Amosi
3 “Yizwani ilizwi uJehova alikhuluma malungana nani, nina bantu bakwa-Israyeli, malungana nesitjhaba soke engasikhupha enarheni yeGibhide.
2 ‘Hlangana nazo zoke iintjhaba ezisephasini,+
Ngini nodwa enganikhetha, kungebangelo ngizonenza niziphendulele ngemitjhaphwenu.+
3 Kghani abantu ababili bangakhamba ndawonye bangakavumelani?
4 Kghani ibhubezi lingabhodla emmangweni kungananyamazana elingayibamba?
Kghani ibhubezana lingabhodla endawenalo lingakabambi litho?
5 Kghani inyoni ingawela esithiyweni singakabekwa?
Kghani isithiyo singavalwa singakabambi litho?
6 Nakulila iphondo edorobheni, kghani abantu abarhidlwa na livalo?
Nakuba nehlekelele edorobheni, akusinguJehova oyibangeleko?
7 Ngombana iKosi ePhakemeko uJehova angeze yenze litho
Ingakembuli ifihlwayo eencekwini zayo abaphorofidi.+
8 Ibhubezi libhodlile!+ Ngubani ongakhenge athukwe?
IKosi ePhakemeko uJehova ikhulumile! Ngubani ongekhe aphorofide?+
9 Memezelani nakhu emibhotjhongweni evikelekileko ye-Atjhidodi
Nemibhotjhongweni evikelekileko yenarheni yeGibhide.
Nithi: “Hlanganani ndawonye nijamelane neentaba zeSamariya,+
Qalani nibone irawurawu ephakathi kwayo
Nokudlelezela okukiyo.+
10 Ngombana abakwazi ukwenza okulungileko,” kutjho uJehova,
“Bazalisa imibhotjhongwabo ngezinto ezinengi abazifumene ngenturhu.”’
11 Nakhu iKosi ePhakemeko uJehova ekutjhoko,
‘Inaba lizokubhoda inarha,+
Liyiqede amandla,
Begodu lizokuthathela koke onakho emibhotjhongwenakho.’+
12 Nakhu uJehova akutjhoko,
Njengalokha umelusi ahluthula imilenze emibili namkha isiquntwana sendlebe emlonyeni webhubezi,
Bazokuhluthulwa njalo abantu bakwa-Israyeli,
Labo nje abahlala eSamariya, emibhedeni kanokutjho nemasofeni amahle.*+
13 ‘Yizwa bese uyelelise indlu* kaJakopo,’ kutjho iKosi ePhakemeko uJehova uZimu wamabutho.
14 ‘Ngelanga engizokuthwesa ngalo u-Israyeli umlandu ngebanga lokuvukela kwakhe,*+
Ngizomthwesa umlandu ngokujamelene nama-aldara weBetheli,+
Iimpondo ze-aldara zizokuquntwa ziwele ephasini.+
15 Ngizokugiriza indlu yebusika nendlu yehlobo.’