Hezekiyeli

40 Ngomnyaka wama-25 wokudingiswa kwethu,+ ekuthomeni komnyaka, ngelanga letjhumi lenyanga, ngomnyaka we-14 ngemva kobana idorobho liwile,+ ngalo ilangelo isandla sakaJehova besiphezu kwami begodu sangithatha sangisa edorobheni.+ 2 Ngemibono, uZimu wangiletha enarheni yakwa-Israyeli, wangihlalisa phasi entabeni ephakeme khulu+ lapho bekunomakhiwo onjengedorobho lesewula.

3 Nakangiletha lapho, ngabona indoda ukuqaleka kwayo obekunjengekhopha.+ Beyiphethe intambo yelineni nomhlanga wokulinganisa* esandleni sayo+ begodu beyijame esangweni. 4 Indoda yathi: “Qalisisa, lalelisisa begodu utjheje* koke engikutjengisa khona, kungebangelo ulethwe lapha. Tjela indlu yakwa-Israyeli koke okubonako.”+

5 Ngibone iboda libhode ingaphandle lethempeli.* Esandleni sendoda le bekunomhlanga wokulinganisa omakhubhithi asithandathu ubude ukulinganisa (kukhubhithi ngalinye bekungezelelwa ububanzi besandla).* Yathoma ukulinganisa iboda, ubudege balo bekumhlanga munye ukuphakama kwalo kumhlanga munye.

6 Ngemva kwalokho, weza esangweni eliqale epumalanga+ begodu wakhwela iintepisi zalo. Lokha nakalinganisa ubungeno bomnyango esangweni, ububanzi bebulingana nomhlanga munye begodu ububanzi bobunye ubungeno bomnyango nabo bulingane nomhlanga munye. 7 Ikumba kanogada ngayinye beyimhlanga munye ubude, imhlanga munye ububanzi, bekumakhubhithi amahlanu hlangana neenkumba zabonogada.+ Ubungeno besango elihlanu kwethuri lesango eliqale phakathi bebulingana nomhlanga munye.

8 Yalinganisa ithuri lesango eliqale ngaphakathi begodu belimhlanga munye. 9 Ngemva kwalokho, yalinganisa ithuri lesango ebelimakhubhithi abunane; yalinganisa neensika zalo ezingeqadi, bezimakhubhithi amabili begodu ithuri lesango belingeqadi liqale ngaphakathi.

10 Bekuneenkumba ezintathu zabonogada kiwo woke amahlangothi wesango elisepumalanga. Zontathu bezilingana, iinsika ezisemahlangothini woke nazo bezilingana.

11 Ngemva kwalokho, yalinganisa ububanzi bobungeno besango obebumakhubhithi alitjhumi, ubude besango bebumakhubhithi ali-13.

12 Indawo ehlukaniswe maboda phambi kwekumba yabonogada beyilikhubhithi linye mahlangothi woke. Iinkumba zabonogada emahlangothini womabili bezimakhubhithi asithandathu ngayinye.

13 Ngemva kwalokho, yalinganisa isango kusukela kwelinye iphahla lekumba yabonogada* ukufikela kwelinye iphahla begodu belimakhubhithi ama-25 ububanzi; obunye ubungeno bebuqalene nobunye ubungeno.+ 14 Ngemva kwalokho, yalinganisa iinsika eziseqadi, ebezimakhubhithi ama-60 ubude, kuhlanganise neensika ebezisemasangweni woke ezibhode isirhodlo. 15 Ukusuka phambili ebungenweni besango ukufikela phambi kwethuri ngaphakathi eqadi kwesango, bekumakhubhithi ama-50.

16 Bekunamafesidere amatsikana+ weenkumba zabonogada begodu neensika zawo ezisemahlangothini ngaphakathi kwesango ehlangothini ngalinye. Ingaphakathi lamathuri nalo belinamafesidere ihlangothi ngalinye, bekukghatjiswe ngemithi yesundu+ emahlangothini weensika.

17 Ngemva kwalokho, yangiletha esirhodlweni esingaphandle, ngabona iinkumba* zokudlela+ nomgangadelo obhode isirhodlo. Bekuneenkumba zokudlela ezima-30 emgangadelweni. 18 Umgangadelo osehlangothini lamasango bewulingana nobude bamasango, lo bekumgangadelo ophasi.

19 Nje-ke yalinganisa ubude ukusukela phambi kwesango eliphasi ukufikela ekupheleni wesirhodlo esingaphakathi. Bekumakhubhithi ali-100 epumalanga netlhagwini.

20 Isirhodlo esingaphandle besinesango eliqale etlhagwini, yalinganisa ubude balo nobubanzi balo. 21 Bekuneenkumba zabonogada ezintathu ehlangothini ngalinye. Iinsika zawo ezisemahlangothini nethuri bezinesilinganiso esifanako nesango lokuthoma. Bekumakhubhithi ama-50 ubude namakhubhithi ama-25 ububanzi. 22 Amafesiderazo, ithuri lazo nemikghabiswazo yemithi yesundu+ beyilingana naleyo esesangweni elisepumalanga. Abantu bebangafika kizo ngokukhwela iintepisi ezilikhomba begodu ithuri lazo beliphambi kwabo.

23 Bekunesango phakathi kwesirhodlo liqalene nesango elingetlhagwini, elinye liqalene nesango elisepumalanga. Yalinganisa ubude ukusuka kwelinye isango ukufikela kwelinye begodu bekumakhubhithi ali-100.

