ESOMO 7

Omwatsi owe kwenene kandi owakawatikaya erikirirya

Luka 1:3

OMO KIKUHI: Kolesaya emyatsi y’ekwenene eriwatikya abahulikiriri baghu batoke eriyisogha emyatsi omo nzira eyuwene.

Usondaye emyatsi eyo abandu bangayiketera. Ubye ukabugha ebiseghemere oko Kinywa ky’oMungu, ni bughambu, eribya iwunemusoma omo Biblia omughulu kyamatokekana. Wamabikania oko mwatsi mulebe w’esiyase, omwatsi owalyakanibabawa oko radio, oko televizyo, kutse omo gazeti nyilebe, omwatsi owalolawako, kutse owundi mwatsi, uyiteghereraye n’erihakikisya aho biluire nga ni by’eriyiketerwa kandi nga nina bya lino-lino.
Ukolesaye ndeke emyatsi eyo ulyabana. Ukanaye oko risako erikwamana n’amasako awatangirire n’awasubukire erisako eryo, erikwamana n’omulaghe wosi w’eBiblia, n’ebitsapo “by’omughombe oyuteleghula n’ow’amenge.” (Mt. 24:45) Wamabikolesya eyindi myatsi eyitelua omo Biblia kutse omo bitsapo byetu, ubugheyo ngoko yine erikwamana n’ekusudi y’omuhandiki wayo.

Isiwanenehaya n’erihira omo mwatsi m’omunyu kutse erikanyia emighanzo y’abandu n’ebindu. Uyiteghaye ekitolere eribya “abandu balebe,” kikasyaba “abandu bangyi,” “oko mighulu milebe” isikyabughawamo “oko mighulu yosi,” “alinga” isiyabya “kitokekene.”
Ulengekanaye n’abahulikiriri baghu. Wabisoma erisako kutse eryahula omwatsi mulebe, omo menge, ubulaye amabulyo malebe kutse uteke eky’erileberyako ekyangawatikya abahulikiriri baghu bahike okwiyisogha ndeke.