Yokuthoma YamaKhosi
5 URhiramu ikosi yeTirosi+ nakezwa bona uSolomoni uzeswe bona abe yikosi esikhundleni sakayise, wathumela iinsebenzi zakhe kuSolomoni ngombana uRhiramu bekamngani kaDavida.+ 2 Nje-ke uSolomoni wathumela ilizwi kuRhiramu+ wathi: 3 “Wazi kuhle bona uDavida ubaba akhenge akghone ukwakhela igama lakaJehova uZimakhe indlu, ngebanga lokusahlelwa zizipi ngapha nangapha bekwaba kulapho uJehova abeka amanabakhe ngaphasi kweenyawo zakhe.+ 4 Kodwana nje uJehova uZimami ungiphe ukuphumula mahlangothi woke.+ Akunamuntu ophikisana nami begodu akunanto embi eyenzekako.+ 5 Nje-ke ngihlele ukwakhela igama lakaJehova uZimami indlu njengombana uJehova athembisa uDavida ubaba, nakathi: ‘Indodanakho engizoyibeka esihlalweni sakho sobukhosi esikhundleni sakho, ngiyo ezokwakhela igama lami indlu.’+ 6 Nje-ke yala abantu bakho bona bangisikele iingodo zemisedari yeLibhanoni.+ Iinsebenzi zami zizokusebenza neensebenzi zakho begodu ngizokubhadela imirholo yeensebenzi zakho ngokuvumelana nenani olibekileko ngombana uyazi ukuthi akekho kithi okwazi ukusika imithi njengamaTsidoni.”+
7 URhiramu nakezwa amezwi kaSolomoni, wathaba khulu wathi: “Kwanga uJehova angadunyiswa namhlanjesi ngombana uphe uDavida indodana ehlakaniphileko bona ibuse phezu kwabantu abanengi kangaka!”+ 8 Nje-ke uRhiramu wathumela ilizwi kuSolomoni wathi: “Ngiwufumene umlayezo ongithumele wona. Ngizokwenza koke okufisako bona ngikunikele iingodo zomsedari nezomjunipha.+ 9 Iinsebenzi zami zizozehlisela elwandle zisuka eLibhanoni, ngizozibophela ndawonye zithaye elwandle ziye endaweni ekhethwe nguwe. Ngizokuhlela bona zitjhatjhululwe lapho bese uzithathe. Wena-ke uzonginikela ukudla engikubawela umndenami.”+
10 Nje-ke uRhiramu wathumela zoke iingodo zomsedari nezomjunipha ebezifunwa nguSolomoni. 11 USolomoni wanikela uRhiramu iinlinganiso ezikulu* ezizii-20 000 zekoroyi neenlinganiso ezima-20 zamafutha we-oliva atsengiweko bona ondle umndenakhe. Ngilokho-ke uSolomoni akunikela uRhiramu unyaka nonyaka.+ 12 UJehova wanikela uSolomoni ukuhlakanipha njengombana amthembisa.+ Kwaba nokuthula phakathi kwakaRhiramu noSolomoni begodu bobabili benza isivumelwano.
13 IKosi uSolomoni yakatelela amadoda kiwo woke u-Israyeli bona ayisebenzele; kwakatelelwa amadoda azii-30 000.+ 14 Beyiwathumela ngeenqhema zabazii-10 000 qobe nyanga. Bewahlala inyanga eLibhanoni bese ahlale iinyanga ezimbili eendlini zawo; u-Adoniramu+ bekaphethe labo abakatelelwe bona basebenzele ikosi. 15 USolomoni bekanabathwali bemithwalo abazii-70 000 nabasiki bamatje+ eentabeni+ abazii-80 000, 16 kunye namasekelakhe+ azii-3 300 egade asebenza njengeenduna bona anqophise iinsebenzi. 17 Ngomyalo wekosi, bemba amatje amakhulu namatje abizako+ bona kwakhiwe isisekelo+ sendlu ngamatje asikiweko.+ 18 Nje-ke abakhi bakaSolomoni nabakhi bakaRhiramu namaGebali+ benza umsebenzi wokusika begodu balungiselela iingodo namatje bona kwakhiwe indlu.