Yesibili YeenKronike
2 Nje-ke uSolomoni wakhupha umyalo wokobana kwakhelwe igama lakaJehova indlu,+ kwakhelwe nombuswakhe indlu.*+ 2 USolomoni wakhetha amadoda azii-70 000 bona abe bathwali bemithwalo, amadoda azii-80 000 bona abe basiki bamatje eentabeni+ nabazii-3 600 bona babengamele.+ 3 Ngaphezu kwalokho, uSolomoni wathumela ilizwi kuRhiramu+ ikosi yeTirosi wathi: “Ngendlela owenza ngayo kuDavida ubaba lokha nawumthumela iingodo zomsedari bona akhe indlu* azokuhlala kiyo, yenza njalo nakimi.+ 4 Nje-ke ngakhela igama lakaJehova uZimami indlu bona ngiyicwengise kuye, ngitjhise ipepho enuka kamnandi+ phambi kwakhe, nginikele qobe ngoburotho+ obubekwa ngamalarha* neminikelo etjhiswako,+ ekuseni nantambama,+ ngamaSabatha,+ ngokuthwasa kweenyanga nangeenkhathi zeminyanya+ kaJehova uZimethu. Lesi sibopho esingapheliko saka-Israyeli. 5 Indlu engizoyakha izokuba yikulu ngombana uZimethu mkhulu kunabo boke abanye abozimu. 6 Ngubani ongakghona ukumakhela indlu? Ngombana izulu nezulu lezulu alikghoni ukumthwala,+ nje-ke ngingubani mina bona ngingamakhela indlu ngaphandle kwendlu eyindawo yokuthunyisa imihlatjelo phambi kwakhe? 7 Yeke ngibawa ungithumele isisebenzi sobukghwari esinekghono lokusebenza ngegolide, isiliva, ikhopha,+ isimbi, iwulu esipiridzana, iwulu etleberede nerhara ehlaza komkayi begodu esazi ukwenza umgwalogobhodlha. Sizokusebenza kwaJuda neJerusalema, sisebenze neensebenzi zami zobukghwari ezinekghono, lezo ezakhethwa ngubaba uDavida.+ 8 Ungithumele neengodo zomsedari,+ zomjunipha nezom-almugi+ ezivela eLibhanoni ngombana ngazi kuhle ukuthi iinsebenzi zakho zinelemuko lokugawula imithi yeLibhanoni.+ Iinsebenzi zami zizokusebenza neensebenzi zakho+ 9 bona zingilungiselele iingodo ezinengi ngombana indlu engizoyakha izokuba yikulu ngokubabazekako. 10 Nje-ke qala! Ngizokuthumela iinsebenzi zakho ukudla,+ abasiki beengodo abagawula imithi: Amakhori wekoroyi azii-20 000, amakhori webhali azii-20 000, iimbhada zewayini ezizii-20 000 neembhada zamafutha ezizii-20 000.”
11 Khonokho uRhiramu ikosi yeTirosi watlolela uSolomoni umlayezo othi: “Ngebanga lokuthi uJehova uthanda abantu bakhe, ukwenze waba yikosabo.” 12 URhiramu godu wathi: “Kwanga uJehova uZimu ka-Israyeli angadunyiswa, owenza izulu nephasi ngombana uphe iKosi uDavida indodana ehlakaniphileko,+ enelemuko nezwisisako,+ ezokwakhela uJehova indlu, yakhe nendlu yombuswayo. 13 Nje-ke ngikuthumela uRhiramu-abhi,+ osisebenzi sobukghwari esinekghono, osisazi, 14 oyindodana yomfazi wakwaDani kodwana uyise uyindoda yeTirosi; unelemuko ekusebenzeni ngegolide, isiliva, ikhopha, isimbi, amatje, iingodo, iwulu esipiridzana, irhara ehlaza komkayi, itjhila lezinga eliphezulu netjhila elitlerebede.+ Ukghona ukwenza yoke imihlobo yokugwala ngokugobhodlha enze nanyana ngimuphi umtlamo anikelwa wona.+ Uzokusebenza neensebenzi zakho zobukghwari ezinekghono, kunye neensebenzi zobukghwari ezinekghono zekosami uDavida uyihlo. 15 Nje-ke ikosami ingathumela ikoroyi, ibhali, amafutha newayini njengombana ithembise iinsebenzi zayo.+ 16 Thina sizokugawula imithi yeLibhanoni,+ eminengi ngendlela oyitlhoga ngayo, sizoyithumela kuwe iziinyanda ngokuyithayisa elwandle iye eJopha;+ wena uzoyithatha uyise eJerusalema.”+
17 Ngemva kwalokho, uSolomoni wabala woke amadoda ebewangasi ngewenarheni yakwa-Israyeli,+ ngemva kokubalwa okwenziwa nguDavida uyise,+ bebazii-153 600. 18 Nje-ke wabela abazii-70 000 hlangana nabo bona babe bathwali bemithwalo, abazii-80 000 bona babe basiki bamatje+ eentabeni nabazii-3 600 bona bangamele abantu abasebenzako.+