Isaya
14 Ngombana uJehova uzokurhawukela uJakopo+ begodu uzokukhetha ama-Israyeli godu.+ Uzowahlalisa enarhenawo+ bese izakhamuzi zawo ezibabantu abavela kwezinye iinarha zizokuhlala nawo begodu zizokunamathela endlini kaJakopo.+ 2 Abantu bezinye iintjhaba bazowathatha bawase endawenawo begodu indlu ka-Israyeli izobenza iinsebenzi eziduna nezisikazi+ enarheni kaJehova; azokuthumba labo egade bawathumbile begodu azokuthobisa labo egade bawakatelela bona asebenze.
3 Ngelanga uJehova akuphumuza ngalo ebuhlungwini bakho, ekutshwenyekeni kwakho nekugqilazweni ebewuthweswe khona,+ 4 uzokutjho isagesi ngokujamelene nekosi yeBhabhiloni:
“Qala! Indlela aphele ngayo loyo okatelela abanye bona basebenze!
Qala! Indlela ukugandeleleka okuphele ngayo!+
5 UJehova uphule iswazi labakhohlakeleko,
Intonga yababusi,+
6 Loyo ngokusilingeka obetha iintjhaba ngeembetho ezingapheliko,+
Loyo ngokusilingeka ohlula iintjhaba ngokuhlunguphaza okungapheliko.+
7 Iphasi loke liyaphumula, alisanakho ukuthikanyezwa.
Abantu barhuwelela ngethabo.+
8 Ngitjho nemithi yomjunipha iyathaba ngawe,
Kuhlanganise nemithi yomsedari yeLibhanoni.
Ithi, ‘Soloko wawako,
Umsiki weengodo akasezi kithi bona azosigawula.’
9 Ngitjho neThuna* ngaphasi liyasikinyeka
Bona lizokuhlangana nawe.
Ngebanga lakho, livusa labo abanganamandla ekufeni,
Boke ababusi abagandelelako bephasi.
Lenza woke amakhosi weentjhaba asikime eenhlalweni zawo zobukhosi.
10 Boke bayakhuluma bathi kuwe,
‘Sewubogaboga njengathi?
Sewufana nathi?
11 Ukuzikhakhazisa kwakho kwehliselwe eThuneni*
Itjhada leenliliso zakho zesinara.+
Iimpethu zendlalwe ngaphasi kwakho njengombhede,
Ugutjuzeswe ziimbungu.’
12 Qala indlela owe ngayo ezulwini,
Wena ophazimako, ndodana yokusa!
Qala indlela oquntwe ngayo ephasini,
Wena ohlula iintjhaba!+
13 Uthe ehliziywenakho, ‘Ngizokukhuphukela ezulwini.+
Ngizokuphakamisela isihlalo sami sobukhosi ngaphezu kweenkwekwezi zakaZimu,+
Ngizokuhlala phasi entabeni yokuhlangana,
Eengcenyeni ezikude zetlhagwini.+
14 Ngizokukhamba ngaphezu kwamafu;
Ngizozenza ngifane noPhezukoke.’
15 Kunalokho, uzokwehliselwa phasi eThuneni,*
Eengcenyeni ezikude zepetsi.
16 Labo abakubonako bazokurhudulela amehlo;
Bazokuqalisisa, bathi,
‘Kghani nguye umuntu obekasikinya iphasi lo,
Obekahlengezelisa imibuso,+
17 Owenze iphasi laba njengommango
Watjhabalalisa amadorobhalo,+
Walela iimbotjhwa zakhe bona ziye ekhaya?’+
18 Woke amanye amakhosi weentjhaba,
Iye, woke, alele phasi ngephazimulo,
Enye nenye ethuneni layo.
19 Kodwana wena ulahliwe, awunalo nethuna,
Unjengehlumela elinyenyisako,
Umbathiswe ngababuleweko abahlatjwe ngesabula,
Abehlela emgodini wamatje,
Njengesidumbu esigadangwako.
20 Angeze ubulungwe namakhosi ethuneni,
Ngombana utjhabalalise inarhakho,
Wabulala abantu bakho.
Amagama weenzukulwana zabenzi bokumbi angeze akhunjulwe.
21 Lungiselelani ukurhayila amadodanakhe
Ngebanga lomlandu wabokhokho babo,
Bona bangabi namandla begodu bathathe iphasi
Begodu bazalise inarha ngamadorobhabo.
22 “Ngizobasahlela,”+ kutjho uJehova wamabutho.
“Ngizokusula iBhabhiloni igama, abaseleko, iinzukulwana nabo boke abasazokuba khona,”+ kutjho uJehova.
23 “Begodu ngizolenza indawo yabogubudu nesifunda semidzwela bese ngizolithanyela ngomthanyelo wokutjhabalalisa,”+ kutjho uJehova wamabutho.
24 UJehova wamabutho ufungile wathi:
“Njengombana bengihlosile, kuzokwenzeka,
Nanjengombana bengiquntile, kuzokwenzeka.
25 Ngizokutshidlha umAsiriya enarhenami,
Begodu ngizomgadanga eentabeni zami.+
Ijogi lakhe lizokususwa kibo,
Nomthwalwakhe uzokususwa emahlombabo.”+
26 Ngilokhu okuquntiweko ngokujamelene nalo loke iphasi,
Begodu ngilesi isandla esiluliweko ngokujamelene nazo zoke iintjhaba.
27 UJehova wamabutho uquntile,
Begodu ngubani ongakukhandela lokho?+
Isandla sakhe silulekile,
Ngubani ongasibuyisela emuva?+
28 Ngomnyaka okwahlongakala ngawo iKosi u-Arhazi,+ kwenziwa isimemezelwesi:
29 “Noke nina eFilista, ningathabi,
Ngombana intonga yaloyo onibethako iphuliwe.
Ngombana emrajini wenyoka+ kuzokuphuma inyoka enetjhefu,+
Begodu umntwanayo uzokuba yinyoka ephaphako enomlilo.
30 Abantwana bodududu bazokudla baneliseke
Begodu botlhagako bazokulala ngokuphepha,
Kodwana ngizokubulala abantu bakho ngendlala,
Nabaseleko hlangana nawe bazokubulawa.+
31 Rhahlawula, sango! Rhuwelela, dorobho!
Noke eFilista nizokuphelelwa mamandla!
Ngombana intuthu ivela etlhagwini,
Begodu abekho abasalele emuva ebuthweni lenaba.”
32 Kufuze baziphendule njani iinthunywa zesitjhaba?
Ngokuthi uJehova ubeke isisekelo eZiyoni,+
Begodu abadududu ebantwini bakhe bazokuphephela kiyo.