Hezekiyeli

3 Nje-ke wathi kimi: “Ndodana yomuntu, idla okuphambi kwakho.* Idla umsongo lo, khamba uyokukhuluma nendlu yakwa-Israyeli.”+

2 Nje-ke ngavula umlomami, wangenza ngadla umsongo lo. 3 Waraga wathi kimi: “Ndodana yomuntu, idla umsongo engikunikela wona lo begodu uzalise amathumbakho ngawo.” Nje-ke ngathoma ukuwudla, bewumnandi njengeliju emlonyenami.+

4 Wathi kimi: “Ndodana yomuntu, khamba uye endlini yakwa-Israyeli, ukhulume namezwami kiwo. 5 Ngombana awukathunyelwa ebantwini abakhuluma ilimi elingazwisisekiko namkha abakhuluma ilimi elingaziwako, kodwana uthunyelwe endlini yakwa-Israyeli. 6 Awukathunyelwa ebantwini abanengi abakhuluma ilimi elingazwisisekiko namkha elingaziwako, amezwabo ongawazwisisiko. Nangingakuthumela kibo, bazokulalela.+ 7 Kodwana indlu yakwa-Israyeli angekhe ikulalele, ngombana ayifuni ukungilalela.+ Boke bendlu yakwa-Israyeli banekani neenhloko eziqinileko.+ 8 Qala! Ngenze ubuso bakho baqina njengobuso babo nesiphongo sakho saqina njengeemphongo zabo.+ 9 Ngenze isiphongo sakho saba njengedayimani, saqina ukudlula ilitje eliqinileko.+ Ungabasabi namkha uthuswe bubuso babo,+ ngombana bayindlu ehlubukako.”

10 Waragela phambili wathi kimi: “Ndodana yomuntu afake ehliziyweni begodu alalele woke amezwami engiwakhulume kuwe. 11 Khamba uye hlangana nabadingisiweko ebantwini bekhenu+ bese ukhulume nabo. Uthi kibo, ‘Nakhu iKosi ePhakemeko uJehova ekutjhoko,’ ngitjho nanyana bayalalela namkha abalaleli.”+

12 Ummoya wangiguga+ begodu ngezwa itjhada elikhulu elirarambako ngemva kwami lithi: “Kwanga iphazimulo kaJehova ingadunyiswa endawenakhe.” 13 Bekuzwakala itjhada lamaphiko weembunjwa eziphilako njengombana bewathintana,+ netjhada lamavili ahlanu kwazo+ netjhada lokuraramba okukhulu. 14 Ummoya wangiguga wangithatha, ngakhamba ngimunyu begodu ngisilingekile emmoyenami, ngezwa amandla kaJehova asebenza kimi. 15 Nje-ke ngaya ebantwini abadingisiweko eTele-Abibi, ebebahlala eduze nomlambo iKebari,+ ngahlala la bebahlala khona; bengirarekile,+ ngahlala nabo amalanga alikhomba.

16 Nakuphela amalanga alikhomba, ilizwi lakaJehova leza kimi, lathi:

17 “Ndodana yomuntu, ngikubeke bona ube mlindi endlini yakwa-Israyeli;+ nawuzwa ilizwi eliphuma emlonyenami, kufuze ungiyelelisele bona.+ 18 Lokha nangithi emuntwini okhohlakeleko, ‘Uzokufa nakanjani,’ kodwana ungamyelelisi begodu ubhalelwe kukhuluma bona uyelelise okhohlakeleko ukuthi aphenduke endlelenakhe yokukhohlakala bona ahlale aphila,+ yena uzokufa ngebanga lemitjhaphwakhe ngombana ukhohlakele,+ kodwana iingazi zakhe ngizozibuza kuwe.*+ 19 Kodwana nawumyelelisako okhohlakeleko begodu angatjhuguluki ekukhohlakaleni kwakhe nendlelenakhe yokukhohlakala, yena uzokufela imitjhaphwakhe kodwana wena ngokuqinisekileko uzokusindisa ukuphila kwakho.+ 20 Lokha umuntu olungileko nakatjhiya okulungileko enze okumbi, ngizokubeka isiqabo phambi kwakhe begodu yena uzokufa.+ Nawungakhenge umyelelise, yena uzokufela isono sakhe begodu izinto ezilungileko azenzileko angekhe zikhunjulwe kodwana iingazi zakhe ngizozibuza kuwe.*+ 21 Kodwana nangabe umyelelisile olungileko bona angenzi isono begodu angasenzi, ngokuqinisekileko yena uzokuragela phambili aphila ngombana uyelelisiwe,+ ngokwenza njalo uzabe usindise ukuphila kwakho.”

22 Isandla sakaJehova seza phezu kwami lapho begodu wathi kimi: “Sikima, khamba uye emrhobeni othabaleleko, ngizokukhuluma nawe lapho.” 23 Nje-ke ngasikima ngaya emrhobeni othabaleleko begodu qala! Iphazimulo kaJehova beyilapho,+ njengephazimulo engiyibone hlanu komlambo iKebari+ begodu ngakhothama ngaqalisa ihloko phasi. 24 Nje-ke ummoya wangena kimi, wangenza ngasikima ngajama ngeenyawo zami,+ uZimu wakhuluma nami wathi:

“Khamba, uzivalele ngendlinakho. 25 Nakunguwe ndodana yomuntu, bazokubeka iinrobho kuwe bese bakubophe ngazo bona ungaphumi hlangana nabo. 26 Ngizokwenza ilimu lakho linamathele elwangeni lomlomakho, uzokuba simumu, ungakghoni ukubakhalima ngombana bayindlu ehlubukako. 27 Kuzakuthi nangikhuluma nawe, ngivule umlomakho, kufuze uthi kibo,+ ‘Nakhu iKosi ePhakemeko uJehova ekutjhoko.’ Olalelako, akalalele,+ ongafuni ukulalela angalaleli ngombana bayindlu evukelako.+