Yesibili YamaKhosi

10 U-Arhabi+ bekanamadodana ama-70 eSamariya. Nje-ke uJehu watlola iincwadi wazithumela eSamariya, emakhosaneni weJizriyela, ebadaleni+ nebatlhogomelini babantwana baka-Arhabi, wathi: 2 “Incwadi le nayifika kini, amadodana wekosenu azabe anani, kunye neenkarana zepi, iinjomani, idorobho elivikelekileko neenkhali. 3 Khethani owadlula woke nofaneleka khudlwana emadodaneni wekosenu nimbeke esihlalweni sobukhosi sakayise. Ngemva kwalokho, nilwele indlu yekosenu.”

4 Kodwana barhidlwa livalo bathi: “Qalani! Amakhosi amabili nakabhalelwe kujama phambi kwakhe,+ sibobani-ke thina?” 5 Yeke umphathi wesigodlo, umbusi wedorobho, abadala nabatlhogomeli bathumela umlayezo lo kuJehu bathi: “Siziinsebenzi zakho, sizokwenza koke ositjela khona. Akunamuntu esizombeka bona abe yikosi. Yenza nanyana yini oyibona ilungile emehlwenakho.”

6 Ngemva kwalokho, wabatlolela incwadi yesibili wathi: “Naningebami begodu nizimisele ukungilalela, lethani iinhloko zamadodana wekosenu, nize kimi kusasa ngesikhathesi eJizriyela.”

Nje-ke amadodana wekosi ama-70 bewahlala namadoda adumileko wedorobho. Amadoda lawo ngiwo ebewakhulisa amadodana wekosi. 7 Msinyana ngemva kokufumana incwadi leyo, bathatha amadodana wekosi bawarhayila, bekumadoda ama-70,+ ngemva kwalokho bafaka iinhloko zawo ebomantjini, bazithumela kuye eJizriyela. 8 Isithunywa sangena sathi kuye: “Balethe iinhloko zamadodana wekosi.” Yena wathi: “Zibekeni zibe maququ amabili esangweni ledorobho bekube sekuseni.” 9 Nakaphumako ekuseni, wajama phambi kwabo boke abantu wathi: “Nimsulwa. Iye, ngimi oluke amano wokulwa nekosami begodu ngiyibulele+ kodwana ngubani obulele boke laba? 10 Nje-ke kufuze nazi ukuthi alikho nalinye ilizwi lakaJehova, uJehova alikhulume ngokujamelene nendlu ka-Arhabi elingekhe lizaliseke+ begodu uJehova ukuphethile lokho akukhuluma ngencekwakhe u-Eliya.”+ 11 Ukungezelela kilokho, uJehu wehla bona ayokubulala boke ebebasele bendlu ka-Arhabi eJizriyela nawo woke amadodakhe adumileko, abantu ebekajayelene nabo nabaphristi bakhe,+ bekwangasinda muntu.+

12 Ngemva kwalokho, wangena indlela eya eSamariya. Indlu yokubophela* yabelusi beyisendleleni leyo. 13 UJehu wahlangana lapho nabafowabo baka-Arhaziya ikosi+ yakwaJuda, wathi kibo, “Nibobani?” Bathi: “Sibafowabo baka-Arhaziya, sisehlela khona bona siyokuhlola amadodana wekosi namadodana wendlovukazi.” 14 Msinyana wathi: “Babhudungeleni basaphila!” Yeke bababamba basaphila begodu babarhayilela emthonjeni wendlu yokubophela, bekumadoda ama-42. Akhenge atjhiye namunye wawo aphila.+

15 Nakasuka lapho, wahlangana noJonadaba+ indodana kaRekabi,+ obekeza bona azomhlangabeza. Ngemva kokumlotjhisa* wathi kuye: “Ihliziywakho inami ngokupheleleko na njengombana ihliziywami inehliziywakho?”

UJonadaba waphendula wathi: “Iye kunjalo.”

“Nakunjalo-ke, nginikela isandla sakho.”

