MÉNZÈTÉ NTI PɄA PIÉ PÔ NÉ NTSÔÔN LÉ GɄO NOUʼOU NTSÉ
Gouoong 2: Nti yié Mékréeté lôg nnéŋé pouʼou
Wou léziʼi Biible ka kuiété wou lé zsé mmo yié Jéova né nzuiʼté mbwo wou, po mmo yié o gwiée lé gʉo ndôg ngiŋé na mémbʉʉ mé mié ée ndéng ndéng. Choum sié o ka ziʼii ka tsoté wou lé gʉo tsô ménkoubté tsaa wou lénéŋé, mbaa na you nti lé lôg nkouaʼ ngia léwô wo. Fʉʼôôn yié o tsôʼôô lé yiŋé na métchʉo mbʉʉ Jéova mié ée ndʉng ndʉng la, ngouo o kouʼou lé gouʼté yé na nti yié a né nkouoŋo, paʼ taʼ ntsui nkʉ Ssé.
Ménzèté mié mé gé gia gé kuiété wou lé tchouŋo nŋwéʼé choum sié Jéova né nzuiʼté mbwo wou tsèe kouangté jou. É gé ying kimté wou tsô choum sié ngouô o gʉo ndôg ntchʉʼʉ ngaŋa faʼ Jéova, a ping nzuiŋé gouʼté jou. Môôn ménziʼi gé tsoté wou lé giè tʉnzuing wuié aa na lé gʉo mmo ntsém né ngouaaléem mboŋo, lé lôg nnaa légouʼ mbwo Jéova (2 Ko. 1:12; 1 Tm. 1:19; 1 P. 3:16, 21).
Jʉʼ yié o gʉaa ta nthié wo na chou léziʼi gʉo o né nkouoŋo lé kouaʼ ngiŋé na mémbʉʉ Jéova, mbing ngouo tsaa tchouʼté yé. Ménzèté paa ménkang ŋwaʼné mié o gé gia fʉʼôôn gé kuiété wou lé tsaasé ka o jouʼouou mmo yié léyiŋé na mémbʉʉ Jéova lôgô ngôôn wôô, tsaa tchouʼté, tsaa tsiŋé nda, ka po na no yié a lié nkʉo nkʉo tsèe yôôn njʉo wô. Ayôôn gé tsoté wou lé kuiʼi ngôʼté choum sié Jéova gʉo lé lôg ntʉôgté pʉa pé , mbing ngʉo ngié po gouʼou na chʉo wé zuigé. Étso ying ngouo lé née nkouou métchouʼté, nnée ndôgô ntchwo nnaa mbʉèe na ménzèté paʼ a lôôn nna chʉo.
Yôôn gouoong gé ying tchʉôʼ nzong na tʉnzuing lé gʉa fʉʼ ntsém chouŋo no Léfouô Ssé, ndôg nkuiété pétso pʉa lé zsé Jéova, mboo choum sié a né ngʉo nti pʉa mésong (Mt. 24:14; 28:19, 20). A gé tchʉʼ nzsoté, ékouaʼ gʉo o chʉéchʉé njouʼou tʉnzuing wuié aa na lénaa mboum jou mbwo Jéova Ssé mbing ngʉo nouʼou ntsé. Ngouo o néŋé, nzuing té mʉʼté ngié Jéova kouaʼ ngôʼté nti yié o lôôg nzuiŋé poŋo ntʉm yé nzém wou, ayié o té moo kouʼ.
Mékréeté gia lôônda lékô? Aa ndaʼ kô yié Biible gôôn ngié ngouô a gʉo gning chʉaté étasivil wé?
