Sihabye ekikakughabula oko Yehova

1. Tukaminya tuti ngoko Yehova anzire eriyitunda hakuhi netu?

YEHOVA akatubwira ati tuyitunde hakuhi naye. (Yak. 4:8) Anzire inyabya Mungu wetu, Tata wetu, kandi Omwira wetu. Akasubiraya oko misabe yetu n’erituwatikya omo mighulu eyikalire. Kandi akakolesaya endondeka yiwe eritukangirirya n’erituteya. Aliwe litolere itwakolaki tutoke eriyitunda hakuhi na Yehova?

2. Twangayitunda tuti hakuhi na Yehova?

² Twanganayitunda hakuhi na Yehova omughulu tukamusaba, erisoma eKinywa kiwe, n’erighanirya kukyo. Erikola emyatsi eyo, likatuwatikaya erimwanza kutsibu, n’eritsemera eby’akatukolera. Ebyo bikatukuna erimusikya, n’erimupipa. Kandi ebyo bimutolere. (Erib. 4:11) Eriminya Yehova yo ndeke, likatuwatikaya erimuyiketera kutsibu n’endondeka ey’abirihiraho yitoke erituwatikya.

3. Sitani akakolaki akasonda eritughabula oko Yehova, aliwe ekyangatuwatikya eritendisighania Yehova n’endondeka yiwe niki? (Esyonyimbo 31:13, 14)

³ Aliwe, Sitani anzire eritughabula oko Yehova, kutsibu-tsibu omughulu tuli omo maligho. Akakola ekyo ky’ati? Akakola emyatsi eyangaleka lyolo-lyolo itwaleka eriyiketera Yehova n’endondeka yiwe. Aliwe twanganatoka erilwa naye. Twamabya n’obwikirirya obuwatire n’eriyiketera Yehova yo ndeke, isitwendisighania oMungu wetu n’endondeka yiwe.​—Soma Esyonyimbo 31:13, 14.

4. Omo mwatsi ono tukendikania okuki?

⁴ Omo mwatsi ono tukendikania oko myatsi isatu eyangasira ehihya w’endeko eyangaleka itutasyayiketera Yehova yo ndeke n’endondeka yiwe. Emyatsi eyi yangatughabula yiti oko Yehova? Emyatsi eyi yamatuhikira, twangakolaki tutoke erilwa na Sitani?

OMUGHULU AMALIGHO AKATUHIKIRA

5. Amaligho anganaleka ati itutasyayiketera Yehova yo ndeke n’endondeka yiwe?

⁵ Hakanabya omugulu amaligho inyatuhikira, ng’ab’oko kihanda kyetu eritwendererya kutse eriherya omubírí wetu. Amaligho ng’ayo, anganatughabula ati oko Yehova n’erileka itutasyayiketera ye? Twanganaherya amaha kutse nibya itwabunika mutima, amaligho wetu amabibugha mughulu muli. Sitani akatsemera emighulu eyiri ng’eyo, kundi akakolesayayo erituletamo amalengekania w’eribugha tuti Yehova syatwanzire. Sitani anzire itwalengekania tuti Yehova kutse endondeka yiwe yo yikaleka itwahikirwa n’amaligho malebe. Abaisraeli balebe mobalengekania batya omughulu babya eMisiri. Oko nzuko, babya bikirirye ngoko Yehova abirituma Musa na Haruni eribalusya omo bukobe. (Eri. 4:29-31) Aliwe enyuma sy’aho, omughulu Farao abanubaya, mobabugha bati Musa na Haruni bo bamaleka ekyo ikyabya. Mobabugha bati: “Mwabiritsandya erikumba lyetu eribya nye omo meso wa Farao, n’oko meso w’abaghombe buwe, erihira omuyali g’omo byala byabo eritwita.” (Eri. 5:19-21) Mobahira olubanza l’oko baghombe ba Yehova bataleghula. Ekyo kyabya ky’obulighe! Wamabya iwamabibugha omughulu muli ighunemulaba omo maligho, wangakolaki utoke erilola embere eriyiketera Yehova n’endondeka yiwe?

