Eksodusi

12 UJehova wakhuluma noMosi no-Aroni basenarheni yeGibhide wathi: 2 “Le kuzokuba yinyanga yokuthoma eenyangeni kini, kuzokuba yinyanga yokuthoma eenyangeni zomnyaka.+ 3 Khuluma nayo yoke ihlangano yakwa-Israyeli uthi, ‘Elangeni letjhumi enyangeni le, omunye nomunye kufuze akhethele umndenakhe imvu,+ imvu ngayinye emndenini. 4 Nangabe umndeni mncani bona ungadla imvu yoke, ungabelana nabomakhelwana kuye ngokwesibalo sabantu abalapho. Nanibalako kufuze nithole ukuthi umuntu ngamunye angadla kangangani. 5 Kufuze nikhethe imvu ephile kuhle,+ eduna, enomnyaka munye. Kufuze nikhethe phakathi kwamaramu amancani namkha iimbuzi. 6 Kufuze niyitlhogomele bekube lilanga le-14 enyangeni le,+ umndeni omunye nomunye wakwa-Israyeli kufuze uyihlabe ngamarhwaqela.*+ 7 Kufuze bathathe ezinye zeengazi zayo bazitjhatjhe emagosenini wezindlu abadlela ngakizo, bazitjhatjhe ngemaqadi naphezulu.+

8 “Kufuze badle inyama ngobusukobo.+ Bayibase bayidle noburotho obunganasibiliso+ nemirorho engakaphekwa.+ 9 Ningadli inyama engakaphekwa namkha ephekwe ngamanzi kodwana ibaseni isese nehloko, iinqatha neenredlo. 10 Akukafuzi kube neniyibekako bekube sekuseni kodwana nangabe iyasala bekube sekuseni kufuze niyitjhise.+ 11 Nasi indlela ekufuze niyidle ngayo, nibophe amabhande, nimbathe amapatlagwana, niphathe namadondolo. Kufuze niyidle burhaba. LiPhasika lakaJehova. 12 Ngizokudlula enarheni yeGibhide ngobusukobo ngibulale woke amazibulo wenarheni yeGibhide, ukusuka emuntwini ukuya esilwaneni+ begodu ngizokwahlulela boke abozimu beGibhide.+ NginguJehova. 13 Iingazi zizokuba litshwayo ngeendlini eningakizo, ngizokubona iingazi ngidlule begodu isibetho engizokumadlha ngaso amaGibhide angeze sinehlele.+

14 “‘Ilangeli kufuze kube sikhumbuzo kini kufuze niligidinge kube mnyanya kaJehova eenzukulwaneni zenu zoke. Kufuze kube mthetho wasafuthi ukuligidinga. 15 Kufuze nidle uburotho obunganasibiliso amalanga alikhomba.+ Elangeni lokuthoma kufuze nisuse ihlama enesibiliso ngeendlini zenu ngombana nanyana ngubani odla okunesibiliso kusukela elangeni lokuthoma ukuya elangeni lekhomba umuntu loyo kufuze abulawe kwa-Israyeli. 16 Elangeni lokuthoma kufuze nibe nomhlangano ocwengileko, nangelanga lekhomba kufuze nibe nomunye godu umhlangano ocwengileko. Ngamalanga la akunamsebenzi okufuze wenziwe+ kodwana ningenza ukudla, kube kukudla enizokudla nje kwaphela.

17 “‘Kufuze nigidinge umNyanya woBurotho obunganaSibiliso+ ngombana namhlanjesi ngizokukhupha amabuthwakho enarheni yeGibhide. Ilangeli kufuze nilikhumbule eenzukulwaneni zenu, kube mthetho wasafuthi. 18 Enyangeni yokuthoma elangeni le-14 ntambama kufuze nidle uburotho obunganasibiliso bekube lilanga lama-21 ntambama.+ 19 Akunahlama enesibiliso ekufuze ifumaneke ngeendlini zenu emalangeni alikhomba ngombana nanyana ngubani odla okunesibiliso, kungaba mumuntu ovela kwenye inarha namkha umIsrayeli+ umuntu loyo kufuze abulawe kwa-Israyeli.+ 20 Akukafuzi nidle okunesibiliso. Eendlini zenu kufuze nidle uburotho obunganasibiliso.’”

21 UMosi warhaba wabiza boke abadala bakwa-Israyeli+ wathi kibo: “Khambani nikhethele imindenenu iinlwanyana benizihlabe nenze ngazo umhlatjelo wePhasika. 22 Kufuze nifake isitjalo sehisopi* eengazini ezingesitjeni, ngemva kwalokho nitjhatjhe igoseni ngemaqadi naphezulu, akekho namunye wenu okufuze aphume ngendlinakhe bekube sekuseni. 23 UJehova nakadlulako bona abethe amaGibhide ngesibetho uzokubona iingazi ngemaqadi naphezulu kwegoseni begodu uJehova uzoyidlula indlu leyo, angeze avumele isibetho esibulalako singene eendlini zenu.+

24 “Nina namadodanenu kufuze nilalele iinqophiswezi ngokungapheliko.+ 25 Nanifika enarheni uJehova azoninikela yona njengombana athembisile, kufuze nigidinge umnyanya lo.+ 26 Amadodanenu nakanibuzako athi, ‘Umnyanya lo ngowani?’+ 27 Kufuze nithi kiwo, ‘Mhlatjelo wePhasika owenzelwa uJehova, owadlula eendlini zama-Israyeli eGibhide lokha nakabetha amaGibhide ngesibetho kodwana wasindisa izindlu zethu.’”