«Pi té toŋo ŋwaʼné Ssé njouʼ wô ka? Mé la ŋwéʼé ngié: “Ssé la fo nouŋé ngouong mbouoon mambaŋa pô manzuiée. Aa mmo yié a gʉo gning nnéŋé ta fag nnè yé na ta wé pô ma wé, ngʉa nda nnè na wé manzuiée. Pô yé témté ntchʉʼʉ taʼ gning. A fo na fʉʼo pô té yiŋé ngouô pʉa mépʉa wô, pô tchʉʼ ngouô pô taʼ gning. Pouʼou la, gning mésong pôôn lé fégé mmo yié Ssé témtée. . . . Gning lôôn njouŋo nzuié wé té wô pô ngié a gʉoo gʉè, nzôʼô tsôô, mba ngang gʉoo pô gʉè”» (Mt. 19:4-6, 9).
Nti kô pʉa pié po tsuié paʼ mambaŋa po manzuiée gwiée lé chana étasivil wôb? O lôôn ngouo yié o zôôʼ, mba ngoumnôôn kée chana ŋwaʼné lôônda ta nna né wou?
«Té tchʉʼ pʉa Ssé légé ngié po gwiée lé jouʼ ntchwo pasaʼ ngouong, ngʉo mmo yié po né nzèté, mbing nnéŋé nthié po lé gʉo po méno mié ée mbong» (Tt. 3:1).
«A pong ngié lôônda wô mbwo maagning ntsém ngouô mmo mékouʼ, mambaŋa zsé ndaʼ nzuiée wé, manzuiée zsé ndaʼ ndoum wé, Ssé gé zôôn laʼ ŋag pʉa pié po poumo wôôwôô paa po nouŋé, mboo pagʉo gʉè» (Hé. 13:4).
Ajou faʼ tsaa tsiŋé nda aa yèe?
«Ming wôôn, jouʼ ntʉôgô ta wou wuié a lôg nkaga wou, mbing mbôôn lé légé lépʉʉ ma wou» (Pr. 1:8).
«Ndououm manzuiée aa two, manzuiée wô mboum nnè. Kristo aa two, atchouʼté pʉa pé wô mboum nnè. [. . .] Ngʉa na pi mbaŋa, awôôwôô kouoŋo nzuié wé ndʉng ndʉng paʼ Kristo kouoŋo tchouʼté pʉa pé» (Éf. 5:23, 25).
«Pi méta pénkʉ, ta pi laba long pénkʉ pi. Pi tchʉʼʉ lé kouéʼté wôb, ntʉôgté wôb, nziʼi wôb mmo yié Jéova né nkouoŋo» (Éf. 6:4).
«Pi pénkʉ pi jouʼ ntchwo méta pi laa méma pi na kôôkôô, anoué aa mmo yié a poŋo Tchʉapʉa» (Kol. 3:20).
«Pi yi panzuiée, pi suiʼi mboum yi nnaa ssé mvfo méloum pi» (1 P. 3:1).
Mélaʼa kô pégé gwiée lé gʉo mékouʼ léwô wo?
«[Ssé] zô naa zuigé mbwo pʉa mésong, ta po lôg ngouô wo, ta mbôô kôôkôô wô. . . . Pégé lôg po yé ta ngouô wô. Yé zo gʉo pégé ŋélé. Yé zo gʉo pégé wô wo» (Mégang nt. 17:25, 28).
Nti kô pégé té gwiée lé zuié gning wô, ta mboo mouô wuié mé gnié té zhié yé?
«Mbaŋa lôôn né ntchoua mélaʼ, ntso manzuié choung. [. . .] Mouô lôôn nké nkwé, mba patchoua mélaʼ gé lôg po two sôb ntong» (Èkz. 21:22, 23).
«Ménʉôg mou la gia wôôn mboo fʉʼ yié n da gnié ngouo po lépoum, méjʉʼ mboum môôn ntsém laa tsaa ŋwaʼné jou ta fo mélièʼ mié é la zhiété lé wô wo, mboo mélièeʼ mié mboo taʼ la té wo wô» (Zôbô nt. 139:16).
«Jéova . . . té kouong . . . mbwo mié é pfèté métsé pagʉo no mboŋo wô» (Pr. 6:16, 17).
Loua Ssé nti métsé aa wèe?
«Pi pôôn lé pfè mbap nôôn wuié mé fomé yé fomé. Pi pôôn lé pfè métsé» (Mégang nt. 15:29).
