Eksodusi

26 “Kufuze wenze ithaberinakeli+ ngamatjhila wetende alitjhumi welineni elisezingeni eliphezulu, ngerhara ehlaza komkayi, iwulu esipiridzana nangetjhila elibomvu be. Kufuze uwakghabise ngokuthungelela amakherubhi kiwo.+ 2 Itjhila ngalinye kufuze libe makhubhithi* ama-28 ubude belibe makhubhithi amane ububanzi. Woke amatjhila la kufuze alingane.+ 3 Kufuze uhlanganise amatjhila amahlanu abe litjhila linye elikhulu, uhlanganise namanye godu amahlanu abe litjhila linye elikhulu. 4 Ematjhileni amakhulu lawo faka iinrhobelo emaphethelweni ngerhara ehlaza komkayi, ukwenzela bona amatjhila amabili la ahlanganiswe. 5 Uzokwenza iinrhobelo ezima-50 ngakwelinye itjhila, wenze nezinye ezima-50 emaphethelweni welinye ukwenzela bona lapha ahlangana khona iinrhobelo ziqalane. 6 Kufuze wenze iinghamelo zegolide ezima-50 uhlanganise ngazo amatjhila ukwenzela bona ithaberinakeli libe yinto yinye.+

7 “Kufuze wenze amatjhila ali-11+ ngoboya bembuzi+ bona kugutjuzeswe ithaberinakeli. 8 Itjhila ngalinye kufuze libe makhubhithi* ama-30 ubude belibe makhubhithi amane ububanzi. Woke amatjhila ali-11 la kufuze alingane. 9 Kufuze uhlanganise amatjhila amahlanu abe yinto yinye, uhlanganise namatjhila asithandathu abe yinto yinye bewubhince itjhila lesithandathu ngaphambili kwetende. 10 Kufuze wenze iinrhobelo ezima-50 emaphethelweni wetjhila elikhulu, wenze nezinye iinrhobelo ezima-50 emaphethelweni welinye itjhila elikhulu lapha amatjhila amabili la ahlangana khona. 11 Kufuze wenze iinghamelo zekhopha ezima-50, uzifake eenrhobelweni uhlanganise itende libe yinto yinye. 12 Itjhila eliseleko kufuze lilenge, kuthi ingcenye yetjhila eliseleko lilengele ngemva kwethaberinakeli. 13 Itjhila kufuze lilenge ngekhubhithi linye kiwo woke amahlangothi begodu kufuze lihlale lilenga njalo khona lizakuvala ithaberinakeli.

14 “Uzokwenza isigubuzeso ngeenkhumba zamaramu ezidaywe ngokubomvu, ngaphezu kwaso wenze nesigubuzeso ngeenkhumba zesili.*+

15 “Kufuze wenzele ithaberinakeli amafremu+ ngomuthi womunga ajame anqophe.+ 16 Ifremu ngayinye kufuze ibe makhubhithi alitjhumi ukuphakama, ibe likhubhithi nesiquntu ububanzi. 17 Ifremu ngayinye kufuze ibe neentlobo* ezimbili bona ihlanganiswe. Le yindlela ekufuze uwenze ngayo woke amafremu wethaberinakeli. 18 Kufuze wenzele ithaberinakeli amafremu ama-20 ngehlangothini elingesewula yethaberinakeli.

19 “Uzokwenza iinsekelo zesiliva ezima-40+ zibe ngaphasi kwamafremu ama-20: Iinsekelo ezimbili zibe ngaphasi kwefremu yinye ukwenzela bona iintlobo zawo ezimbili zingene emigojaneni emibili yeensekelo.+ 20 Ihlangothi langetlhagwini lethaberinakeli lenzele amafremu ama-20 21 neensekelo zawo zesiliva ezima-40, iinsekelo ezimbili zibe ngaphasi kwefremu yinye, wenze okufanako nakwamanye amafremu. 22 Ingcenye engemuva yethaberinakeli ukuya ngetjingalanga uzoyenzela amafremu asithandathu.+ 23 Wenze amafremu amabili bona abe ziinsika zethaberinakeli emakhoneni amabili angemva. 24 Kufuze akhambe ngamabili ukusukela phasi bekayokufika phezulu esongweni lokuthoma. Ngilokho okufuze ukwenze kiwo womabili ukwenzela bona abe ziinsika ezimbili zemakhoneni. 25 Kuzokuba namafremu abunane neensekelo zawo zesiliva ezili-16, iinsekelo ezimbili zizokuba ngaphasi kwefremu yinye.

26 “Uzokwenza iinqabo ngomuthi womunga, iinqabo ezihlanu ezizokuhlanganisa amafremu ngakwelinye ihlangothi lethaberinakeli,+ 27 wenze ezihlanu zamafremu wangehlangothini elinye lethaberinakeli, wenze nezihlanu zamafremu wangemuva kwethaberinakeli ukuya ngetjingalanga. 28 Isiqabo esiphakathi sizokukhamba phakathi kwamafremu emahlangothini amathathu wethaberinakeli.

29 “Uzokwenameka amafremu ngegolide,+ wenze amasongo ngegolide abambe iinqabo begodu wenameke iinqabo ngegolide. 30 Uzokwenza ithaberinakeli ngendlela engikutjengise ngayo entabeni.+

31 “Kufuze wenze irharideni+ ngerhara ehlaza komkayi, ngewulu esipiridzana, ngetjhila elibomvu be nangelineni elisezingeni eliphezulu. Kufuze ulikghabise ngokuthungelela amakherubhi kilo. 32 Uzoliphanyeka phezu kweensika ezine ezenziwe ngomuthi womunga zanamekwa ngegolide. Amawugu walo kufuze kube ngewegolide. Iinsika kufuze zingene emigojaneni emine yeensekelo zesiliva. 33 Uzokuphanyeka irharideni ngaphasi kweenghamelo, ngemva kwalokho ulethe umfaji wobuFakazi+ phakathi kwerharideni. Irharideneli lizokuhlukanisa phakathi kwendawo eCwengileko+ nendawo eCwengeke Khulu.+ 34 Kufuze ubeke isivalo phezu komfaji wobuFakazi endaweni eCwengeke Khulu.

35 “Kufuze ubeke itafula ngale kwerharideni, iqalane nelithi lesibani+ elizabe lingehlangothini langesewula lethaberinakeli, itafula yona kufuze uyibeke ngehlangothini elingetlhagwini. 36 Kufuze wenze irharideni ebungenweni betende, ulenze ngerhara ehlaza komkayi, ngewulu esipiridzana, ngetjhila elibomvu be nangelineni elisezingeni eliphezulu.+ 37 Uzokwenzela irharideni iinsika ezihlanu ngomuthi womunga bewuzinameke ngegolide. Amawugu walo kufuze kube ngewegolide begodu uzozenzela iinsekelo ezihlanu zekhopha.