ESOMO 4

Eritangirirya Amasako wo ndeke

Matayo 22:41-45

OMO KIKUHI: Uteghekanaye amalengekania w’abahulikiriri baghu embere sy’erisoma erisako.

Uminye ekikaleka iwasoma erisako. Tangiriraya erisako omo nzira eyikawatikaya abahulikiriri baghu eriminya enzumwa ngulu eyo ukasonda eribakangania omo risako eryo.

Ulebaye amasako awali embere sy’omulondo oyo n’aw’asubukiregho. Wamabitangirirya erisako n’erikangania oyo wabugha ebinywa bilebe kutse oyo wahandika ekitabu kilebe ky’eBiblia, ubye iwunikirirye ngoko ebyo ukabugha ni by’ekwenene.
Ukanganaye ngoko ebyo ukabugha bikalua omo Biblia. Omughulu ukakanaya n’abandu abikirirye oMungu, ubawatikaye erilangira ngoko eBiblia ni Kinywa ky’oMungu. Omwikola utya ukakanganaya ngoko eBiblia y’enzuko y’amenge.
Uhire omo bahulikiriri baghu mw’engumbu y’erisoma erisako. Bulaya eribulyo eryo erisako likendisubirya, kanaya oko kitsibu kilebe ekyo erisako likendiwatikya eribugha kutse kanaya oko kanuni ako omwatsi mulebe w’eBiblia akakanganaya.

Lengekanaya oko ebyo abahulikiriri baghu basi oko mwatsi n’erisako eryo. Nomo erisako rinasibwe, utangiriraye ryo omo nzira eyikatsemesaya, kandi uwatikaye abahulikiriri baghu erilengekania kulyo omo nzira nyihya-nyihya.