalire w’omukiru akamuluhaya, kundi syasi nibya ng’angalabahi akaya omo muyi.

16 Ni buhanya bunene oko kihugho omughulu oyukatabalakyo ni mwana n’omughulu abakulu bakatsuka efete y’omo tututu! 17 Ni butseme bunene oko kihugho omughulu omwana w’esyoseghu-seghu yukatabalakyo, kandi omughulu abakulu bakalya oko ndambi eyitolere batoke eribya n’akaghala, butsira busana n’eritamira!

18 Obughata bunene bukaleka emiti y’oko lutwe iyahududukala, n’ebyala ebitekola bikaleka enyumba iyatogha.

19 Omukati* akahukawa busana n’amaseka n’edivai ikaleka amaisa iniuwana. Aliwe esyofranga sikaha omundu y’ebyosi ebyo alaghireko.

20 Nibya n’omo malengekania* waghu, isiwatakira* omwami, kandi isiwatakira omuteke omo kyumba kyaghu ky’erighotseramo; kundi akanyunyu* kanganatwala omwatsi,* kutse ekihangyikwa ekiriko ebipupa kyanganasuba omo biryabughawa.