Eksodusi

29 “Nakhu ekufuze ukwenze bona ubacwengise ukuthi babe baphristi bami: Thatha ikunzana, amaramu amabili aphile kuhle,+ 2 uburotho obunganasibiliso, uburotho oburondo obunganasibiliso obuvuleke phakathi obuhlanganiswe namafutha neemphaphatha ezinganasibiliso ezitjhatjhwe ngamafutha.+ Kufuze uzenze ngeflowuru esefiweko, 3 ngemva kwalokho uzifake ngethungeni uzilethe kimi zingethungenapho,+ uzilethe nekunzana namaramu amabili.

4 “Uzokuletha u-Aroni namadodanakhe ebungenweni betende lokuhlangana,+ ubahlambise ngamanzi.+ 5 Uzokuthatha izambatho+ umbathise u-Aroni iphuraphura, ijasi ye-efodi enganamikhono, i-efodi nesikhwanyana sesifubeni begodu uzokuthatha ibhande* le-efodi umbophe ngalo edinini.+ 6 Uzomthwesa itjhila elithwalwa ehloko begodu phezu kwalo ubeke itshwayo elitjengisa ukuthi u-Aroni uzinikele kuZimu,+ 7 uzokuthatha amafutha wokuzesa,+ umthele ngawo ehloko umzese.+

8 “Ngemva kwalokho ulethe amadodanakhe phambi kwami uwambathise iimphuraphura+ 9 bewubophe u-Aroni namadodanakhe ngamabhande emadininabo, uthwese amadodanakhe iingwani begodu ubuphristi buzokuba ngebawo, loyo mthetho ozokuhlala ukhona.+ Le yindlela ozokubeka ngayo u-Aroni namadodanakhe bona babe baphristi.+

10 “Ngemva kwalokho, uzokuletha ikunzi phambi kwetende lokuhlangana begodu u-Aroni namadodanakhe bazokubeka izandla zabo phezu kwehloko yekunzi leyo.+ 11 Hlabani ikunzi leyo phambi kwakaJehova, ebungenweni betende lokuhlangana.+ 12 Faka umunwakho eengazini zekunzi leyo uzitjhatjhe eempondweni ze-aldara+ kuthi eziseleko uzikghuthulele emanzinzweni we-aldara.+ 13 Thatha woke umhlwehlwe+ osemathunjini, umhlwehlwe osesibindini, iziso ezimbili nomhlwehlwe okizo, uwutjhise ukwenzela bona intuthwawo ikhuphuke isuka e-aldareni.+ 14 Kodwana inyama yekunzi, isikhumba sayo nomswanayo, uzokutjhisa ngomlilo ngaphandle kwekampa, ngombana kumhlatjelo wesono.

15 “Thatha iramu linye begodu u-Aroni namadodanakhe bazokubeka izandla zabo phezu kwehloko yeramu lelo.+ 16 Hlaba iramu lelo uthathe iingazi zalo uzifafaze kiwo woke amahlangothi we-aldara.+ 17 Lihlahlele, uhlanze amathumbalo+ neenqatha zalo bewubeke ndawonye izitho zalo nehlokwalo phezu kwe-aldara. 18 Kufuze ulitjhise loke iramu lelo, ulenze lithunye e-aldareni. Limnikelo otjhiswako owenzelwa uJehova, iphunga elimnandi.+ Limnikelo owenziwa ngomlilo oya kuJehova.

19 “Okulandelako, uzokuthatha elinye iramu begodu u-Aroni namadodanakhe kufuze babeke izandla zabo phezu kwehloko yeramu lelo.+ 20 Lihlabe begodu uthathe ezinye iingazi zalo utjhatjhe indlebe ka-Aroni yangesidleni neendlebe zamadodanakhe zangesidleni nabothubhakghuru babo bangesidleni namazwani wabo amakhulu wangesidleni bewufafaze iingazezo kiwo woke amahlangothi we-aldara. 21 Ngemva kwalokho, uthathe ezinye iingazi ezise-aldareni namanye amafutha wokuzesa+ uwafafaze ku-Aroni nezambathweni zakhe, emadodanenakhe nezambathweni zawo ukwenzela bona u-Aroni namadodanakhe bacwengeke nezambatho zabo.+

22 “Ngilokhu okufuze ukuthathe eramini, umhlwehlwe, umhlwehlwe osemsileni, umhlwehlwe osemathunjini, umhlwehlwe osesibindini, iziso ezimbili nomhlwehlwe ophezu kwazo+ nomlenze ongesidleni ngombana irameli limnikelo wokubeka abaphristi.+ 23 Khupha uburotho oburondo noburotho oburondo obuvuleke phakathi obutjhatjhwe ngamafutha, ukhuphe nesiphaphatha ngemantjini woburotho obunganasibiliso obubekwe phambi kwakaJehova. 24 Kufuze uzithathe zoke izintwezi uzibeke ezandleni zaka-Aroni nezandleni zamadodanakhe begodu kufuze uziphephezelise uzise emuva naphambili, kube mnikelo ophephezeliswako oya kuJehova. 25 Kufuze uzithathe ezandleni zabo uzitjhise e-aldareni phezu komnikelo otjhiswako, zibe liphunga elimnandi kuJehova. Zimnikelo owenziwe ngomlilo oya kuJehova.

