Eksodusi
25 Nje-ke uJehova wathi kuMosi: 2 “Tjela abantu bakwa-Israyeli bangilethele umnikelo, niwuthathe kinanyana ngubani ofuna ukunikela.+ 3 Nakhu umnikelo ekufuze uwuthathe ebantwini: igolide,+ isiliva,+ ikhopha,+ 4 irhara ehlaza komkayi, iwulu esipiridzana, itjhila elibomvu be, ilineni elisezingeni eliphezulu, uboya bembuzi, 5 iinkhumba zamaramu ezidaywe ngobubomvu, iinkhumba zesili,* iingodo zomunga,+ 6 amafutha weembani,+ ibhalisamu yokwenza amafutha wokuzesa+ neyokwenza ipepho enuka kamnandi,+ 7 amatje we-oniksi namanye amatje abekwa e-efodini+ nesikhwanyaneni esisesifubeni.+ 8 Kufuze bangenzele indawo ecwengileko begodu ngizokuhlala hlangana nabo.+ 9 Kufuze ningenzele ithaberinakeli nakho koke okungaphakathi, nilandele indlela engikutjengise ngayo.+
10 “Ningenzele umfaji ngesigodo somunga, kufuze ube makhubhithi* amabili nesiquntu ubude, kufuze ube yikhubhithi nesiquntu ububanzi, ukuphakama kufuze ube yikhubhithi nesiquntu.+ 11 Niwunameke ngegolide elihlwengileko+ ngaphakathi nangaphandle benenze umphetho wegolide magega nawo.+ 12 Niwenzele amasongo amane wegolide, niwanamathisele ngaphezu kweenyawo zawo ezine. Amasongo amabili aba ngakwelinye ihlangothi begodu amanye amabili aba ngakwelinye ihlangothi. 13 Ubaze iingodo zomuthi womunga uzinameke ngegolide.+ 14 Uzokufaka iingodwezo emasongweni angemahlangothini womFaji ukwenzela bona uthwalwe ngazo. 15 Iingodwezo kufuze zihlale emasongweni womFaji begodu zingasuswa kiwo.+ 16 Ngaphakathi komFaji kufuze ufake ubuFakazi engizokunikela bona.+
17 “Uzokwenza isivalo ngegolide elihlwengileko, kufuze sibe makhubhithi amabili nesiquntu ubude, sibe yikhubhithi nesiquntu ububanzi.+ 18 Kufuze wenze amakherubhi amabili ngegolide; uwakhande, elinye ulibeke ekuthomeni kwesivalo bese elinye ekugcineni kwaso.+ 19 Beka elinye ikherubhi ekuthomeni kwesivalo, elinye ulibeke ekugcineni kwesivalo. 20 Amakherubhi la kufuze athabululele iimpiko zawo phezulu, avale isivalo ngeempiko+ zawo bekaqalane. Ubuso bawo kufuze buqale phasi esivalweni. 21 Uzokuvala umFaji+ begodu ngaphakathi kwawo ufake ubuFakazi engizokunikela bona. 22 Ngizokuvela phambi kwakho lapho bengikhulume nawe phezu kwesivalo.+ Hlangana namakherubhi amabili aphezu komFaji wobuFakazi, ngizokwazisa koke okufuze ukutjele ama-Israyeli.
23 “Kufuze wenze itafula+ ngomuthi womunga libe makhubhithi amabili ubude, ikhubhithi ububanzi begodu libe likhubhithi nesiquntu ukuphakama.+ 24 Uzolinameka ngegolide elihlwengileko bewenze umphetho wegolide magega nalo. 25 Kufuze ulenzele iplanka magega nalo, ububanzi balo bulingane nesandla bewuhlobise umphethwayo ngegolide. 26 Nilenzele amasongo amane wegolide, niwafake emakhoneni womane lapho kuneenyawo khona. 27 Amasongo la kufuze abe seduze neplanka ukwenzela bona asekele iingodo ezithwele itafula. 28 Uzokwenza iingodo ngomuthi womunga, uzinameke ngegolide uthwale ngazo itafula.
29 “Itafula leyo uzoyenzela izitja zayo, amakomitjayo, amajegayo neenkotlelo abazokuthela ngazo iminikelo yeenselo. Kufuze uzenze ngegolide elihlwengileko.+ 30 Etafuleni leyo kufuze ubeke uburotho bombukiso phambi kwami ngazo zoke iinkhathi.+
31 “Kufuze nenze ilithi lesibani+ ngegolide elihlwengileko. Ilithi lesibanelo kufuze likhandwe. Isisekelo salo, isiqu salo, iimpande zalo, amathuthumbo abumbeke njengamathuthumbo we-almondi, iinqumbe zalo namathuthumbo walo azokuba yinto yinye.+ 32 Kufuze kube neempande ezisithandathu eziphuma ngemahlangothini welithi lesibani, kufuze kube ziimpande ezintathu ngakwelinye ihlangothi bese kuthi nangakwelinye kube neempande ezintathu. 33 Ipande yinye kufuze ibe namathuthumbo amathathu abumbeke njengamathuthumbo we-alimondi, ibe neenqumbe namathuthumbo ngokulandelana. Nangakwelinye ihlangothi kufuze kube njalo. Le yindlela iimpande ezisithandathu eziphuma esiqwini selithi lesibani ekufuze zibe ngayo. 34 Esiqwini selithi lesibani kufuze kube namathuthumbo amane abumbeke njengamathuthumbo we-alimondi, neenqumbe namathuthumbo ngokulandelana. 35 Ngaphasi kweempande ezimbili eziphuma esiqwini, kuzokuba nequmbe, kuthi ngaphasi kweempande ezimbili ezilandelako, kube nequmbe nangaphasi kweempande ezimbili ezilandelako kube nequmbe. Kuzokuba njalo kizo zoke iimpande ezisithandathu eziphuma esiqwini. 36 Iinqumbe, iimpande nalo loke ilithi lesibani kufuze zenziwe ngesiqetjhana esikhandiweko segolide elihlwengileko, akukho okufuze kwenziwe kukodwa.+ 37 Kufuze uyenzele neembani ezilikhomba begodu iimbanezo nazikhanyako, zizokukhanyisa nendawo ephambi kwalo.+ 38 Iincimasibani nezinto zokuphatha umlilo kufuze kube ngezegolide.+ 39 Kufuze ulenze ngetalende* legolide elihlwengileko nezitja zalo. 40 Qiniseka bona wenza izintwezi ngokwendlela otjengiswe ngayo entabeni.+