Yeke abantu baguqa bahloma iinhloko phasi. 28 Ama-Israyeli akhamba enza njengombana uJehova ayale uMosi no-Aroni.+ Enza njalo.

29 Kwathi kuphakathi nobusuku uJehova wabulala woke amazibulo weGibhide,+ kusukela ezibulweni lakaFaro umbusi ukuyokufikela ezibulweni lesithunjwa ebesisejele nawo woke amazibulo weenlwana.+ 30 UFaro neensebenzi zakhe zoke namaGibhide woke bavuka ebusukobo begodu bekunesililo esikhulu hlangana namaGibhide ngombana bekunganandlu lapha kunganasidumbu khona.+ 31 Khona ebusukokho uFaro wabiza uMosi no-Aroni+ wathi kibo: “Khambani hlangana nabantu bami, nina nama-Israyeli amanye. Khambani niyokulotjha uJehova njengombana nitjhwile.+ 32 Thathani izimvu zenu, iimbuzi neenkomo zenu nikhambe njengombana nitjhwile+ kodwana kufuze ningibusise.”

33 AmaGibhide ancenga ama-Israyeli bona akhambe msinyana+ enarheni athi, “Naningakhambiko, soke nje sizokufa!”+ 34 Nje-ke abantu bathatha ihlamabo ngaphambi kobana ibile ngeenkotlelweni ekubhicelwa kizo baziphuthela ngezambatho zabo bathwala emahlombe. 35 Ama-Israyeli enza njengombana uMosi awatjelile, abawa amaGibhide bona awaphe izinto zokuzikghabisa zesiliva nezegolide kunye nezambatho.+ 36 UJehova wenza bona amaGibhide abe nomusa kuma-Israyeli kangangokuthi abanikela koke akubawako. Ama-Israyeli athathela amaGibhide izinto zawo.+

37 Nje-ke ama-Israyeli asuka eRamasese+ aya eSukothi,+ bekumadoda angaba zii-600 000 akhamba ngeenyawo ngaphandle kwabantwana.+ 38 Isiqubuthu sabantu bayo yoke imihlobo+ sakhamba nawo kunye neenkomo, izimvu neembuzi, kwaba yifuyo enengi khulu. 39 Athoma ukubhaga uburotho oburondo obunganasibiliso ngehlama eze nayo eGibhide, bebunganasibiliso ngombana aqothwa eGibhide msinyana angakazilungiseleli into azoyidla endleleni.+

40 Ngesikhathi ama-Israyeli asuka eGibhide+ besele ahlezi iminyaka ema-430+ enarheni ekungasiyo yawo. 41 Ekupheleni kweminyaka ema-430 ngalo lona ilangeli amabutho kaJehova asuka enarheni yeGibhide. 42 Busuku okufuze bagidinge ngabo ukuthi uJehova ubakhuphe enarheni yeGibhide. Ubusukobu kufuze bugidingwe ngiwo woke ama-Israyeli kufikela eenzukulwaneni zawo bona ahloniphe uJehova.+

43 Nje-ke uJehova wathi kuMosi no-Aroni, “Nakhu umthetho wePhasika: Akunamuntu ovela kwenye inarha okufuze alidle.+ 44 Nangabe umuntu unesigqila asithenge ngemali kufuze asisoke.+ Kungemva kwalokho kwaphela singadla iPhasika. 45 Umuntu ovela kwenye inarha nesisebenzi esiqatjhiweko akukafuzi balidle. 46 Kufuze lidlelwe ngendlini yinye. Akukafuzi nikhuphele inyama ngaphandle kwendlu, akukafuzi niphule nalinye lamathambayo.+ 47 Yoke ihlangano yama-Israyeli kufuze iligidinge. 48 Nangabe kunomuntu ovela kwenye inarha hlangana nani begodu ufuna ukugidinga iPhasika lakaJehova kufuze asoke boke abaduna abasemzinakhe. Ngemva kwalokho angagidinga iPhasika begodu uzokuba njengomIsrayeli kodwana umuntu ongakasokwa akukafuzi adle iPhasika.+ 49 Kuzokusebenza umthetho munye kumIsrayeli nemuntwini ovela kwenye inarha ohlala hlangana nani.”+

50 Nje-ke woke ama-Israyeli enza njengombana uJehova ayale uMosi no-Aroni. Enza njalo. 51 Ngalo lona ilangeli, uJehova wakhupha ama-Israyeli namabuthwawo enarheni yeGibhide.