26 “Thatha isifuba seramu lomnikelo wokubekwa kwabaphristi+ esinikelwa ngebanga laka-Aroni, usiphephezelise usise emuva naphambili, kube mnikelo ophephezeliswako oya kuJehova begodu sizokuba ngesakho. 27 Kufuze ucwengise isifuba somnikelo oya kuZimu ophephezeliswako nomlenze ocwengileko ophephezeliswako, othethwe emnikelweni weramu wokubekwa kwabaphristi+ obewunikelwa ngebanga laka-Aroni namadodanakhe. 28 Zizokuba ngezaka-Aroni namadodanakhe ngokomthetho ozokulandelwa ma-Israyeli, ngombana ziyingcenye ecwengileko begodu zizokuba yingcenye ecwengileko ezokunikelwa ma-Israyeli.+ Ziyingcenye ecwengileko kaJehova evela emihlatjelweni yama-Israyeli yetjhebiswano.+

29 “Izambatho ezicwengileko+ zaka-Aroni zizokusetjenziswa madodanakhe+ nasele angasekho lokha nawazeswako begodu abekwe bona abe baphristi. 30 “Indodanakhe emphristi ezokuthatha isikhundla sakhe, eza etendeni lokuhlangana bona izokulotjha endaweni ecwengileko, ezozembatha amalanga alikhomba.+

31 “Uzokuthatha iramu lomnikelo wokubekwa kwabaphristi ubilise inyamalo endaweni ecwengileko.+ 32 U-Aroni namadodanakhe bazokudla+ inyama yeramu lelo noburotho obungethungeni elisebungenweni betende lokuhlangana. 33 Kufuze badle izinto ebezisetjenziswa nakwenziwa umnikelo wokulitjalelwa kwezono lokha nababekwa bona babe baphristi begodu bacwengiswe kodwana umuntu ongakavumeleki kufuze angazidli ngombana zicwengile.+ 34 Nangabe kunenyama esele emhlatjelweni wokubekwa kwabaphristi noburotho okungenzeka zisele bekwaba sekuseni kufuze nizitjhise ngomlilo.+ Kufuze zingadliwa ngombana zicwengile.

35 “Ngilendlela ozokwenza ngayo ku-Aroni nemadodanenakhe, uzokwenza koke engikuyale ngakho. Uzokuthatha amalanga alikhomba bona ubabeke babe baphristi.+ 36 Qobe langa uzokunikela ngekunzi ibe mnikelo wokulitjalelwa kwezono, umnqopho wayo kubawa ukulitjalelwa kuZimu nokucwengisa i-aldara begodu kufuze ulizese ukwenzela bona licwengeke.+ 37 Uzokuthatha amalanga alikhomba wenzele i-aldara umnikelo wokulitjalelwa kwezono begodu kufuze ulicwengise ukwenzela bona libe ngelicwengeke khulu.+ Nanyana ngubani olithintako kufuze abe ngocwengileko.

38 “Ngilokhu ozokunikela e-aldareni qobe langa: amaramu amabili anomnyaka munye.+ 39 Nikela iramu linye ekuseni elinye ulinikele ngamarhwaqela.+ 40 Ingcenye yetjhumi yesilinganiso se-efa* seflowuru esefiweko sihlanganiswe nengcenye yesine yehini* yamafutha ahlwengileko we-oliva, nomnikelo wesiselo wesilinganiso sesine sehini sewayini, kuzokukhambisana neramu lokuthoma. 41 Uzokunikela iramu lesibili ngamarhwaqela, likhambisane nomnikelo weenthoro nomnikelo weenselo ofana newekuseni. Uzowunikela ube liphunga elimnandi, umnikelo owenziwe ngomlilo oya kuJehova. 42 Kuzokuba mnikelo otjhiswako owenziwa qobe eenzukulwaneni zenu ebungenweni betende lokuhlangana phambi kwakaJehova, lapho ngizokubonakala kuwe bengikhulume nawe.+

43 “Ngizoziveza lapho ema-Israyelini begodu indawo leyo izokucwengiswa mamandlami.+ 44 Ngizokucwengisa itende lokuhlangana ne-aldara begodu ngizokucwengisa u-Aroni namadodanakhe+ ukwenzela bona babe baphristi bami. 45 Ngizokuhlala hlangana nabantu bakwa-Israyeli begodu ngizokuba nguZimabo.+ 46 Bazokwazi ukuthi nginguJehova uZimabo, owabakhupha eGibhide ukwenzela bona ngizokuhlala hlangana nabo.+ NginguJehova uZimabo.