Yehova akatuwatikaya ati eriberererya omubírí wetu w’eritulira?

1. Twanganahikirwa n’omwatsi wahi, kandi twangan’ikiriryaki?

TUNASI ngoko ery’endereribwa lyanganatuhikira tukatulira engulu mbuya. Ery’endereribwa eryo nibya lyanganakanyirira omo biro ebikasa. (Dan. 11:44; 2 Tim. 3:12; Erib. 16:21) Aliwe, twanganayiketera ngoko Yehova akendisyatuwatikya. Busanaki? Kundi Yehova mwawatikya abaghombe biwe ba kera eriberererya emibírí ey’abasaba erikola, nibya n’eyabya ikalire kutsibu. Erikangania ngoko Yehova mwawatikya abaghombe biwe eriberererya emibírí yabo, muleke tukanaye oko myatsi milebe eyahikira omuminyereri Ezekieli oyo watulira Abayahudi ababya banyewa eBabeli.

2. Yehova mwabugha ati abandu ababya omo kiharo ekyo Ezekieli abya akatuliramo ni bandu abali bati, n’omo mwatsi ono tukendikania okuki? (Ezekieli 2:3-6)

² Ekiharo ekyo Ezekieli abya asabirwe erituliramo, kyabyamo abandu abali bati? Yehova mwabugha ati “bakalire,” “n’abatsibu,” kandi ati ni “bandu b’erihona.” Ebinywa byabo ibikahutalaya ng’amahwa, kandi ini batsibu ng’esyonge. Kyo kyaleka Yehova inyabwira Ezekieli yo kangi-kangyi ati: “Subahe”! (Soma Ezekieli 2:3-6.) Ezekieli mwatoka eriberererya omubírí wiwe kundi (1) Yehova yo wamutuma, (2) ekirimu ky’oMungu kyabya kikamuha akaghala akalaghireko, na (3) eKinywa ky’oMungu mokyawatya obwikirirya bwiwe. Emyatsi isatu eyi moyawatikya Ezekieli yo yiti? Netu yangatuwatikya yiti munabwire?

YEHOVA YO WATUMA EZEKIELI

3. Ni binywa byahi byo byangabya imo byahira omo Ezekieli mw’akaghala, na Yehova mwamukangania ati ndeke-ndeke ngoko akendimuwatikya?

³ Yehova mwabwira Ezekieli ati: “Ngakutuma.” (Ezek. 2:3, 4) Alinga ebinywa ebyo mobyahira omo Ezekieki mw’akaghala. Biti? Kundi kitokekene Ezekieli mwibuka ngoko Yehova mwabwira Musa na Isaya ebinywa ebiri ng’ebyo omughulu abasombola mo baminyereri. (Eri. 3:10; Isa. 6:8) Kandi Ezekieli abya inyanasi ngoko Yehova mwawatikya abaminyereri babiri aba eriberererya emibírí eyikalire. Neryo Yehova abere abwira Ezekieli y’engendo ibiri ati: “Ngakutuma,” omuminyereri Ezekieli abya asingene erikirirya ngoko Yehova akendimuwatikya. Kandi, omo kitabu kya Ezekieli, ebinywa: ‘Ekinywa kya Yehova mokyambikako’ bikabanikamo ngendo nyingyi. (Ezek. 3:16) N’ekindi, mwahandika ngendo nyingyi ati ‘ekinywa kya Yehova mokya[sya]mbikako.’ (Ezek. 6:1) Kwenene, Ezekieli abya ikirirye ngoko Yehova yo wamutuma. Kandi, kusangwa tata wa Ezekieli abya muhereri, kitokekene mwamukangirirya ngoko Yehova inyakabwira abaminyereri biwe ngoko akendibawatikya. Yehova mwabwira Isaka, Yakobo, na Yeremia ebinywa bino: “Indi haguma nagu.”​—Enz. 26:24; 28:15; Yer. 1:8.

