AbaHlulelii
10 Ngemva kwaka-Abimeleki, uTola indodana kaPuwa, indodana kaDodo, umuntu wakwa-Isakari, wathoma ukusindisa u-Israyeli.+ Bekahlala eTjhamiri esifundeni seentaba sakwa-Efrayimu. 2 Wahlulela u-Israyeli iminyaka ema-23. Ngemva kwalokho, wahlongakala, wabulungwa eTjhamiri.
3 Ngemva kwakhe, uJayire umGiliyadi wahlulela u-Israyeli iminyaka ema-22. 4 Bekanamadodana ama-30, ebewakhwela abodumbana abama-30 begodu anamadorobho ama-30, amadorobho lawo asabizwa ngokuthi yiRhavothi-Jayire+ bekube kunamhlanjesi; asenarheni yeGiliyadi. 5 Ngemva kwalokho, uJayire wahlongakala, wabulungwa eKhamoni.
6 Godu ama-Israyeli enza okumbi emehlweni kaJehova,+ athoma ukulotjha aboBhali,+ iinthombe zabo-Atjhitarothi, abozimu be-Aramu,* abozimu beTsidoni, abozimu bakwaMowabi,+ abozimu bama-Amoni+ nabozimu bamaFilista.+ Alahla uJehova begodu azange amlotjhe. 7 Nje-ke ilaka lakaJehova lamvuthela u-Israyeli, wamthengisela ezandleni zamaFilista nama-Amoni.+ 8 Awaphihliza begodu awagandelela khulu ama-Israyeli ngomnyaka loyo, iminyaka eli-18 agandelela woke ama-Israyeli angehlangothini leJordani ebeliyinarha yama-Amori eGiliyadi. 9 Nama-Amoni bewayama iJordani ayokulwa noJuda noBhenjamini nendlu ka-Efrayimu; u-Israyeli bekagandeleleke khulu. 10 Ngalokho ama-Israyeli abawa isizo kuJehova,+ athi: “Sonile kuwe, ngombana silahle uZimethu salotjha aboBhali.”+
11 Kodwana uJehova wathi kuma-Israyeli: “Azange nganisindisa na eGibhide+ nakuma-Amori,+ ama-Amoni, amaFilista,+ 12 amaTsidoni, ama-Amalekhi namaMidiyani nawanigandelelako? Naningililelako, nganisindisa esandleni sabo. 13 Kodwana nangilahla nalotjha abanye abozimu.+ Kungebangelo ngingekhe ngisanisindisa godu.+ 14 Iyani kibozimu enibakhethileko niyokubawa isizo kibo.+ Abanisindise ekugandelelekeni kwenu.”+ 15 Kodwana ama-Israyeli athi kuJehova: “Sonile. Yenza kithi nanyana yini oyibona ilungile emehlwenakho. Kwaphela, sibawa usisindise namhlanjesi.” 16 Akhupha abozimu bezinye iintjhaba hlangana nawo alotjha uJehova,+ kangangobana uZimu akhenge asakukghodlhelelela ukutlhaga kwaka-Israyeli.+
17 Ngokukhamba kwesikhathi, ama-Amoni+ abizelwa ndawonye ahloma ikampa eGiliyadi. Nje-ke ama-Israyeli ahlangana ahloma ikampa eMitsipha. 18 Abantu namakhosana weGiliyadi bathi komunye nomunye: “Ngubani ozosirhola siyokulwa nama-Amoni?+ Akabe yinduna phezu kwazo zoke izakhamuzi zeGiliyadi.”