Olwimbo lwa Solomona
7 “Iwe mumbesa w’omutima oghuwene,
Ebisando byaghu bikanzisaya omo biryato byaghu,
Ebihinga byaghu bibumbire ndeke, biri ng’ebindu by’eriyipambamo,
Ebyakokotibawa n’omufundi oyukalire.
2 Omukundi waghu ali ng’akabakuli k’omuviringo,
Edivai eyitswangene isiyanatabulamo.
Enda yaghu yiri ng’ekilundo ky’engano,
Ekitimbireko amawa w’elise.*
3 Amabere waghu abiri ali ng’ebyana bibiri by’engabi,
Ehyana hibiri hy’engabi, ehihasa.
4 Ebikya byaghu biri ng’enyumba nyiri-nyiri eyihimbire omo meno w’etembo.*
Ameso waghu ali ng’ebiriba bye Heshboni
Ebiri hakuhi n’olukyo lwe Bati-rabimu.
Enindo yaghu yiri ng’enyumba nyiri-nyiri ye Lebanoni
Eyilolere e Damasko.
5 Omutwe waghu ali ng’ekitwa kye Karmeli.
Esyonzwiri* syaghu siri ng’obweya bw’embuli bw’erangyi y’olubono-bono,*
Omwami akalw’inyakwira* oko syonzwiri syaghu esilelembire.
6 Iwe mumbesa mwanzwa, uli mubuya kutsibu,
Kandi ukatsemesaya kutsibu kulenga ebyosi ebikatsemesaya.
7 Uli muli ng’omuti w’etende,*
N’amabere waghu ali ng’amatunda w’etende.
8 Munayibwira niti: ‘Ngendisambira omo muti w’etende*
Eriyahambirira oko matunda wagho.’
Amabere waghu abye ng’emizabibu,
Omuka waghu akumbe ndeke ng’esyopome.
9 N’obuno bwaghu bubye ng’edivai eyuwene kutsibu.”
“Yindaghale lyolo-lyolo omo mumero* w’omwanze waghe.
Yisende bolo-bolo ng’edivai eyikasenda oko minywa y’abalito.
10 Niri w’omwanze waghe,
N’ingye akakandira.
11 Mwanze waghe wase,
Tuye omo malima;
Tuyaghotsere omo hiti hy’ekofere.
12 Tukendibuka omo tututu n’eriya omo malima w’emizabibu
Eriyalebya emizabibu nga yabirilasa.*
Eriyalebya omusanga ng’abirisanzulya,
Eriyalebya emiti y’amakomamanga nga yabiryasako omusanga.
Tukendibya twahika eyo, inakukangania olwanzo lwaghe.
13 Amatunda w’amandragore* abiritsatsanga ekikumbo kyagho;
Oko milango yetu kuli emihanda yosi y’amatunda aghuwene,
Awakalua okw’itwibwa, n’awatwibawa kera.
Mwanze waghe, nabirikubikiragho.