4. Ni binywa byahi byo byangabya imo byaha Ezekieli y’akaghala?

⁴ Abaisraeli bang’angirire bati omwatsi ogho Ezekieli abya akatulira? Yehova mwabugha ati: “Ekihanda kya Israeli sibendisyaligha erikowa, kusangwa sibeligha erinyowa.” (Ezek. 3:7) Omughulu abandu babya bakaghana eryowa Ezekieli, Yehova yo babya bakaghana eryowa. Ebinywa ebyo mobyawatikya Ezekieli erilangira ngoko abandu erighana erimwowa s’ibughambu mwakataluka oko mubírí wiwe w’obuminyereri. Kandi Yehova mwasikya Ezekieli yo mutima omw’imubwira ngoko emyatsi ey’abya akatulira yasyabya yabererera, abandu “basyaminya ko hali omuminyereri oyo wabiribya omo katikati kabo.” (Ezek. 2:5; 33:33) Ahate eritika-tika, ebinywa ebikasikaya mutima ebyo, mobyaha Ezekieli y’akaghala akabya alaghireko atoke eriberererya omubírí wiwe.

YEHOVA YUKATUTUMA MUNABWIRE

5. Ngoko kisakirwe omo Isaya 44:8, ekikatuletera akaghala niki?

⁵ Netu eriminya ngoko Yehova yukatutuma eriyatulira, likatuha akaghala. Akatusikaya omw’ibugha ati tuli Bimiri biwe. (Isa. 43:10) Olo ni lusunzo lunene kundu! Ngoko Yehova anabwira Ezekieli ati: “Subahe,” netu akatubwira ati: “Simutitimane.” Busanaki siritolere itwasagha abakaghana omwatsi ogho tukatulira? Netu Yehova yukatutuma ngoko anatuma Ezekieli, kandi ane haghuma netu.​—Soma Isaya 44:8.

6. (a) Yehova akakolesaya ebinywa byahi eritukangania ndeke-ndeke ngoko asyatuwatikya? (b) Ekikatusikaya mutima n’erituha akaghala niki?

⁶ Yehova akatukanganaya ndeke-ndeke ngoko akendituwatikya. Ng’eky’erileberyako, embere Yehova abughe ati: “Muli balangiri [bimiri] bage,” mwabugha ati: “Omugulu ukalaba omo magetsi, nasyabya haguma nawe, n’erilaba omo syonyusi, sisyendisyakubwayirako. Omughulu ukalaba omo muliro siwendisyahya, kutse ekirimi ky’omuliro sikyendisyakuhisya.” (Isa. 43:2) Omughulu tukakola omubírí wetu w’eritulira, tukanahindana n’ebikakiryo ebiri ng’eribwagha ly’amaghetse n’amaligho awasosekanibwe n’omuliro. Nomo bine bitya, Yehova akatuwatikaya tutoke erilola embere erikola omubírí w’eritulira. (Isa. 41:13) Abandu bangyi munabwire bakaghana engulu mbuya ngoko byanabya oko mughulu wa Ezekieli. Tukabya itunasi ngoko erighana lyabo eryo siririmanyisaya liti twalemirwe erikola omubírí wetu. Eriminya ngoko Yehova akatsema omughulu tukalola embere butsir’ileghula eritula engulu yiwe, likatusikaya mutima n’erituha akaghala. Omukwenda Paulo mwabugha ati: ‘Obuli mundu asyahembwa n’oMungu ngoko omubírí wiwe ali.’ (1 Kor. 3:8; 4:1, 2) Mwali wetu oyo wabiribugha mughulu muli omo bupainia akabugha ati: “Eriminya ngoko Yehova akatuhemba busana n’eriyikasa ryetu, likandetera obutseme.”

EKIRIMU KY’OMUNGU MOKYAHA EZEKIELI Y’AKAGHALA AKABYA ALAGHIREKO

7. Ezekieli inyakayowa ati omughulu abya akaghanirya oko syonzoli esy’alangira? (Ulebaye epitsa y’oko kijalada.)

⁷ Ezekieli mwayilangirira ngoko ekirimu ky’oMungu kiwite akaghala kanene. Ebyo Ezekieli alangira omo nzoli, mobyaleka inyikirirya ngoko ekirimu ky’oMungu kyo kikasondola abamalaika b’amaka n’ebiringo by’ekigari ky’elubula. (Ezek. 1:20, 21) Ezekieli mwayiwata ati? Mwahandika eky’akola. “Omughulu nalangirakyo, monatulama kibiri-biri.” Busana n’obuba, Ezekieli mwawa ahisi. (Ezek. 1:28) Enyuma sy’aho, omughulu Ezekieli abya akaghanirya oko syonzoli esyo, kitokekene molyabya likaleka inyikirirya ngoko, erilabira obuwatikya bw’ekirimu kibuyirire, akenditoka eriberererya omubírí wiwe.

