Joromiya
46 Leli lilizwi lakaJehova eliya kuJoromiya umphorofidi malungana neentjhaba:+ 2 Lo mlayezo omalungana neGibhide+ nebutho lakaFaro Nekho+ ikosi yeGibhide, obekamagega noMlambo weYufrathe begodu wahlulwa yiKosi yeBhabhiloni uNebukadinetsari* eKarikemitjhi ngomnyaka wesine kaJehoyakhimu+ indodana kaJosiya, ikosi yakwaJuda:
3 Lungiselela iimviko ezincani* nezikulu,
Utjhinge epini.
4 Bophelani iinjomani nizikhwele, nina bakhweli beenjomani.
Zilungiseleleni, nimbathe iinkoporo zenu.
Lolani imikhontwenu nimbathe izambatho zepi.
5 ‘Kubayini ngibabona babetjhwa livalo?
Bayahlehla, iingorho zabo zihluliwe.
Babalekile ngebanga lokuthukwa, iingorho zabo akhenge ziqale emuva.
Kunokusaba yoke indawo,’ kutjho uJehova.
6 ‘Abanabelo abakghoni ukubaleka neengorho azikghoni ukuphunyurha.
Etlhagwini magega noMlambo weYufrathe
Bakhutjiwe bawa.’+
7 Ngubani oza njengoMlambo weNayili,
Njengemilambo enamanzi amanengi?
8 IGibhide iza njengoMlambo weNayili,+
Njengemilambo enamanzi amanengi,
Begodu ithi, ‘Ngizokukhuphuka ngigubuzese iphasi.
Ngizokutjhabalalisa idorobho nabahlala kilo.’
9 Khuphukani, nina njomani!
Gijimani ngathi niyahlanya, nina nkarana!
10 “Ilangelo ngeleKosi ePhakemeko, uJehova wamabutho, lilanga lokuziphindiselela bekazibuyiselele emanabenakhe. Isabula izokurhiribidela izozanelisa begodu izisuthise ngeengazi zawo ngombana iKosi ePhakemeko, uJehova wamabutho, unomhlatjelo enarheni yetlhagwini hlanu koMlambo weYufrathe.+
11 Khuphukela eGiliyadi bona ufumane ibhalisamu,+
Maye! Ntombi yeGibhide!
Ngombana wandise imitjhogakho ngelize,
Ngombana akunandlela ongalapheka ngayo.+
12 Iintjhaba zizwe ngehlazo lakho,+
Begodu isililo sakho sizele enarheni.
Ngombana iingorho ziyawisana,
Begodu zombili ziyawa.”
13 Leli lilizwi uJehova alikhulume kuJoromiya umphorofidi malungana nokuza kweKosi yeBhabhiloni uNebukadinetsari* bona isahlele inarha yeGibhide:+
14 “Bikezela ngakho eGibhide, memezela ngakho eMigidoli.+
Memezela ngakho eNofi* neTarhipanirhesi+
Uthi, ‘Hloma, uzilungiselele,
Ngombana isabula izokurhayila boke abahlangana nawe.
15 Kubayini amasotjakho anamandla athanyeliwe?
Akhenge akghone ukuzilwela,
Ngombana uJehova uwahlulile.
16 Ngesibalo esikhulu bayakhubeka begodu bayawa.
Bathi komunye nomunye:
“Sikimani! Asibuyeleni ebantwini bethu nenarhenethu
Ngebanga lesabula enelunya.”’
17 Lapho bamemezela ukuthi,
‘UFaro ikosi yeGibhide wenza itjhada elingatjho litho
Uvumele kuphundwa lithuba.+
18 ‘Nangisaphilako,’ kutjho iKosi, igama layo nguJehova wamabutho,
‘Uzokuza* eTabori+ hlangana neentaba
nanjengeKarameli+ eduze nelwandle.
19 Lungiselela umthwalwakho bona uye ekudingisweni,
Maye! Ndodakazi esisakhamuzi seGibhide!
20 IGibhide injengethokazana elihle,
Kodwana abonompopoloza bazokuza bayisahlele bavela etlhagwini.
21 Ngitjho namasotjayo aqatjhiweko aphakathi kwayo afana namakonyana anonisiweko,
Kodwana nawo ajikile begodu abaleka woke.
22 ‘Itjhada layo linjengelenyoka etjhitjhizako,
Ngombana beza kiyo ngamandla nangamazembe,
Njengamadoda agawula imithi.
23 Bazokugawula ihlathi layo,’ kutjho uJehova, ‘nanyana libonakala lingangeneki.
Ngombana banengi ukudlula iintethe, engekhe zibalwe.
24 Indodakazi yeGibhide izokuphathiswa iinhloni.
Izokunikelwa ebantwini betlhagwini.’+
25 UJehova wamabutho, uZimu ka-Israyeli, uthi: ‘Nje ngijezisa u-Amoni+ ovela eNo,*+ kuFaro, eGibhide, kibozimu bakhe+ nemakhosinakhe, iye kuFaro nabo boke abathembela kuye.’+
26 “‘Ngizobanikela kilabo abafuna ukubabulala, ekosini uNebukadinetsari* yeBhabhiloni+ neensebenzini zakhe. Ngemva kwalokho kuzokuba nabantu abahlala kiyo njengeenkhathini zakade,’ kutjho uJehova.+
27 ‘Kodwana wena, ungasabi, ncekwami Jakopo,
Ungathukwa, wena Israyeli.+
Ngizokusindisa ukude
Nesizukulwana sakho esisenarheni esithunjelwe kiyo.+
UJakopo uzokubuya ngokuthula begodu angathikaziseki,
Kungabi nomuntu omthusako.+
28 Nje-ke ungasabi, ncekwami Jakopo,’ kutjho uJehova, ‘ngombana nginawe.