Nti kô pégé gwiée lé kouong méfè pégé ntsém?
«Méng n gé na lépʉʉ sé suié né pi, é wô ngié: Pi kouoŋé pi né pi. Paʼ méng n da kouoŋo wui la, pi yi kouoŋé pi né pi. Pi lôôn nkouoŋé pi né pi, mba maagning ntsém gé zsé ngié pi ée ngaŋa kwo yôôn» (Jn. 13:34, 35).
Gning lôôn ngwiée gouô yié ngouo a foo na yé ngouoon tsôô gning, ka nzuié ngang wô, mba nti kô a té zété yé: (1) Lé pélé kʉkʉb gning wô? (2) Lé yaŋa long fʉʼ yié tsô pʉa kaa toŋo yé mbʉa pôb wô? (3) Nti kô gning wuié a kaa léjʉng pʉa pié ngouô po gwiée gouô yié a foo na gning nkouou na wétsô, tsôʼô lé tsaasé mégouô na yé ta nzhiété légoua gning na no lôôn nda? (4) Mélaʼa kô gning wuié a gwiée gouô yié ngouo a foo na yé nkouou na gning ndièʼè gwiée lé gôôn né coordinateur mélhié ta ngʉo nouʼou ntsé?
«Ta gning wui gwiée tsôô njouou ndièʼè ta ndi ndaʼ lé kouoŋo gning. . . . “Kouoŋo fè wou gning mésong paʼ o kouoŋo two mboum jou”. Gning lôôn né nkouoŋo fè wé gning mésong, mba a téen ndôgô ngʉo tsô no tépong wô» (Rm. 13:8-10).
«Ta gning wui kouang po ndaʼ yé two. A ying nkouaŋa yé pétsô pʉa» (Flp. 2:4).
Nti kô Ssé né ngôôn ngié pégé tchousé méfʉa pétsô pʉa?
«Pi gwiée chʉôgô ntʉm tsétsèe pi, gning wui fʉa no pi légé nnaa mbwo yé, ndégé méfʉa mi tsétsèe pi né pi, paʼ Jéova la légé méfʉa mi yi la» (Kol. 3:13).
Taʼ fè lôôn ngʉaté mmo jou ka ntang po ngou na wou wô, mba o gwiée lé gʉo lékô?
«Afè wou lôôn ngʉo no tépong na wou, o gʉa ngia yé, pi yé thié jʉʼ mépʉa, o chouŋo yé. A jouʼ, ta nzuiŋé méfʉa, mba o kuilée yé na manzsé tépong. Taʼ nké té jouʼ o faʼa taʼ gning ka pʉa mépua wô, nzsé “ngié mé gé wô chouŋo yôôn no panjʉo ngia é wô ssé mépʉa ka méta wô”. Taʼ a ké ndʉʼʉ lé jouʼou no yié po gôôn, o lôgô yôôn no ngʉa nda tchouʼté pʉa Ssé. A ping ndʉʼʉ lé jouʼou no yié tchouʼté a gôôn, o tchʉʼ ndié yé po paʼ gning wuié a té Ssé zsé, ka po paʼ mé lié kuié ntchoub pa Roma wô» (Mt. 18:15-17).
Jéova gia môôn ménti méno tépong lékô?
▪ No mpfouôʼ
▪ Lélôg métoutou ngouʼté Ssé
▪ Mbaŋa yié é sélé ngʉo no mambaŋa po manzuiée tsétsèe pôb ka panzuiée wô
▪ Léjʉ
▪ Létém njambou
▪ Lénouou mélouʼ ta mbʉa
«N gôôn pʉa paʼ pié pô poumté wôôwôô paa pôô nouŋé nouŋé, mbôô pʉa pié é gouʼté choum ngié ée méssé, mbôô mbaŋa laa panzuiée pié pô gʉo gʉè, mbôô pagʉo méno suilé suilé, mbôô mbaŋa yié é sélé ngʉo no mambaŋa pô manzuiée tsétsèe pôb ka panzuiée wô, mboo métsoong, laa pakouong nkab tèʼ, laa mépʉa mélouʼ, laa pachouoŋo tépong na mézing pʉa, laa pagouoon nkuié, ndièʼ pi fʉté mboum yi na môôn méno ka, pèe pʉa pô téen ndaʼa nkouou na no Léfouô Ssé wô» (1 Ko. 6:9, 10).
