Wanganahikira emiradi yaghu ey’obunya-kirimu

1. Abangyi b’okw’itwe babiritaluka erikola emyatsi yahi?

WANABIRIYIHIRIRAHO omuradi w’obunya-kirimu aliwe ikyakukalako erihikiragho?b Kyamabya kitya, sighuli ighuwene. Ng’eky’erileberyako, mughala wetu Philip anzire eryuwania emisabe yiwe n’eribya akasaba kangyi-kangyi, aliwe kikamukalako eribana endambi. Erika anzire inyabya akahika oko ndambi oko muhindano w’eriyatulira; aliwe, akatseleghawa hakuhi oko buli muhindano. Tomáš abiripima kangyi-kangyi erisoma eBiblia yosi. Akabugha ati: “Sinditsemera erisoma eBiblia. Nabiripima kasatu, aliwe ngabya nabihika oko Abalawi inalekera aho.”

2. Busanaki situtolere eribunika mutima twamabya n’omuradi ow’obunya-kirimu ogho situli twahikira?

² Wamabya n’omuradi ogho sughuli wahikira, isiwabunika mutima uti alinga wabiritaluka. Erihikira obuli muradi kikasaba endambi n’eriyikasa, nomo angabya murandi muke. Kundi Wanzire erihikira omuradi waghu, ekyo kikakanganaya ngoko wanzire eribya n’obwira obuwene na Yehova kandi wanzire erimuha ekyuwene. Yehova akatsemera eriyikasa lyaghu. Syangakusaba ekyo siwangatoka. (Esy. 103:14; Mika 6:8) Neryo omughulu ukayihiriraho emiradi ey’erikwamirira, kumbe iwayikasa erisombola eyo wangahikira. Wamabisombola omuradi mulebe, wangayira ghuti utoke erihikiragho? Tulebaye ebyangakuwatikya.

WANZE KUTSIBU ERIHIKIRA EMIRADI YAGHU

3. Busanaki ni ky’omughaso munene eryanza kutsibu erihikira emiradi yaghu?

³ Eritoka erihikira emiradi milebe, kikasaba eryanzayo. Wamanza kutsibu erihikira emiradi yaghu, ukakola kutsibu utoke erihikirayo. Twanganasosekania eryanza erihikira emiradi yetu n’erihunga erikakuna obwato butoke erihika eyo bukaya. Erihunga eryo lyamabilola embere eribuhirira, obwato ibwanganahika eyo bukaya. Kandi ryamabibuhirira kutsibu, obwato obo ibwanganahika luba. Netu kutya, twamabyanza kutsibu erihikira emiradi yetu, itukendihikirayo. Mughala wetu David, owe Salvador akabugha ati: “Omughulu ghuli n’omuhwa munene, ukakola kutsibu. Sighulilighira omwatsi wosi-wosi erikukakirya erihikira omuradi waghu.” Neryo, ekyangakuwatikya eribya n’omuhwa w’erihikira emiradi yaghu niki?

4. Ni mwatsi wahi ogho twangabya tukasabira? (Abanya Filipi 2:13) (Ulebaye n’epitsa.)

⁴ Ubye ukasaba Yehova akuhe omuhwa munene. Yehova anganakuha ekirimu kiwe kikuwatikaye erihikira emiradi yaghu. (Soma Abanya Filipi 2:13.) Hakanabya endambi itwayihiriraho omuradi mulebe kundi itunasi ngoko litolere itwakola tutya, kutse kundi itunasi ngoko kyuwene. Aliwe twanganabya isitwanzire erihikiragho. Ekyo mukyahikira mwali wetu Norina owe Uganda. Mwayihiriraho omuradi ow’eribya n’efunzo ey’erisondola. Aliwe mwabula omuhwa kundi inyakalengekanaya ati alinga syasi erikangirirya ndeke. Ekyamuwatikaya niki? Akabugha ati: “Munatsuka eribya ngasaba Yehova obuli kiro niti ambe omuhwa w’eribya n’efunzo ey’erisondola. Munakola erikwamana n’omusabe waghe, munuwania obutoki bwaghe obw’erikangirirya. Habere hahwa emisi milebe, munalangira omuhwa waghe ow’erisondola efunzo inabirikanya. Oko mwaka mughumerera oyo, munatsukisya esyofunzo ibiri.”