6. Nga Habakuki, twangalwa tuti n’amaligho? (Habakuki 3:17-19)

⁶ Ubwire Yehova ebiri omo mutima erilabira omusabe, n’erimusaba obuwatikya. Omuminyereri Habakuki mwahikirwa n’amaligho mangyi. Mohanabya omughulu alinga amayowa Yehova nga syamutsomene. Neryo mwabwira Yehova y’eriyowa liwe lyosi erilabira omusabe. Mwabugha ati: “Uwe Yehova, nasyakolyahi ngalira busana n’eriwatikibwa, nawe sulisonda eriowa kwehi? . . . Busana naki ukaleka inalangira ebibi, n’erisamalira obubi kwehi?” (Hab. 1:2, 3) Yehova mwasubirya oko musabe owakalua oko mutima w’omughombe wiwe mutaleghula. (Hab. 2:2, 3) Habakuki abere aghanirya ngoko Yehova alamaya abaghombe biwe kera, mwaswaswabya n’obutseme. Mwayiketera ngoko Yehova amutsomene kandi ngoko akendimuwatikya eriyiyinia omo maligho wosi-wosi. (Soma Habakuki 3:17-19.) Ekyo kyamatwighisyaki? Omughulu ukalaba omo maligho, usabe Yehova n’erimubwira ngoko ukayowa. Neryo, umusabe obuwatikya. Wamakola ekyo, ighukendiyiketera ngoko Yehova akendikuha akaghala ako ulaghireko utoke eriyiyinia. Kandi wamabiyilangirira obuwatikya bwiwe, obwikirirya bwaghu ibukendiwata.

7. Abatunga ba Shirley mobasonda erimuhiramo amalengekania wahi, nikwa ekyamuwatikaya erilola embere eriyiketera Yehova niki?

⁷ Uyitsinge erikola emyatsi eyangakuwatikya eribya ighune hakuhi na Yehova. Ekyo mokyawatikya mwali wetu Shirley oyo wikere omo Papouasie-Nouvelle-Guinée omughulu ahikirawa n’amaligho.b Ekihanda kyabo babya ini bera kandi ihakanabya omughulu ikyakala eribana akalyo. Omutunga wiwe mwamubwira ebyangaleka iniakehya eriyiketera liwe omo Yehova. Mwamubwira ati: “Mukabugha muti ekirimu ky’oMungu kinemubawatikya, neryo obuwatikya obo buli hayi? Ka mukine bera! Munemuherya endambi y’omw’itulira.” Shirley akabugha ati: “Monayibulya niti: ‘OMungu anatutsomene?’ Neryo munalw’inasaba Yehova n’erimubwira ebyosi ebiri oko mutima. Monayitsinga erisoma eBiblia n’ebitsapo byetu, kandi monalola embere eritulira n’erihindana.” Mwatsuka erilangira ngoko Yehova anemutsomana ekihanda kyabo. Ekihanda kyabo isibalighotsera nzala kandi babya ibanatsemire. Shirley akabugha ati: “Monalangira ngoko Yehova anemusubirya oko misabe yaghe.” (1 Tim. 6:6-8) Naghu wamayitsinga erikola emyatsi eyangawatya obwira bwaghu haghuma na Yehova, amaligho kutse eritika-tika isibyendikughabula oko Yehova.

OMUGHULU ABAGHALA BETU ABAKASONDOLA BAKAKOLERAWA MUHANDA

8. Abaghala betu abakasondola omo ndondeka ya Yehova, banganahikirwa n’omwatsi wahi?

⁸ Esyonzighu syetu sikakolesaya emyatsi eyikakolesibawa eritula esyongulu haghuma ne enternete, erilalania amabehi oko bakasondola omo ndondeka ya Yehova kutse eyangaleka itwatika-tikirabo. (Esy. 31:13) Hane abaghala betu balebe ababirihambwa n’erihirwako olubanza ambu ni bakola nabi. Omwatsi owali ng’oyo mwanahikira Abakristo b’oko karne k’erimbere omughulu omukwenda Paulo atsongerawa ery’amabehi n’erihambwa. Mobayiwata bati?

9. Abakristo balebe mobayira bati omughulu omukwenda Paulo ahirawa omo muliki?

⁹ Abakristo balebe b’oko karne k’erimbere, mobaleka eriwatikya omukwenda Paulo omughulu abya omo muliki mw’eRoma. (2 Tim. 1:8, 15) Busanaki? Mbino mobakwa esisoni kundi abandu babya bakalangira Paulo mo mukola nabi? (2 Tim. 2:8, 9) Kutse mobasagha bati ekyo kyanganaleka nabo ib’endereribwa? Babye imo bakola batya busana n’omwatsi wahi, terilengekania ekyo nga mokyaleka Paulo iniayowa ati. Abya iniabiriyiyinia omo myatsi mingyi eyikalire nibya n’erihira engebe yiwe y’omo bwiko busana nabo. (Emib. 20:18-21; 2 Kor. 1:8) Isitwanatabya ng’abasighanaya Paulo omughulu abya alaghire oko buwatikya! Litolere itwibukaki omughulu abaghala betu abakasondola bak’endereribawa?

10. Litolere itwibukaki omughulu abaghala betu abakasondola bak’endereribawa, kandi busanaki?

¹⁰ Isiwibirirawa ekikaleka itwendereribwa n’oyukatuleteralyo nga nindi. Erisako lya 2 Timoteo 3:12 likabugha liti: “Abosi abanzire erikwama engebe y’erikwama oMungu n’erimatikana na Kristo Yesu, basy’endereribwa.” Busana n’ekyo isitwasweka tukalangira ngoko Sitani akalwa n’abaghala betu abakasondola. Akakola atya kundi anzire abaghala betu abo ibaleghula oko Yehova netu itwabyamo obuba.​—1 Pet. 5:8.