A gʉa na méno mpfouôʼ, mé gôôn ménti lénouŋo mambaŋa po manzuiée té wo yié po zôôʼ, mba o chaan jou lé gʉo kô?
«Pi kʉo no magab!» (1 Ko. 6:18).
Nti kô Mékréetè té gwiée lé jʉo méffo mié ngouô é tagté two yôb mbing ndôgô wôb ngʉo ménkouôôn, té wo yié lôgta zo ŋwéʼée né pôb wô?
«Méfè pôôn, paʼ Ssé léen mbou ntsôôn méziŋé mégé la, méng n né ngôôn mbwo pi ngié pi pou nna mboum yi mbwo yé paʼ choum pouôʼ la, ntchʉʼʉ nnéŋé njouʼou po mbwo yé, ngouô po pʉa pé ndaʼ, ngʉo po mmo yié a gé poŋo yé. Légʉo pouʼou, aa légouʼté Ssé na nti yé mboŋo. Ta pi gʉo mi méno paʼ pʉa pié ée tsèe njʉo fʉʼôôn. Pi zuing Ssé né nnaa léghié sé suié né pi ndôgô nkoubé yi nti lékouaŋa no po ntsém, a tchʉa pouʼou, pi kouʼou lé zsé mmo yié yé Ssé né nkouoŋo ngié pi gʉo. Pi zsé mmo yié aa mbong, nzsé yié a poŋo yé, nzsé yié tsô lôʼ té moo wô» (Rm. 12:1, 2).
Ssé lʉʼ ménti lékang ntsém. Métso moo ée mèe?
«Mé té gwiée lé gia tsôô gning tsétsèe pi wuié a touô ming wé wé mambaŋa ka wé manzuiée wô tsèe mmôôg wô. Agning wuié a lôgô métʉ mié é tchʉa mé pʉa mésong ntra lé zsé choum sié é né ntoo, agning wuié a gʉo lékang, agning wuié a tsôʼô ngôôn, angang chʉa, agning wuié a kouèe lékang na gning, agning wuié a gée nda ngôôn, agning wuié a kaʼa paʼ lénéŋé gning mésong gé gʉo wô, mboo gning wuié a faʼa chʉo lé zaté méno pwo mépfo» (Dt. 18:10, 11).
Gning lôôn fʉa maamaa no ta mbing né ntsôôn tchousé Jéova, mba a gwiée lé lwa ngʉo kô?
«A la waa zsoté n zuing méfʉa môôn mbwo wou; n da té kabté méno tépong môôn wô. N da gôôn ngié: “N gé zuing méfʉa môôn mbwo Jéova”» (Zôbô nt. 32:5).
«Gning wui lôôn nné ngia ngôʼ, a suingté Ssé, nné nkaga a zôb mézôbô ntsé ndôg ngouʼté Ssé. Gning wui né ngouô, a tong pakuié mvfo tsèe tchouʼté pʉa Kristo, pô to ndôg mévè nzôʼô yé na lézing Jéova, ésuingté Ssé. Asuingté yié mé waa gʉo, nzab ntʉm na Ssé, a gʉo, a zéŋé. Jéova pʉʼʉ yé, ngouô yié a ka foo ngʉo pô no tépong, mba Ssé gé légé méno tépong mé naa mbwo yé» (Jag 5:14, 15).
O lôôn né nzsé ngié tsoo fè fʉaa tsoo maamaa no tépong, mba o gwiée lé gʉo kô?
«Gning lôôn ngia no tépong yié gning gʉoo, ka njouʼ wô, mbing njouʼ paʼ mé né nzaté no moo, a té kém, mba a lôgô fʉa, mbing ngé kaa piʼ paʼ a fʉaa» (Lv. 5:1).