Wamnikela, uJehu wamdosela kuye ngekaraneni. 16 Wathi kuye: “Khamba nami, ubone ukuthi angikghoni kangangani ukuzibamba lokha omunye nakaphikisana noJehova.”+ UJehu wamthatha wakhamba naye ngekaranakhe yepi. 17 Wafika eSamariya, wasahlela boke ebebasele bendlu ka-Arhabi eSamariya bekwaba kulapho abarhayile boke,+ ngokuvumelana nelizwi lakaJehova alikhulume ngo-Eliya.+

18 Ukungezelela kilokho, uJehu wabuthelela boke abantu ndawonye wathi kibo: “U-Arhabi walotjha uBhali kancani,+ kodwana uJehu uzomlotjha khulu. 19 Nje-ke bizani boke abaphorofidi bakaBhali,+ boke abantu abamlotjhako, nabo boke abaphristi+ bakhe nibalethe kimi. Kufuze boke babe khona ngombana ngifuna ukwenzela uBhali umhlatjelo omkhulu. Nanyana ngubani ongekho uzokufa.” Kodwana lokhu bekuliqhinga lakaJehu lokutjhabalalisa abalotjhi bakaBhali.

20 UJehu waraga wathi: “Memezelani umhlangano okhethekileko kaBhali.” Yeke bawumemezela. 21 Ngemva kwalokho, uJehu wathumela ilizwi ku-Israyeli woke begodu beza boke abalotjhi bakaBhali. Akakho namunye owasalako. Bangena ngendlini kaBhali,*+ indlu kaBhali yazala swi. 22 Wathi kumphathi wekumba yokubeka izambatho: “Lethela boke abalotjhi bakaBhali izambatho.” Yeke wabalethela zona. 23 Nje-ke uJehu noJonadaba+ indodana kaRekabi bangena ngendlini kaBhali. Wathi ebantwini abalotjha uBhali: “Funisisani nibone ukuthi akekho olotjha uJehova ngapha, kufuze kube babantu abalotjha uBhali kwaphela.” 24 Emaswapheleni bangena benza imihlatjelo neminikelo yokutjhiswa. UJehu bekabeke amadoda ama-80 ngaphandle wathi kiwo: “Nakungenzeka enye yamadoda engiwabeka ezandleni zenu aphunyurhe, kuzokufa nina esikhundleni sayo.”

25 Msinyana ngemva kokwenza umnikelo otjhiswako, uJehu wathi kibonogada nebasekelini: “Ngenani nibarhayile! Ningavumeli namunye aphunyurhe!”+ Yeke abonogada nabasekeli babarhayila ngesabula bebabaphosela ngaphandle, basolo bakhamba bebayokufika endaweni ecwengileko engaphakathi* yendlu kaBhali. 26 Ngemva kwalokho, bakhupha iinsika ezicwengileko+ zendlu kaBhali bese batjhisa ngayinye yazo.+ 27 Bagiriza isika ecwengileko+ kaBhali, bagiriza nendlu kaBhali+ bayiphendula indawo yokuzithumela njengombana isesenjalo nanamhlanjesi.

28 Nje-ke uJehu warhayila uBhali kwa-Israyeli. 29 Nanyana kunjalo, uJehu akhenge asuke ezonweni uJerobhowamu indodana kaNebathi abangela u-Israyeli bona azenze. Walisa amathole wegolide ebekaseBhetheli nakwaDani.+ 30 Nje-ke uJehova wathi kuJehu: “Ngombana wenze kuhle begodu wenze okulungileko emehlwenami ngokwenza koke ebekusehliziywenami bona kwenziwe endlini ka-Arhabi,+ ngalokho iinzukulwana ezine zamadodanakho zizokuhlala esihlalweni sobukhosi kwa-Israyeli.”+ 31 Kodwana uJehu akhenge alwele ukukhamba emThethweni kaJehova uZimu ka-Israyeli ngehliziywakhe yoke.+ Akhenge asuke ezonweni uJerobhowamu abangela u-Israyeli bona azenze.+

32 Emihleni leyo uJehova wathoma ukuphungula u-Israyeli kancanikancani. URhazayeli wasolo abasahlela esifundeni soke sakwa-Israyeli,+ 33 ukusuka eJordani ukuya ngepumalanga, yoke inarha yeGiliyadi yabantu bakwaGadi, bakwaRubeni nabakwaManase+ ukusuka e-Aroweri engemRhobeni we-Arinoni, ukuya eGiliyadi neBhatjhani.+

34 Malungana nawo woke omunye umlando kaJehu, koke akwenzileko nawo woke amandlakhe, akukatlolwa na encwadini yomlando weenkhathi zamakhosi wakwa-Israyeli? 35 Ngemva kwalokho, uJehu walaliswa nabokhokho bakhe, wabulungelwa eSamariya; indodanakhe uJehowarhazi+ yaba yikosi esikhundleni sakhe. 36 UJehu wabusa iminyaka ema-28 phezu kwaka-Israyeli eSamariya.