11. Twam’ighaki erilua oko Onesiforo? (2 Timoteo 1:16-18)

¹¹ Isiwumbaya eriwatikya abaghala benyu n’eribya hakuhi nabo mughulu wosi. (Soma 2 Timoteo 1:16-18.) Omukristo w’oko karne k’erimbere ye Onesiforo iye mwatakola ng’abandi omughulu Paulo ahirawa omo muliki. “Mwatabya n’esisoni busana n’amahulula [wa Paulo] omo nyumba y’omuliki.” Omo mwanya w’ekyo, mwasonda-sonda Paulo, n’omughulu amubana, mwasondekania esyonzira sy’erimuwatikyamo. Erikola atya, Onesiforo mwahira engebe yiwe y’omo bwiko. Twamighaki erilua oko Onesiforo? Siritolere itwaleka obuba bw’abandu butukakiraye eriwatikya abaghala n’abali betu abak’endereribawa. Omo mwanya w’ekyo, litolere itwayikasa kutsibu tutoke eribawatikya. (Emi. 17:17) Balaghire oko mategheko wetu w’olwanzo n’obuwatikya bwetu.

12. Twamighaki erilua oko baghala n’abali betu be Burusi?

¹² Terighanirya oko ekyo abaghala n’abali betu be Burusi bakakola batoke eriwatikya abalikyabo banzwa abali omo muliki. Abaghuma ba kubo bakabya bayatondesibwa, abaghala n’abali betu bangyi bakasa oko tribinali n’eribasikya mutima. Ekyo kyamatwighisyaki? Omughulu abaghala betu abakasondola bakaleghawa, ibahambwa, kutse eryendereribwa, isiwakwa obuba. Usabirebo, uwatikaye ebihanda byabo, n’erisondekania esindi nzira esyo wangabawatikiryamo.​—Emib. 12:5; 2 Kor. 1:10, 11.

OMUGHULU BAKATUSEKERERAYA

13. Abakatusekereraya banganaleka bati itutasyayiketera Yehova n’endondeka yiwe?

¹³ Abatunga betu abatikirirye, abo tukakola nabo, abo tukasoma nabo, banganatusekererya busana n’omubírí wetu w’eritulira kutse busana n’erikwama esyokanuni sya Yehova sy’emighendere. (1 Pet. 4:4) Banganabugha bati: “Iwe unuwene, aliwe ekisomo kyenyu kikalire kandi kikakwama ebya kera.” Abandi banganatusekererya busana n’emibere eyo tukakoleramo abakahighawa omo ndeko, ibatubwira bati: “Eryo nenyu muti munawite olwanzo?” Ebinywa ng’ebi byanganaleka itwatika-tikira emighambo ya Yehova. Itwanganatsuka n’eriyibwira tuti: ‘Yehova akatusaba emyatsi eyo tutetwangatoka erikola kandi tuti n’endondeka yiwe ikatuboha-boha.’ Wamabya omo mibere ng’eyo wangakolaki utoke eribya ighunayitundire hakuhi na Yehova n’endondeka yiwe?

14. Omughulu abandu bakatusekereraya busana n’erikwama esyokanuni sya Yehova tutolere itwakolaki? (Esyonyimbo 119:50-52)

¹⁴ Uyisoghe kundu erikwama esyokanuni sya Yehova. Yobu iniakakwama esyokanuni sya Yehova nomo anabya akasekereribwa busana n’erikwamasyo. Omughuma w’oko babya bakayahula mo bira ba Yobu, mwasonda nibya erilighisya Yobu ati oMungu syatsomene nomo angakwama esyokanuni siwe kutse iyehe. (Yobu 4:17, 18; 22:3) Aliwe Yobu mwatikirirya amabehi ng’ayo. Abya inyanasi ngoko esyokanuni sya Yehova esilebirye ekibuya n’ekibi sy’esyuwene kandi abya ayisoghire kundu erikwamasyo. Abandu mobataleka akalwika obutaleghula bwiwe. (Yobu 27:5, 6) Twamighaki oko Yobu? Erisekereribwa isiryaleka iwatika-tikira esyokanuni sya Yehova. Terilengekania oko byabirikuhikira omw’ibyaho lyaghu. Kitokekene wabiriyilangirira kangyi-kangyi ngoko engebe yaghu ikuwana omughulu ukakola ebyo Yehova akalangira mo byuwene. Uyisoghe kundu erisighala omo ndondeka eyikimira esyokanuni esyo. Neryo nomo wangasekereribwa bungahi, isiwangatalua oko Yehova.​—Soma Esyonyimbo 119:50-52.