8-9. (a) Yehova abere abwira Ezekieli ati ahangane, mobyaghenda biti? (b) Yehova mwakola ekindi kyahi eriha Ezekieli y’akaghala k’eriya omo kiharo kiwe ekyabya kikalire?

⁸ Yehova mwabwira Ezekieli ati: “Mugala w’omundu uhangane oko bisando byawe nyitoke eribuga nawe!” Ebinywa ebyo mobyaha Ezekieli y’akaghala akabya alaghireko atoke erihangana. Ezekieli mwahandika ati: ‘Ekirimu mokyanyingiramo mokyanyihangania oko bisando byage.’ (Ezek. 2:1, 2) Enyuma sy’aho, n’omo mubírí wiwe wosi, “ebyala by’oMungu,” n’ibughambu ekirimu kiwe kibuyirire, mokyasondola Ezekieli. (Ezek. 3:22; 8:1; 33:22; 37:1; 40:1) Ekirimu ky’oMungu mokyaha Ezekieli y’akaghala k’erikola omubírí ow’ahabawa, n’ibughambu eritulira abandu b’omo kihanda “ky’embumo ikalire n’obutsibu” ababya omo kiharo kiwe. (Ezek. 3:7) Yehova mwabwira Ezekieli ati: “Nabiriyira obusu bwawe erikala oko musu wabo, n’embumo yawe erikala oko syombumo syabo. Nga almasi erikala kwilaba omutero, ko nabiriyira embumo yawe. Sigubahebo kutse erihahukya omutima embere syabo.” (Ezek. 3:8, 9) Yehova mwabya ng’akabwira Ezekieli ati: ‘Isiwabunika mutima busana n’obutowa bw’abandu. Ngendikuha akaghala.’

⁹ Neryo enyuma sy’aho, ekirimu ky’oMungu mokyasumba Ezekieli, kyamamulenderya omo kiharo ekyo akendiyatuliramo. Ezekieli mwahandika ati: “Ebyala bya Yehova mobyanyikalako n’amaka.” Mokyasaba Ezekieli eyenga nguma eryowa n’eriminya ndeke omwatsi ow’abya asabirwe eritulira atoke erisyatulagho ndeke. (Ezek. 3:14, 15) Neryo Yehova mwamubwira ati aye omo bwerere, eyo, “ekirimu mokya[mw]ingiramo.” (Ezek. 3:23, 24) Aho, Ezekieli abya inyanganatsuka omubiri wiwe w’eritulira.

EKIRIMU KY’OMUNGU KIKATUHA AKAGHALA MUNABWIRE

10. Erikola omubírí wetu w’eritulira, tulaghire oko buwatikya bwahi, kandi busanaki?

¹⁰ Erikola omubírí wetu w’eritulira, tulaghire oko buwatikya bwahi? Erisubirya oko ribulyo eryo, tulengekanaye oko byahikira Ezekieli. Embere atsuke omubírí w’eritulira, ekirimu ky’oMungu mokyamuha akaghala akabya alaghireko. Nga Ezekieli, netu munabwire ekirimu ky’oMungu kisa kyo kikaleka itwatoka erikola omubírí w’eritulira. Tukabugha tutya busanaki? Kundi Sitani akalwa netu akasonda erikakirya omubírí wetu w’eritulira. (Erib. 12:17) Oko malengekania w’abandu sitwangatoka erikinda Sitani. Aliwe tunemumukinda erilabira omubírí wetu w’eritulira! (Erib. 12:9-11) Omo nzira yahi? Omughulu tukatulira, tukakanganaya ngoko situsaghire Sitani. Obuli ngendo eyo tukaya omo mubírí w’eritulira, Sitani akabya inyamakindwa. Neryo, twangabugha tutiki eribya itunemulola embere eritulira nomo esyonzighu sinemulwa netu? Kikalw’ikyalangirika ndeke-ndeke ngoko ekirimu kya Yehova kyo kikatuha akaghala kandi ngoko tukamutsemesaya.​—Mat. 5:10-12; 1 Pet. 4:14.

