USamyela Wesibili

20 Nje-ke bekunendoda ephehla inturhu ebekuthiwa nguTjheba+ indodana kaBhikiri,+ umBhenjamini. Wavuthela iphondo wathi: “Asinasabelo kuDavida begodu asinalifa endodaneni kaJese.+ Maye! Israyeli+ omunye nomunye akabuyele kibozimu bakhe.”* 2 Ngalokho woke amadoda wakwa-Israyeli alisa ukulandela uDavida, alandela uTjheba indodana kaBhikiri;+ kodwana amadoda wakwaJuda anamathela ekosinawo, kusukela eJordani bekuyokufika eJerusalema.+

3 Lokha uDavida nakafika emzinakhe* eJerusalema,+ ikosi yathatha amakhohlo alitjhumi ebeyiwatjhiye emva bona atlhogomele indlu,+ yawafaka endlini egadiweko. Beyiwanikela ukudla kodwana akhenge iye nawo emabhayini.+ Ahlala avalelwe bekwaba lilanga ahlongakala ngalo, bekaphila njengabahlolokazi, ngitjho nanyana bewanendoda ephilako.

4 Nje-ke ikosi yathi ku-Amasa:+ “Biza amadoda wakwaJuda bona eze kimi emalangeni amathathu nawe kufuze ube khona.” 5 Ngalokho u-Amasa wakhamba wayokubiza uJuda kodwana yena wafika ngemva kwesikhathi abekelwe sona. 6 Ngemva kwalokho, uDavida wathi ku-Abitjhayi:+ “UTjheba+ indodana kaBhikiri angaba yingozi khulu kithi ukudlula u-Absalomu.+ Thatha iinsebenzi zekosakho nimgijimise bona angafumani amadorobho avikelekileko bekaphunyurhe kithi.” 7 Yeke abantu bakaJowabi,+ amaKereti, amaPeleti+ nawo woke amadoda anamandla bamgijimisa; baphuma eJerusalema bona bayokugijimisa uTjheba indodana kaBhikiri. 8 Kwathi nabaseduze nelitje elikhulu eGibiyoni,+ u-Amasa+ weza azobahlangabeza. UJowabi bekambethe izambatho zakhe zepi, isabulakhe beyingemgodlenayo ayibophele edinini. Nakatjhidela phambili, isabula yawa.

9 UJowabi wathi ku-Amasa: “Koke kukhamba kuhle na mfowethu?” Ngemva kwalokho, uJowabi wabamba iindevu zaka-Amasa ngesandla sakhe sokudla, wenza ngasuthi uyammanga. 10 U-Amasa akhenge ayitjheje isabula ebeyisesandleni sakaJowabi, uJowabi wamhlaba ngayo emathunjini+ begodu amathumbakhe aphalakela phasi. Akhenge atlhoge ukumhlaba godu, ukumhlaba kanye bekwanele bona ambulale. Yeke uJowabi nomfowabo u-Abitjhayi bagijimisa uTjheba indodana kaBhikiri.

11 Elinye lamasokana kaJowabi lajama eqadi kwakhe begodu belithi: “Nanyana ngubani ongehlangothini lakaJowabi begodu nanyana ngubani ongewakaDavida akalandele uJowabi!” 12 Ngesikhatheso u-Amasa bekabhudabhudeka eengazini zakhe phakathi kwendlela. Lokha isokaneli nalilemuka bona woke umuntu bekajama, lasusa u-Amasa endleleni lamusa emmangweni. Ngemva kwalokho, laphosa isambatho phezu kwakhe ngombana labona ukuthi woke umuntu bekajama nakafika kuye. 13 Ngemva kokuthi limsuse endleleni, woke amadoda alandela uJowabi ekugijimiseni uTjheba+ indodana kaBhikiri.

14 UTjheba wadlula hlangana nazo zoke iinkoro zakwa-Israyeli, bewayokufika e-Abela yeBhethe-Mahakha.+ AmaBhikiri ahlangana ndawonye begodu amgijimisa.

15 UJowabi nabantu bakhe beza, bamvimbezela e-Abela yeBhethe-Mahakha begodu bakha indunduma yokuvimbezela magega nedorobho njengombana belijame phakathi kombundu. Boke abantu bakaJowabi bebemba iboda bona baliwise. 16 Umfazi ohlakaniphileko warhuwelela angedorobheni wathi: “Lalelani, madoda, lalelani! Ngibawa nithi kuJowabi, ‘Yizapha, ngikhulume nawe.’” 17 Yeke watjhidela kuye, umfazi wathi kuye: “UnguJowabi na?” Wamphendula wathi: “Nginguye.” Umfazi wathi: “Lalela amezwi wesisebenzi sakho.” Yena wathi: “Ngilalele.” 18 Waraga wathi: “Ekadeni bebajayele ukuthi, ‘Ababuze e-Abela begodu lokho bekuba kuphela kwendaba.’ 19 Ngijamele abanokuthula nabathembekileko bakwa-Israyeli. Wena ufuna ukutjhabalalisa idorobho elinjengomma kwa-Israyeli. Kubayini kufuze utjhabalalise* ilifa lakaJehova?”+ 20 UJowabi waphendula wathi: “Yinto engacabangekiko leyo ngami bona ngingalitjhabalalisa. 21 Akusinjalo nakancani. Kunalokho, indoda ekuthiwa nguTjheba+ indodana kaBhikiri yesifundeni seentaba zakwa-Efrayimu+ ivukele iKosi uDavida. Naninganginikela indoda le, ngizokukhamba edorobheni.” Yeke umfazi lo wathi kuJowabi: “Qala! Uzokuphoselwa ihlokwakhe ngehla kweboda!”

22 Khonokho, umfazi ohlakaniphileko waya kibo boke abantu, baqunta ihloko kaTjheba indodana kaBhikiri bayiphosela uJowabi. Ngalokho, uJowabi wavuthela iphondo begodu baphadlhalala edorobheni, omunye nomunye waya emzinakhe;+ uJowabi wabuyela eJerusalema ekosini.

23 Nje-ke uJowabi bekamphathi walo loke ibutho lakwa-Israyeli;+ uBhenaya+ indodana kaJehoyada+ bekamphathi wamaKereti namaPeleti.+ 24 U-Adoniramu+ bekamphathi walabo abakatelelwe bona basebenzele ikosi; uJehotjhafathi+ indodana ka-Arhiludi bekamtloli wezenzakalo. 25 UTjheva bekangunobhala; uTsadokhi+ no-Abhiyathari+ bebabaphristi. 26 U-Ira umJayire waba yikosana* kaDavida.