5. Niki kyo twangabya tukalengekaniako tutoke eribya n’omuhwa munene ow’erihikira emiradi yetu?

⁵ Ubye ukalengekania oko ebyo Yehova abirikukolera. (Esy. 143:5) Omukwenda Paulo mwalengekania kutsibu oko lukogho lwa Yehova, n’ekyo mukyamuwatikya eribya n’omuhwa ow’erikolera Yehova yo kutsibu. (1 Kor. 15:9, 10; 1 Tim. 1:12-14) Netu kutya, twamabya tukalengekania oko ebyo Yehova abiritukolera, ekyo ikikendileka itwabya n’omuhwa ow’erihikira omuradi wetu. (Esy. 116:12) Tulebaye ekyawatikaya mwali wetu mughuma owe Honduras atoke erihikira omuradi wiwe ow’eribya mupainia w’omughulu wosi. Akabugha ati: “Munalengekania kutsibu oko lwanzo lwa Yehova okw’ingye. Mwaniwatikya eribya mughuma w’oko bandu biwe. Ekyo kikakanganaya ngoko anitsomene kandi akaniteghaya. Erilengekania eryo mulyaleka inamwanza kutsibu n’eribya n’omuhwa munene ow’erihikira emiradi yaghe.”

6. Ni kindi kyahi ekyangatuwatikya eribya n’omuhwa munene?

⁶ Ubye ukalengekania oko miyisa eyo wangabana wamahikira emiradi yaghu. Tulebaye ekyawatikaya Erika oyo tulyakanayako embere, erihikira omuradi wiwe ow’eribya akahika oko ndambi oko muhindano w’eriyatulira. Akabugha ati: “Munalangira ngoko eribya ngatselewa oko muhindano w’eriyatulira, ingaheraya emyatsi mingyi. Namabihika embere, ingabana akanya ak’eriramukya abaghala n’abali betu, n’erilabya endambi nabo. Kandi ingakwama oko mahano agho tukabana omo muhindano ow’eriyatulira owakatuwatikaya eryuwania omubírí wetu.” Erika mwalengekania oko miyisa eyo angabana amabya akahika oko ndambi, n’ekyo mukyamuwatikya erihikira omuradi wiwe. Naghu wanganalengekania oko miyisa yahi? Emiradi yaghu yamabya iry’eryuwania obusomi bwaghu bw’eBiblia kutse emisabe yaghu, ulengekanaye ngoko emyatsi eyo yanguwania obwira bwaghu haghuma na Yehova. (Esy. 145:18, 19) Omuradi waghu amabya erikulya omubere mulebe w’Ekikristo, ulengekanaye ngoko ekyo kyangawatikya obwira bwaghu n’abandi. (Kol. 3:14) Wanganahandika emyatsi yosi eyikaleka iwasonda erihikira omuradi mulebe. Neryo, iwabya ukaghusa eliso oko karatasi ako kangyi-kangyi. Tomáš, oyo twabirikaniriako akabugha ati: “Ngayikasa kutsibu erihikira omuradi waghe, namabiminya emyatsi eyikaleka inasonda erihikiragho.”

7. Ekyawatikaya Julio n’omukali wiwe erihikira omuradi wabo niki?

⁷ Ubye ukalabya endambi n’abangakukuna erihikira emiradi yaghu. (Emi. 13:20) Tulangire ekyawatikaya Julio na mukali wiwe erihikira omuradi wabo ow’erikola bingyi omo mubírí wa Yehova. Ye Julio akabugha ati: “Mutwasombola abira abangatuwatikya erihikira omuradi wetu, neryo itukakanaya nabo oko muradi wetu oyo. Abangyi ba kubo ibabiriyihiriraho omuradi owuli ng’oyo n’erihikiragho, neryo ibakatuha amahano agho tulaghireko. Kandi abira betu ibakatubulaya emiradi yetu nga twamakoleriayo hayi kandi ibakatusikaya mutima.”