Mé lôôn ngôôn nda tchouʼté ngié tsoo gning té ying ngouo Nkuié Ntang Jéova wô, mba pégé gwiée lé kuié yé lékô?
«Pi pôôn gning wuié aa tsétsèe pi nnée ngôôn ngié aa fè wui nzém Kristo, mbiŋé mboumo wôôwôô po yé nouŋé nouŋé, ngouô ntsong, ka ngouô po gning wuié a gouʼté choum ngié ée méssé wô, ka po gning wuié a chouŋo tépong na mézing pʉa wôô, ka pʉa mélouʼ wô, ka pô gning wuié a kouong nkab tèʼ wô. Ta pi laa yèe nti gning fo nzôôn ntémé mmo njʉo» (1 Ko. 5:11).
«Gning lôôn ndôgô tsô no ntoo tsétsèe pi, ta a té wô pô yié Kristo la ziʼi wui wô, ta pi koué yé, ta pi fo ntsièʼté yé mbôô tsièʼté» (2 Jn. 10).
Nti kô méchou pou gwiée lé wo pʉa pié é kouoŋo Jéova?
«Gning wuié a ying né pazséno gé tchʉʼʉ nzséno, taʼ, gning wuié a ying né mégʉgʉ gé gwiée méngégé» (Pr. 13:20).
«Ta pi zuing mé fʉʉ wui, pi légée ngié mbang tépong tchʉŋé pʉa ka?» (1 Ko. 15:33).
Nti kô Pakuié Ntang Jéova té gwiée pag na no politik wô?
«Pô té pʉa njʉo wô, ndʉng ndʉng paʼ méng yôôn (Yéeso) n té gning njʉo wô» (Jn 17:16).
Nti kô pégé gwiée lé jouʼ ntchwo pʉa pié é saʼa ngouong?
«A né nzèté ngié wèe gning wô tsétsèe pi jouʼ ntchwo pʉa pié é saʼa ngouong, mélaʼmié lésaaʼ ngouong foo pô mbwo Ssé. Ssé zô la zab pasaʼ ngouong pié ée wo. A né nzèté ngié wèe gning wô tsétsèe pi jouʼ ntchwo pʉa pié é saʼa ngouong, mélaʼmié lésaaʼ ngouong foo pô mbwo Ssé. Ssé zô la zab pasaʼ ngouong pié ée wo» (Rm. 13:1).
Mé lôôn ngôôn ngié o yiŋé na tso loua pʉa mésong wuié a té poumté na loua Ssé wô, mba o gé gʉo lékô?
«A zèté ngié mé jouʼ ntchwo Ssé, ntchʉa lé jouʼ ntchwo pʉa mésong» (Mégang nt. 5:29).
Ée mèe ménkang ŋwéʼé mié ngouo é kuiété wou lé thié ngʉa chʉchʉa na yôôn njʉo fʉʼ yié o né ntsôʼô tso faʼ?
«Alaʼ té laʼ ying lʉôʼô yétsô wô, po lé laʼ nging nziʼi lé lʉôʼ ntchou wô» (Mi. 4:3).
«Pi fo tsèe yôôn tʉoosoŋo nkuiè, mbôgô wui lé gʉo méno tépong paʼ yé, nzsé ngié ngʉngʉ nti nti yié é gé kouou na yé é té kouou wui wô» (Ngia j. 18:4).
O gé tsôʼô kô lé lôg nkièʼté nnè, éping lʉʼʉ kô?
«Jéova . . . pʉa pʉa métsém pié é kouong nkouè» (Zôbô nt. 11:5).
«Pi kʉo no tépong ta fʉôg mékôôn, nkouʼté no mboŋo ta a tʉ» (Rom. 12:9).
«Méfè pôôn, ano yié a lôôn ngouô n dôg ntchʉmé a wô pô ngié, nkouaŋa wui nnéŋé nthié pô na méno mboŋo mié pʉa ta ngiôôn gôʼté, nthié na no nénʉ, ana no yié a thié ndéng ndéng, ana no té lôôʼ, ana méno mié ée mé mékouʼ, ana méno mié mé gʉo pʉa na ngôônté, éméno mié é kuiété, ana méno mié mé singté gning moo» (Flp. 4:8).