15. Ekyaleka ibabugha muhanda oko Brizit niki?

¹⁵ Tukanaye oko ebyahikira mwali wetu ye Brizit, owe India. Abatunga biwe mobamubughako muhanda busana n’obwikirirya bwiwe. Abere abinabatisibwa oko 1997, iba wiwe oyute Mwimiri wa Yehova mwaherya omubírí wiwe. Neryo iye, mwira wiwe, n’abambesa babo basatu mobahumira eyiri ababuti ba mwira wiwe ababya bikere omo ghundi muyi. Aliwe Brizit mwahikirwa n’amaligho awakalire okw’aho. Kundi mwira wiwe abya isyakiwite omubírí lyabya litolere Brizit iniabya akakola ebiro byosi erisulubirira ekihanda kiwe. Eritomeka okw’ekyo, endeko y’ahakuhi yabya oko bilometere 350. Eky’obulighe, ab’oko kihanda ky’iba wiwe ibakalwa naye busana n’obwikirirya bwiwe. Mobamwendererya kutsibu erihika oko kika lyamatolera ibatasyahuma. Nikwa, mwira wiwe mwahola omw’itsumbukania. Enyuma sy’aho, omughuma w’oko bambesa biwe mwakwa akasere neryo amahola inyawite emyaka 12 misa. Omwatsi mwaswakala kutsibu. Abatunga ba Brizit mobabugha bati yukaleka ebyosi ebi ibyabya. Mobabugha bati eribya Mwimiri wa Yeova ryo lyamaleka ebyosi ebyo ibyamuhikira. Nomo bine bitya mwalola embere eriyiketera Yehova n’erisighala hakuhi n’endondeka yiwe.

16. Brizit mwabana emiyisa yahi busana n’eribya mutaleghula oko Yehova n’oko ndondeka yiwe?

¹⁶ Kundi endeko yabya hali kutsibu, omulebya w’omutimbo mwahana Brizit ati abye akatulira omo kiharo ekyo abya ikeremo n’eribya akakolera emihindano y’omwiwe. Oko nzuko, mwalangira ikyamakala kutsibu. Aliwe mwakwama erihano eryo. Mwabya akatulira abandi b’engulu mbuya n’erikolera emihindano y’omwiwe, kandi iniakakola eriramya ly’eka haghuma n’abali biwe. Mwabana miyisa yahi? Brizit mwabana amafunzo mangyi w’eBiblia, n’abangyi b’oko mafunzo ayo mobabatisibwa. Oko 2005 mwatsuka obupainia bw’omughulu wosi. Eribya mutaleghula oko Yehova n’endondeka yiwe, mobyaleka iniabana emiyisa. Bali biwe banemukolera Yehova butaleghula, kandi lino, ekiharo ekyo kirimo esyondeko ibiri! Brizit ikirirye ngoko Yehova mwamuha akaghala k’erilwa n’amaligho awamuhikira n’eriyiyinia omughulu ab’oko kihanda kiwe babya bakamubughako muhanda.

ULOLE EMBERE ERIBYA MUTALEGHULA OKO YEHOVA N’OKO NDONDEKA YIWE

17. Litolere itwayisogha kundu erikolaki?

¹⁷ Sitani anzire itwalengekania tuti Yehova syangatuwatikya omughulu tukahikirawa n’amaligho kandi tuti erisighala omo ndondeka yiwe likendileka emyatsi iyatukalako kutsibu omw’ibyaho lyetu. Sitani anzire ighubaha omughulu bakabugha amabehi oko baghala betu abakasondola, omughulu bak’endereribawa, kutse erihirwa omo muliki. Kandi anganatsotsya abandu eritubughako muhanda akasonda ati tuleke eriyiketera Yehova n’endondeka yiwe. Aliwe situlitoghera omo bitegho biwe kundi tukabya itunasibyo. (2 Kor. 2:11) Uyisoghe kundu eritenditebibwa n’amabehi wa Sitani kandi usighale mutaleghula oko Yehova n’oko ndondeka yiwe. Wibuke ngoko Yehova syangakusighania n’ahake. (Esy. 28:7) Suleke ekindu kyosi-kyosi kikakughabula oko Yehova!​—Rom. 8:35-39.

18. Omo mwatsi owakwamire tukendisyakania okuki?

¹⁸ Omo mwatsi ono twamabikania oko maligho awangatuhikira erilua ehihya w’endeko. Aliwe eriyiketera lyetu oko Yehova n’oko ndondeka yiwe lyanganalengwako omo myatsi eyikalire eyikasira omo ndeko. Ekyangatuwatikya erikinda emyatsi eyiri ng’eyo niki? Ekyo kyo tukendisyakaniako omo mwatsi owakwamire.