11. Ekirimu ky’oMungu kyanganatuwatikya kiti, kandi twangakolaki tutoke eribya tukabanakyo?

¹¹ Ni ghundi mwatsi wahi wo tukaminya omughulu tukalengekanaya oko mibere eyo Yehova ahamo Ezekieli y’akaghala akabya alaghireko atoke eritulira? Ekirimu ky’oMungu kyanganatuha akaghala ako tulaghireko tutoke erikinda obuli mwatsi owakalire ogho twangahindana nagho omw’itulira. (2 Kor. 4:7-9) Neryo, twangakolaki oMungu atoke eribya akatuha ekirimu kiwe kibuyirire? Litolere itwabya tukamusabakyo mughulu wosi, itun’ikirirye ngoko akendihulikirira emisabe yetu. Yesu mwabwira abigha biwe ati: “Mubulaye, . . . musondasondaye, . . . mukongote.” Aho, Yehova inyakendiha ‘ekirimu kibuyirire oko bakamusabakyo.’​—Luka 11:9, 13; Emib. 1:14; 2:4.

EKINYWA KY’OMUNGU MOKYAWATYA OBWIKIRIRYA BWA EZEKIELI

12. Erikwamana na Ezekieli 2:9–3:3, ekiringo ky’ekitabu kyalua hayi, kandi kyabya moki?

¹² Ekirimu ky’oMungu mokyaha Ezekieli y’akaghala, nikwa n’eKinywa kiwe, mokyawatya obwikirirya bwiwe. Omo nzoli, Ezekieli mwalangira ekiringo ky’ekitabu ikine omo byala. (Soma Ezekieli 2:9–3:3.) Ekiringo ky’ekitabu ekyo kyalua hayi? Kyabyamoki? Mokyawatya obwikirirya bwa Ezekieli bo kiti? Tulebaye. Ekiringo ky’ekitabu, kyalua oko kitumbi ky’obwami ky’oMungu. Kitokekene, Yehova mwatuma omughuma w’oko bamalaika bani abo Ezekieli alangira aho mbere, erimuha ekiringo ky’ekitabu ekyo. (Ezek. 1:8; 10:7, 20) Ekiringo ky’ekitabu ekyo kyabyamo ebinywa by’oMungu, n’ibughambu omulaghe munene w’eritswera ogho Ezekieli abya atolere eritulira abanyewa abakahona. (Ezek. 2:7) Omulaghe oyo abya asakirwe embere n’enyuma w’ekitabu ky’erilinga.

13. Yehova mwabwira Ezekieli ati ayire ekiringo ky’ekitabu ky’ati, kandi kyabya kisihirire omo nzira yahi?

¹³ Yehova mwabwira omuminyereri wiwe ati alye ekiringo ky’ekitabu kandi ati ‘asulayekyo omo nda’ yiwe. Ezekieli mwowa n’erirya ekiringo kyosi ky’ekitabu. Ekitsweka ky’enzoli eki kyabya ikikamanyisayaki? Ezekieli abya atolere eriminya ndeke omwatsi ow’abya asabirwe eritulira. Abya atolere erikirirya omwatsi oyo, ekyo kitoke erimuhiramo omuhwa w’eriyatulagho. Neryo mohabya omwatsi owakaswekaya. Ezekieli mwafumbula ngoko ekitabu ekyo “mokyasihirira ng’obuki.” (Ezek. 3:3) Omo nzira yahi? Oko Ezekieli, olusunzo lw’eriyatula omwatsi wa Yehova abya mwatsi owasihirire, owakatsemesaya. (Esy. 19:8-11) Mwasima kutsibu, Yehova erimusombola mo muminyereri wiwe.

14. Ekyawatikaya Ezekieli eriyitegheka oko mubírí wiwe niki?

¹⁴ Enyuma sy’aho, Yehova mwabwira Ezekieli ati: “Ebinywa byage byosi ebyo ngandikubwira, wangirirebyo omo mutima wawe, uhulikirire ndeke.” (Ezek. 3:10) Erilabira ebinywa ebyo, Yehova mwabwira Ezekieli ati ahire omo bwenge mw’ebinywa ebyabya bihandikirwe omo kiringo ky’ekitabu n’erighanirya kubyo ko ndeke. Erikola ekyo, molyawatya obwikirirya bwa Ezekieli. Kandi, molyamuwatikya eribana omwatsi owasikire ogho akenditulira abandu. (Ezek. 3:11) Ezekieli abere abyowa omulaghe w’oMungu wo ndeke n’erikiriryagho, abya inyamabiyitegheka eritsuka omubírí w’eritulira n’erilolyagho embere erihika okw’ibughagho.​—Ulebaye n’Esyonyimbo 19:14.

