Yokuthoma YeenKronike

11 Ngokukhamba kwesikhathi woke ama-Israyeli abuthanela kuDavida eRhebroni+ athi: “Qala! Silithambo lakho nenyamakho.*+ 2 Esikhathini esidlulileko lokha uSawula ayikosi, nguwe ebewudosa phambili ama-Israyeli emajimenawo.+ UJehova uZimakho wathi kuwe: ‘Uzokwalusa abantu bami u-Israyeli begodu uzokuba mdosiphambili wabantu bami u-Israyeli.’”+ 3 Nje-ke boke abadala bakwa-Israyeli beza ekosini eRhebroni begodu uDavida wenza isivumelwano nabo eRhebroni phambi kwakaJehova. Ngemva kwalokho bazesa uDavida bona abe yikosi kwa-Israyeli+ ngokuvumelana nelizwi lakaJehova eleza ngoSamyela.+

4 Ngokukhamba kwesikhathi, uDavida nawo woke ama-Israyeli baya eJerusalema, okuyiJebusi,+ lapho ebekuhlala khona amaJebusi.+ 5 Izakhamuzi zeJebusi zanyefula uDavida zathi: “Angeze wangena la!”+ Nanyana kunjalo, uDavida wathumba isiphephelo seZiyoni,+ okuliDorobho lakaDavida nje.+ 6 Nje-ke uDavida wathi: “Nanyana ngubani ozokusahlela amaJebusi qangi uzokuba yinduna nekosana.” UJowabi+ indodana kaTseruya wakhuphuka qangi begodu waba yinduna. 7 Ngemva kwalokho, uDavida wahlala endaweni yesiphephelo. Kungebangelo-ke bayibiza ngokobana liDorobho lakaDavida. 8 Wathoma ukwakha idorobho magega nayo, kusukela eNdundumeni* kuya eendaweni eziyibhodileko begodu uJowabi wavuselela ingcenye eseleko yedorobho. 9 Yeke uDavida waba namandla khulu+ begodu uJehova wamabutho bekanaye.

10 Nje-ke lezi ziinhloko zeengorho zakaDavida, ezamsekela khulu ebukhosini bakhe, kuhlanganise no-Israyeli woke bona bamenze ikosi ngokuvumelana nelizwi lakaJehova malungana no-Israyeli.+ 11 Leli lirhelo leengorho zakaDavida: UYatjhobiyamu+ indodana yomRhakimoni, ihloko yabathathu.+ Wabulala abangaphezu kwama-300 ngomkhontwakhe ngesikhathi sinye.+ 12 Bekalandelwa ngu-Elazara+ indodana kaDodo um-Arhorhi.+ U-Elazara bekangomunye weengorho ezintathu. 13 BekanoDavida ePasi-Damimi,+ lapho amaFilista ahlangana khona bona azokulwa. Nje-ke bekunesimu ezele ibhali begodu abantu babaleka ngebanga lamaFilista. 14 Kodwana yena wajama phakathi kwesimu leyo wayivikela, wasolo arhayila amaFilista, ngalokho uJehova waletha ipumelelo* ekulu.+

15 Abarholi abathathu kwabama-30 behlela edwaleni kuDavida erholweni le-Adulamu,+ kukulapho ibutho lamaFilista belihlome ikampa emRhobeni weRafa.+ 16 Ngesikhatheso uDavida bekasendaweni evikelekileko begodu amasotja wamaFilista bewahlome ikampa eBhetlehema. 17 Ngemva kwalokho, uDavida wathi: “Ngingathaba kangangani nangingasela amanzi womthombo ohlanu kwesango leBhetlehema!”+ 18 Ngalokho abathathu bangena ngekani ngekampeni yamaFilista, bakha amanzi emthonjeni ongesangweni leBhetlehema, bazowanikela uDavida kodwana uDavida akhenge avume ukuwasela, wawakghuthula phambi kwakaJehova. 19 Wathi: “Akucabangeki bona ngingenza into le ngombana ngisaba uZimami! Kghani kufuze ngisele iingazi zamadoda la afake ukuphila kwawo engozini?+ Ngombana alethe amanzi la ngokufaka ukuphila kwawo engozini.” Yeke wala ukuwasela. Lezi zizinto ezenziwe ziingorho zakhe ezintathu.