OMUGHULU TWAMABULA OMUHWA

8. Twamabya tukakola oko miradi yetu omughulu tuli n’omuhwa lisa hanganabyaki? (Ulebaye n’epitsa.)

⁸ Oko kwenene, kikanatuhikira itwe bosi ihabya ekiro itwabula omuhwa. Neryo ekyo kyamabya, ni bugha ambu sitwendihikira omuradi wetu? Iyehe. Tuteke eky’erileberyako: Ekihunga kinene kyanganawatikya obwato erilola embere butoke erihika eyo bukaya. Aliwe akaghala k’erihunga sikalibya kaghumerera mughulu wosi, kutse hanganabya omughulu erihunga ilyabula. Neryo ekyo ni bugha ambu obwato bukendisiyala haghumerera? Iyehe. Ng’eky’erileberyako, amato malebe akaghendera oko mutere n’awandi bakaendayagho omo syongahi. Oyukaghendaya obwato anganakolesya omutere kutse esyongahi eritwala obwato eyo bukaya. Twanganasosekania omuhwa wetu n’ekihunga ky’oko ngetse; hanganabya ebiro inyabya munene n’ebindi biro inyakeha. Neryo, twamabya tukatumika oko miradi yetu omughulu tuli n’omuhwa lisa isitwendisyahikirayo. Aliwe ngoko uyukaghendaya obwato akakolesaya esindi nzira erighendya obwato bwiwe omughulu sihali elihunga, netu kwanganayikasa erihikira emiradi yetu nibya omughulu situli n’omuhwa ow’erikola ekyo. Oko kwenene, kyanganatukalako, aliwe itukenditsema erihikira emiradi yetu. Embere sy’erikania oko ekyo twangakola, tutsuke twalangira eribulyo eryo twanganayibulya.

9. Twanganalola embere erikwamirira omuradi wetu nomo sitwanzire erihikiragho? Kanaya.

⁹ Yehova anzire itwamukolera omwanza lyetu n’obutseme. (Esy. 100:2; 2 Kor. 9:7) Neryo twanganalola embere erikwamirira omuradi ogho twabiripona? Tulebaye eky’erileberyako ky’omukwenda Paulo. Mwabugha ati: “Nikwa ngagalaya omubiri wage, nʼerigondyago.” (1 Kor. 9:25-27) Paulo inyakayikasa erikola ebyo Yehova anzire inyakola nibya n’omughulu iye syanzire. Yehova mwanatsemera ebyo Paulo abya akamukolera? Inga! Kandi Yehova mwamutsumula busana n’eriyikasa liwe.​—2 Tim. 4:7, 8.

10. Twangabana endundi yahi twamabilola embere erikwamirira emiradi yetu nomo situwite omuhwa?

¹⁰ Kutya Yehova akatsema akatulangira tukakwamirira emiradi yetu n’omughulu situwite omuhwa. Akatsema akalangira ngoko nomo sitwanzire erikola omwatsi oyo, tunemukolagho kundi tumwanzire. Ngoko Yehova anatsumula Paulo, Netu akenditsumula eriyikasa lyetu. (Esy. 126:5) Kandi omughulu tukalangira emiyisa yiwe okw’itwe, ekyo kyanganatuhiramo omuhwa ow’erikola. Mwali wetu owe Polonye oyukahulawamo Lucyna akabugha ati: “Hakanabya endambi eyo sinianzire eriya omo mubírí w’eritulira, kutsibu-tsibu omughulu niluhire. Aliwe obutseme obo ngabana nabilua omo mubírí w’eritulira, kikabya kihembo kinene.” Neryo tulangire ekyo twangakola omughulu situwite omuhwa.