EKINYWA KY’OMUNGU KIKAWATAYA OBWIKIRIRYA BWETU MUNABWIRE

15. Erilolya omubírí w’eritulira w’emuliro, litolere ‘itw’angirira omo mutima’ moki?

¹⁵ Erilolya omubírí wetu w’eritulira w’emuliro, litolere netu itwayitsinga eriyilisya eKinywa ky’oMungu. Litolere ‘itw’angirira omo mutima’ ebyosi ebyo Yehova akatubwira. Munabwire, Yehova akakanaya netu erilabira eKinywa kiwe, eBiblia. Twangakolaki eKinywa ky’oMungu kitoke eritula ndeke oko malengekania wetu, eriyowa lyetu, n’oko bikatukuna erikola emyatsi?

16. Litolere itwayira eKinywa ky’oMungu kyo tuti, kandi twangakolaki kitoke eringira omo mitima yetu?

¹⁶ Ngoko omubiri wetu akanakala-kala omughulu tukalya akalyo nako ikingira omo mubiri wetu, kutya, obwikirirya bwetu bukawata omughulu tukayighisaya eKinywa ky’oMungu n’erighanirya kukyo. Siritolere itwibirirwa esomo eyo tukalusaya omo nzoli y’ekiringo ky’ekitabu. Yehova anzire ‘itwusulya eKinywa kiwe omo nda syetu,’ n’ibughambu eryowakyo ndeke. Ekyangatuwatikya erikola tutya, wo musabe, erisoma eKinywa ky’oMungu, n’erighanirya kukyo. Tukatsuka erisaba tutoke eriteghekania omutima wetu apokere amalengekania w’oMungu. Neryo enyuma sy’aho, itwasoma ekitsweka kilebe ky’omo Masako. Neryo, itwaluhuka hake tutoke erighanirya kutse erilengekania buli oko ebyo tukabisoma. Ekyo, ikikendiluira moki? Omughulu tukaghaniraya kutsibu, eKinywa ky’oMungu kik’ingira ndeke omo mitima yetu y’erisosekania.

17. Busanaki ni ky’endundi erighanirya oko ebyo tukasoma omo Biblia?

¹⁷ Busanaki ni ky’endundi erisoma eBiblia n’erighanirya oko ebyo tukasoma muyo? Erikola tutya, likatuwatikaya eribya n’akaghala ako tulaghireko tutoke eritulira engulu y’oBwami lino n’erisyatula engulu y’eritswera eyikalire eyo twanganasyatulira omo biro ebikasa ebiri hakuhi hano. Kandi tukabya twaghanirya oko mibere eyikatsemesaya ya Yehova, obwira bwetu haghuma naye bukawata kutsibu. Neryo itukendibana ekindu ekisihire kutse ekikatsemesaya kundu, n’ibughambu eritekana omo mutima n’eritsemera ebyo tuwiteko.​—Esy. 119:103.

TUYISOGHIRE KUNDU ERILOLA EMBERE

18. Abandu b’omo biharo ebyo tukatuliramo bakendisyaminya mwatsi wahi, kandi busanaki?

¹⁸ Ezekieli iye abya muminyereri, aliwe itwe situli baminyereri. Nomo bine bitya, tuyisoghire kundu erilola embere eritula omwatsi wa Yehova ow’asondola omo kirimu kiwe owahandikirwe omo Kinywa kiwe, erihika aho akasyabughira ati omubírí w’eritulira atwiriraye aho. Omughulu w’eritswera asyabya ahika, abandu sibendisyabya n’ekyosi-kyosi ekyangaleka ibabugha bati mobatabwirwa kutse bati oMungu mwatabatsomana. (Ezek. 3:19; 18:23) Omo mwanya w’ekyo, bakendisyaminya ngoko omwatsi ogho twabya tukatula, abya mulaghe erilua oko Mungu.

19. Ekikendituha akaghala ako tulaghireko tutoke eriberererya omubírí wetu niki?

¹⁹ Ekikendituha akaghala ako tulaghireko tutoke eriberererya omubírí wetu w’eritulira niki? Ye n’emyatsi isatu eyaha Ezekieli y’akaghala. Tukalola embere eritulira kundi tunasi ngoko Yehova yukatutuma, ekirimu kiwe kibuyirire kikatuha akaghala, kandi ngoko eKinywa kiwe kikawataya obwikirirya bwetu. Yehova akatuwatikaya eriberererya omubiri wetu ‘n’eriyiyinia erihika oko nduli.’​—Mat. 24:13.