Nti kô Pakuié Ntang Jéova té kou métso métchʉôôsé wô?
«Ngouô pi é lé wô pʉa pié pi jʉo choum léjʉo Jéova, ngiŋé ngouô pʉa pié po jʉo choum léjʉo méssé tépong wô» (1 Ko. 10:21).
«Pi fo tsétsèe pôb nkuiè, éfag yi nnè, ta pi kibé mmo yié lôôʼ aa moo, méng n déen nké nkoué wui» (2 Ko. 6:17).
Ée mèe métchʉo mbʉʉ Biible mié é gé kuiété wou lé zsé mélinôôn mié ngouô o jʉo?
«Po la témté na pʉa mélaʼ, nziʼi môb ménti lôg gʉo choum. Po la lôg ngʉa né mvfo lé gouʼté métoutou môb, métoutou ma léen nké ntchʉʼʉ léjʉôʼ mbwo pôb» (Zôbô nt. 106:35, 36).
«Mépfo té ying nzsé tsô mmo wô» (Ékl. 9:5).
«Pô té pʉa njʉo wô, ndʉng ndʉng paʼ méng yôôn n té gning njʉo wô» (Jn. 17:16).
«Apaa a zôôn nzaʼa paʼ pi ka né ngʉo mmo yié patézsé Ssé né nkouoŋo. Pi kôôn fʉʼʉ méno ta saʼa saaʼ, nné ngʉo kôôkôô yié mboum yi tsoté wui lé gʉo, mbʉa mélouʼ, ntchouʼté na linôôn lé pfè choum, ngʉo méno chʉ, pi kôôn nzôgô pô lé nou mélouʼ, pi kôôn ngouʼté choum ngié ée méssé, a wô mmo yié Ssé pou té kouong» (1 P. 4:3).
Ngouo méfʉʼ mié ée tsaa Biible kuiété wou lékô lé zsé ka a poŋo lé jʉo mé anniversaire wô?
«Lièeʼ mbôônté yéta laa lièʼ linôôn lôg nkimté lièʼ yié mé la zhié Faraon, a gʉo tso linôôn nti mégaŋa faʼ pé ntsém, mbing ngʉa mvfo pôb métsém, éfo nda tsaang nkuilé fouô pana mélouʼ mbwo fouô, mboo fouô pana choum léjʉo. A la gʉo fouô pana mélouʼ mbwo fouô ying nzhiété faʼ yé . . . , taʼ, ntchʉŋé fouô pana choum léjʉo, ndéng ndéng paʼ Yésièeb la gôôn» (Gn 40:20-22).
«A gʉo ngouô lièʼè linôôn, lé lôg nkimté lièʼ yié mé la zhié fouô Hérood. Ming Héroodiad wé manzuiée ziŋé mvfo laʼ. Ano pou mboŋo fouô Hérood, ta a gôôn ta nkʉa ngié: A lôôn ndouô pô kô mbwo yé wô, mba a gé na. Ma pa mouô manzuiée tsoté mouô manzuiée ŋwè, ngié a gʉa ngôôn ngié a né nkouoŋo two Jang Mbabtis a tsèe kang pô fʉʼôôn. Afouô jouʼ mbou mmʉôg tèʼ. Ta léwô yié a née ngôôn mvfo mégʉ pé ta nkʉa gʉo, a tsui ngié mé naa two Jang mbwo mouô manzuiée ŋwè, ndéen nké ntoumo gning a gʉa nda tsaang, nzaʼa two Jang» (Mt. 14:6-8, 10).
O né nkouoŋo lé yiŋé na méntʉôgô mélhié mélaʼa kô?