24 Ngemva kwalokho, yangiletha nca ngesewula, ngabona isango ehlangothini lesewula.+ Yalinganisa iinsika zalo ezisemahlangothini nethuri lalo, bezilingana nezinye. 25 Lapho bekunamafesidere ehlangothini ngalinye lalo nethuri lalo, afana namanye amafesidere. Bekumakhubhithi ama-50 ubude namakhubhithi ama-25 ububanzi. 26 Bekuneentepisi ezilikhomba ezikhuphukela lapho,+ ithuri lalo beliphambi kwazo. Belikghatjiswe ngemigwalo yemithi yesundu emahlangothini weensika zalo, ehlangothini ngalinye.

27 Isirhodlo esingaphakathi besinesango eliqale esewula; yalilinganisa ukuya esewula ukusukela esangweni ukufikela kwelinye isango begodu ubude bebumakhubhithi ali-100. 28 Ngemva kwalokho, yangiletha esirhodlweni esingaphakathi ngesango lesewula; nayilinganisa isango lesewula belilingana namanye. 29 Iinkumba zabonogada, iinsika zalo ezisemahlangothini nethuri lazo bezilingana nezinye. Bekunamafesidere ehlangothini ngalinye lalo nethuri lalo. Bekumakhubhithi ama-50 ubude namakhubhithi ama-25 ububanzi.+ 30 Bekunamathuri kiwo woke amahlangothi; bekamakhubhithi ama 25 ubude begodu amakhubhithi ama-5 ububanzi. 31 Ithuri lalo beliqale isirhodlo esingaphandle, bekunemikghabiso yomuthi wesundu ehlangothini leensika zalo+ begodu bekuneentepisi ezibunane ezikhuphukela lapho.+

32 Nayingiletha esirhodlweni esingaphakathi, yalinganisa isango ukusuka epumalanga begodu belilingana namanye. 33 Iinkumba zabonogada zalo, iinsika zalo ebezisemahlangothini walo nethuri lalo bezilingana namanye begodu bekunamafesidere ehlangothini ngalinye lalo nethuri lalo. Bekumakhubhithi ama-50 ubude namakhubhithi ama-25 ububanzi. 34 Ithuri lalo beliqale isirhodlo esingaphandle, bekunomkghabiso womuthi wesundu emahlangothini womabili weensika, neentepisi ezibunane ezikhuphukela kilo.

35 Ngemva kwalokho, yangiletha esangweni elisetlhagwini+ yalilinganisa; belilingana namanye. 36 Iinkumba zabonogada zalo, iinsika zalo ebezisemahlangothini walo nethuri lalo bezilingana namanye. Bekunamafesidere ehlangothini ngalinye. Bekumakhubhithi ama-50 ubude namakhubhithi ama-25 ububanzi. 37 Ithuri lalo beliqale isirhodlo esingaphandle, bekunomkghabiso womuthi wesundu emahlangothini womabili weensika neentepisi ezibunane ezikhuphukela kilo.

38 Ikumba yokudlela nobungeno bayo beyihlanu kweensika ezisemahlangothini wamasango, lapho iminikelo etjhiswako epheleleko ebeyihlanzwa khona.+

39 Bekunamatafula amabili ehlangothini ngalinye lethuri lesango lapho ebekuhlahlelwa khona iminikelo epheleleko etjhiswako,+ iminikelo yesono+ neminikelo yomlandu.+ 40 Endleleni ekhuphukela esangweni letlhagwini, bekunamatafula amabili angaphandle nawungenako. Bekunamanye amatafula kwelinye ihlangothi lethuri lesango. 41 Bekunamatafula amane ehlangothini ngalinye lesango, abunane nasele aphelele woke lapho bekuhlahlelwa khona imihlatjelo. 42 Amatafula amane womnikelo opheleleko otjhiswako bekungewelitje elisikiweko. Bekalikhubhithi linye nesiquntu ubude, elinye ikhubhithi nesiquntu ububanzi nekhubhithi linye ukuphakama. Kiwo bekubekwa izinto ezisetjenziselwa ukuhlahlela iminikelo etjhiswako nemihlatjelo. 43 Ububanzi bamapherho bebulingana nesandla, bekamagega nawo woke amaboda angaphakathi begodu inyama yeminikelo yesipho beyibekwa ematafuleni.

44 Ngaphandle kwesango elingaphakathi, bekuneenkumba zokudlela zabavumi;+ bezingaphakathi kwesirhodlo esihlanu kwesango letlhagwini, ziqale esewula. Enye ikumba yokudlela beyihlanu kwesango lepumalanga, iqale etlhagwini.

45 Ngemva kwalokho, yathi kimi: “Ikumba le yokudlela eqale esewula ngeyabaphristi abanomthwalo wokwenza imisebenzi ethempelini.+ 46 Ikumba yokudlela eqale etlhagwini ngeyabaphristi abanomthwalo wokwenza umsebenzi we-aldara.+ Madodana kaTsadokhi,+ avela kumaLevi abelwe ukuya kuJehova bona amlotjhe.”+

47 Ngemva kwalokho, yalinganisa isirhodlo esingaphakathi. Besimakhubhithi ali-100 ubude namakhubhithi ali-100 ububanzi, silingana mahlangothi woke. I-aldara beliphambi kwethempeli.

48 Ngemva kwalokho, yangiletha ethurini lethempeli,+ yalinganisa isika esehlangothini lethuri, belimakhubhithi amahlanu kwelinye ihlangothi, imakhubhithi amahlanu kwelinye ihlangothi. Ububanzi besango bebumakhubhithi amathathu ngakwelinye ihlangothi begodu kumakhubhithi amathathu ngakwelinye ihlangothi.

49 Ithuri belimakhubhithi ama-20 ubude namakhubhithi ali-11* ububanzi. Abantu bebafika kilo ngokukhuphuka iintepisi. Bekuneensika emahlangothini wamagoseni, linye ehlangothini ngalinye.+