20 U-Abitjhayi+ umfowabo kaJowabi+ waba yihloko yabanye abathathu; wabulala abangaphezu kwama-300 ngomkhontwakhe begodu bekadume njengalaba abathathu.+ 21 Kilaba abanye abathathu, bekahlonipheke khulu ukudlula ababili begodu bekayindunabo kodwana akhenge afike esikhundleni sabathathu bokuthoma.

22 UBhenaya+ indodana kaJehoyada bekayingorho enesibindi eyenza izinto ezinengi eKhabitsiyeli.+ Warhayila amadodana amabili ka-Ariyeli wakwaMowabi begodu wehlela emthonjeni, mhlana kukhithika igabhogo wabulala ibhubezi.+ 23 Wabulala nendoda yeGibhide ebeyiyikulu ngendlela erarako, imakhubhithi amahlanu ubude.+ Ngitjho nanyana umGibhide loyo bekaphethe umkhonto onjengesigodo sabaluki,+ walwa naye aphethe intonga begodu wahluthula umkhonto esandleni somGibhide bewambulala ngomkhontwakhe loyo.+ 24 Lezi zizinto ezenziwa nguBhenaya indodana kaJehoyada begodu bekadume njengeengorho ezintathu. 25 Ngitjho nanyana bekahlonipheke ukudlula abamatjhumi amathathu, akhenge afike esikhundleni sabathathu.+ Nanyana kunjalo, uDavida wambeka bona aphathe abonogada bakhe.

26 Iingorho zebutho lepi bekungu-Asaheli+ umfowabo kaJowabi, u-Elirhanana indodana kaDodo weBhetlehema,+ 27 uTjhamothi umHarori, uRheletsi umPeloni, 28 u-Ira+ indodana ka-Ikhetjhi umTekhowa, u-Abiyezeri+ umAnatothi, 29 uSibekayi+ umRhutjha, u-Ilayi umArhorhi, 30 uMaharayi+ umNethofa, uRheledi+ indodana kaBhana umNethofa, 31 u-Itayi indodana kaRibayi weGibeya yamaBhenjamini,+ uBhenaya umPiratoni, 32 uRhurayi wemirhobeni yeGatjhi,+ u-Abiyeli umAraba, 33 u-Azimavethi umBharharumu, u-Eliyarhiba umTjhaliboni, 34 amadodana kaHatjhemu umGizoni, uJonathani indodana kaTjhage umHarari, 35 u-Arhiyamu indodana kaSakari umHarari, u-Elifali indodana ka-Uri, 36 uRheferi umMekera, u-Arhiya umPeloni, 37 uRhetsiro umKarameli, uNarayi indodana ka-Ezibhayi, 38 uJuweli umfowabo kaNathani, uMibirhari indodana kaHagiri, 39 uTselekhi umAmoni, uNarharayi umBherothi, umphathinkhali kaJowabi indodana kaTseruya; 40 u-Ira umJiteri, uGarebi umJiteri, 41 u-Uriya+ umRhiti, uZabadi indodana ka-Arhilayi, 42 u-Adina indodana kaTjhiza umRubeni, ihloko yabantu bakwaRubeni, bekakunye nabama-30; 43 uRhanani indodana kaMaka, uJotjhafathi umMitini, 44 u-Uziya umAtjhitarothi, uTjhama noJehiyeli, amadodana kaRhotamu umAroweri; 45 uJediyeli indodana kaTjhimri nomfowabo uJorha umTitsi; 46 u-Eliyeli umMarhavi, uJeribhayi noJotjhaviya amadodana ka-Elinamu noJitima umMowabi; 47 u-Eliyeli, u-Obede noJasiyeli umTsoba.