«Pi jouʼ ntchwo pʉa pié pô tsiéen wui. Pi na nnè ssé mvfo pôb, anoué pô wô né lié wui, ntchouŋo nzsé ngié pô gé laʼ naa pité faʼ. Pouʼou la, pi gʉo na nti yié pô gé faʼa faʼ yôb né lékag, ta pô lé né ngaʼté gaʼté wô, anoué a lôôn ngouô pouʼou pi lé zuièʼ» (Hé. 13:17).
Nti kô a né nzaté ngié wou laa tsiŋé nda yi tʉôgô tam lôg ntoŋo Biible mbing nziʼi?
«Awé lékag aa tsèe lépʉʉ Jéova, a ping ntong lépʉʉ Sé ndôôn ndôôn nzsoo pô tsuièʼ. A gé wô paʼ tʉoo yié aa yé mbhié nkang mouô méntsé wuié é né ntchouŋo, atʉo yié a zém ntôôn wé na yé fʉʼʉ njʉo, méffo mé ping té sélé mbang wô. Akôôkôô wô yié a gʉo gé ying» (Zôbô nt. 1:2, 3).
Akô gʉo o kouoŋo lé kou métchouʼté, mbing ntoo wo nna mémbʉèe?
«N gé choung lézing chou mbwo méfè pôôn; n gé gouʼté wou tsèe tchouʼté» (Zôbô nt. 22:22).
«Ta gning wégé gouaʼa lʉôg alé lié fè wé, a ying ndié yé yé, nzsé ngié pégé gé lôg pouʼou, kuingté mémboum mégé na légwiée nkouoŋé mbôô na léfaʼ méfaʼ mboŋo. Ta pégé gnié lé ké nné ntoo métchouʼté mégé too, ta mbôô paʼ létsoo tchouʼté a kéen ntchʉʼʉ ma mbwo tsô pʉa la, ta ntchʉʼ pouʼou, gning wégé kuingté fè wé, a kuingté yé yé, anoué pi né ngia paʼ lièeʼ laʼ Tchʉapʉa né mbôônté» (Hé. 10:24, 25).
Afaʼ yié a pou ngouo tʉnzuing yié Yéeso la na né pégé aa yèe?
«Pi gʉa ngouoŋo ngouong, ndôg pʉa mésong ngʉo ngaŋa kwo yôôn, nnouʼou wôb ntsé . . . , nziʼi wôb lé tʉôgô kwo na méno ntsém mié méng n da ziʼi wui» (Mt. 28:19, 20).
Pégé lôôn né nnaa mmo poŋo ntʉm ndôgô ntoonté méfaʼ tchouʼté Jéova, ka né nkuiété po méfè pégé wôô, mba a zèté ngié pégé gʉo lékô nzsé ngié Jéova gé kag nti yèe mmo?
«Gouʼté Jéova né choum tʉnzuing chou» (Pr. 3:9).
«A pong ngié awôôwôô naa mmo pô paʼ a née nkouangté tsèe ntʉm yé, nna té né ngiaŋa long, té wô yié mé suièe yé suièe, anoué Ssé kouoŋo gning wuié a lôgô lékag nnaa mmo» (2 Ko. 9:7).
Ée mèe méngégé mié Mékréeté zsé ngié po gé gwiée?
«Pajouʼ mboŋo ée pʉa pié mé né nkʉé wôb nti noué pô né ngʉo paʼ Ssé né nzèté, mélaʼmié pô gé gʉo jʉo pi Léfouô Ssé. Pi ée pajouʼ mboŋo na fʉʼ yié mé gé né zoonté wui, éné kʉé wui, é tʉôgô soon nti nti two pi mélaʼ môôn. Pi zôôn nzsé ngié a yiŋé ngouô pô ndʉng ndʉng paʼ, mé la gʉo na patsui nkʉ Ssé pié é la vôg nto ta pi to» (Mt. 5:10-12).
Nti kô légʉo mbabtisé, ntchʉʼʉ Nkuié Ntang Jéova aa taʼ maamaa fouʼ?
«Chouŋé jou ping ngʉo lékag pou ndoué létʉm sôôn, nti noué ée lézing chou sié méng kaa, oh Jéova Ssé wé mékatouʼ!» (Yr. 15:16).