11. Yehova anganatuwatikya ati erikulya omubere w’eriyikakirya?

¹¹ Ubye ukasaba Yehova akuhe omubere w’eriyikakirya. Omubere w’eriyikakirya akatuwatikaya eritendikola ekibi. Aliwe kandi omubere oyo akatuwatikaya erikola ekyuwene, kutsibu-tsibu omughulu ekyo tukasonda erikola kikalire kutse situwite omuhwa w’erikolakyo. Wibuke ngoko eriyikakirya ni mughuma w’oko mikolere eyikalua oko kirimu kibuyirire, neryo ubye ukasaba Yehova akuwatikaye erikulya omubere ow’omughaso munene oyo. (Luka 11:13; Gal. 5:22, 23) Mughala wetu David oyo twabirikaniriako, oyo abya anzire eryuwania eriyighisya liwe akakanganaya ngoko omusabe mwamuwatikya. Akabugha ati: “Munasaba Yehova aniwatikaye erikulya omubere w’eriyikakirya. Mwaniwatikya eritasyabya n’eprograme eyuwene n’eribya ngasikyayo.”

12. Omulondo w’ Omugambuli 11:4 akatuwatikaya ati erihikira emiradi yetu?

¹² Isiwalindirira uti omughulu owatolere asyayileta. Twamabya tukalindirira tuti omughulu akendisyayileta omo kihugho kino, isitwendisyahikira emiradi yetu. (Soma Omugambuli 11:4.) Mughala wetu oyukaghulawa mo Dayniel akabugha ati: “Oko kwenene sihali omughulu owatolere. Omughulu tukatsuka erikola mwatsi mulebe, oyo akabya iwo mughulu owatolere.” Oghundi mughala wetu owe Uganda uyukahulawa mo Paul akakanganaya ekindi ekyangaleka isitwabya tukalindirirya emyatsi. Akabugha ati: “Tukabya twabitsuka omwatsi, nibya n’omo mibere eyikalire, tukabya itwamaha Yehova y’akanya ak’eritutsumula.”​—Mal. 3:10.

13. Busanaki kyanganuwana eritsuka n’omuradi muke?

¹³ Ubye ukakola bike-bike. Twanganabula omuhwa kundi omuradi ogho twabiriyihiriraho si molo erihikira. Kyamabya iko kiri kitya oko muradi waghu, wanganatsuka eritumika kugho omo hyatsi hike-hike. Wamabya iwanzire erikulya omubere mulebe, wanganatsuka erikanganiagho omo myatsi mike-mike. Wamabiyihiriraho omuradi ow’erisoma eBiblia yosi, wanganatsuka eribya ukasoma oko ndambi nge. Mughala wetu Tomáš oyo tuliakanayako oko nzuko, mwatahikira omuradi wiwe ow’erisoma eBiblia omo mwaka mughuma. Akabugha ati: “Mubyanilema kundi munayihiriraho ebingyi by’eribya ngasoma. Neryo munayisogha eritasyatsuka, aliwe rero munayihiriraho ebike eby’eribya ngasoma obuli kiro n’erilengekania kubyo. Neryo munatsuka eritsemera obusomi bwaghe.” Tomáš abere abibya ekatsemera obusomi bwiwe, mwatsuka eribya akasoma bingyi. N’oko ndulya, mwabugha erisoma eBiblia yosi.c

ISIWABUNIKA MUTIMA OMUGHULU HAMABYA EKIKAKUKAKIRAYA ERIHIKIRA EMIRADI YAGHU

14. Ni myatsi yahi eyo tutayilindirireko eyangaleka itwataluka erihikira emiradi yetu?

¹⁴ Eky’obulighe, twanganabya n’omuhwa w’erihikira omuradi wetu kutse itwayikasa erihikiragho aliwe omwatsi mulebe inyatukakirya. Ng’eky’erileberyako, emyatsi eyo tutayilindirireko yanganatuhikira neryo iyaleka itwabula endambi y’erihikira emiradi yetu. (Omug. 9:11) Twanganabya itukalaba omo maligho awakaleka itwabunika-mutima n’eribula akaghala. (Emi. 24:10) Kundi situhika-hikene, twanganakola amakosa awanganaleka ikyatukalako erisyahikira emiradi yetu. (Rom. 7:23) Kutse twanganaluha. (Mat. 26:43) Niki kyo kyangatuwatikya eritendibunika mutima omughulu hamabya ebikatukakiraya eritendihikira emiradi yetu?

15. Twamahikirwa n’omwatsi owangaleka itwataluka erihikira emiradi yetu, ekyo kikasondibugha kiti sitwenditasyahikirayo? Kanaya. (Esyonyimbo 145:14)

¹⁵ Wibuke ngoko, hamasira omwatsi owangaleka iwataluka erihikira omuradi waghu, ekyo sikisondire eribugha kiti siwendisyahikiragho. EBiblia ikabugha yiti amaligho kutse esyombanza byanganatuhikira kangyi-kangyi. Aliwe kandi ikatukanganaya ndeke-ndeke ngoko twanganakinda amaligho ayo, kutsibu-tsibu omo buwatikya bwa Yehova. (Soma Esyonyimbo 145:14.) Mughala wetu oyukahulawa mo Philip oyo twabirikaniriako akabugha ati: “Ngabya nabitaluka erihikira omuradi waghe mulebe sinilibunika mutima. Omo mwanya w’ekyo, ngakola kutsibu nitoke eritasyahikira omuradi oyo.” Mughala wetu David oyo twabirikaniriako akabugha ati: “Omughulu hamabya ekikanikakiraya erihikira omuradi waghe, ngayikasa erilangira emyatsi omo yindi nzira. Ngalangira nga namabibana akanya ak’erikangania Yehova ngoko ni mwanzire kutsibu.” Kwesi wamabilola embere eriyikasa erihikira omuradi waghu nomo hane myatsi eyikasonda erikukakirya, ukabya iwamakangania Yehova ngoko wanzire erimutsemesya. Yehova akatsema kutsibu akakulangira ukayikasa erihikira emiradi yaghu!

16. Omwatsi mulebe amakuhikira owakaleka iwataluka erihikira emiradi yaghu ekyo kyanganakwighisyaki?

¹⁶ Wanganighira oko myatsi eyiryakukakiraya eritendihikira emiradi yaghu ngoko wabya iwabiripanga. Ulengekanaye oko ebyaleka iwataluka erihikira omuradi waghu, neryo uyibulaye uti: ‘Nangakolaki erikakirya omwatsi owali ng’oyo eritasyanihikira?’ (Emi. 27:12) Aliwe wamataluka erihikira omuradi mulebe ogho wabiriyihiriraho ekyo kyanganasonda eribugha kiti omuradi oyo syakutolere. Kyamabya kitya okw’iwe, wanganatasyalengekania oko miradi yaghu n’erilangira nga ikinakutolere.d Wamatendihikira omuradi mulebe ogho alwe isyakutolere, isiwalengekanaya uti wamataluka.​—2 Kor. 8:12.

17. Busanaki litolere itwabya kukibuka emiradi eyo twabirihikira?

¹⁷ Ubye ukibuka emiradi eyo wabirihikira. EBiblia ikatubwira yiti: “[OMungu] sialikola ekitatunganene. Siangibirirwa omubiri wenyu” (Ebr. 6:10) Naghu isiwabirirawa n’ahake ebyo wabirikola. Ubye ukalengekania oko miradi eyo wabirihikira​—yanganabya eryuwania obwira bwaghu haghuma na Yehova, erikanirya abandi okw’iye kutse eribatisibwa. Ngoko muwatoka erilola embere, erihikira emiradi yaghu y’obunya-kirimu ya kera wanganalola embere utoke erihikira emiradi yaghu eya lino.​—Flp. 3:16.

18. Litolere itwibukaki tukakwamirira emiradi yetu? (Ulebaye n’epitsa.)

¹⁸ Yehova anganakuwatikya erihikira omuradi waghu ngoko oyukaghendaya obwato akahika eyo akaya. Kandi wibuke ngoko abakaghendaya obwato bakatsemera olughendo lwabo. Naghu kutya, ubye ukayikasa erilangira ngoko Yehova anemukuwatikya, ekyo ikikendileka iwabya n’obutseme ukakwamirira emiradi yaghu. (2 Kor. 4:7) Wamatendiluha, ighukendisyabana emiyisa mingyi.​—Gal. 6:9.