Eksodusi
6 Nje-ke uJehova wathi kuMosi: “Uzokubona engizokwenza kuFaro.+ Isandla esinamandla sizomkatelela bona akhambise ama-Israyeli begodu sizomkatelela bona awaqothe enarhenakhe.”+
2 UZimu wathi kuMosi: “NginguJehova. 3 Benginande ngiziveza ku-Abrahama, ku-Isaka nakuJakopo ukuthi nginguZimu uMninimandla Woke+ kodwana malungana negama lami elithi Jehova,+ akhenge ngibenze bangazi.+ 4 Ngenze isivumelwano nabo sokuthi ngizobapha inarha yeKanana, inarha ebekungasi ngeyabo.+ 5 Yeke ngikuzwile ukunghonghoyila kwabantu bakwa-Israyeli abagqilazwa maGibhide, ngasikhumbula isivumelwano sami.+
6 “Tjela ama-Israyeli uthi: ‘NginguJehova, ngizonikhupha ekugandelelweni maGibhide, nginisindise ekugqilazweni ngiwo+ begodu kwamambala ngizonisindisa ngesandla esinamandla bengijezise namaGibhide kabuhlungu.+ 7 Nizokuba babantu bami, ngizokuba nguZimenu+ begodu kwamambala nizokwazi ukuthi nginguJehova uZimenu onikhupha ekugandelelekeni eGibhide. 8 Ngizonisa enarheni engafunga ukuyinikela u-Abrahama, u-Isaka noJakopo; ngizoninikela yona ibe lilifa lenu.+ NginguJehova.’”+
9 Ngokukhamba kwesikhathi uMosi watjela ama-Israyeli umlayezo lo kodwana akhenge amlalele ngombana bewadanile begodu bewaziingqila eziphathwa kabuhlungu.+
10 UJehova wathi kuMosi: 11 “Khamba uyokutjela uFaro, ikosi yeGibhide ukuthi akhambise ama-Israyeli enarhenakhe.” 12 UMosi waphendula uJehova wathi: “Ama-Israyeli akhenge angilalele;+ nje-ke uFaro uzongilalela njani ngombana nakhu angikghoni nokukhuluma?”+ 13 Yeke uJehova watjela uMosi no-Aroni ukuthi ngimiphi imiyalo ekufuze bayinikele ama-Israyeli noFaro ikosi yeGibhide, ukwenzela bona akhuphe ama-Israyeli enarheni yeGibhide.
14 Lezi ziinhloko zemindeni yama-Israyeli: Amadodana kaRubeni, izibulo laka-Israyeli+ bekunguRhanoki, uPalu, uRhetsironi noKarimi.+ Le mindeni kaRubeni.
15 Amadodana kaSimiyoni bekunguJemuweli, uJamini, u-Ohadi, uJakini, uTsorhari noSawula indodana yomfazi womKanana.+ Le mindeni kaSimiyoni.
16 La magama wamadodana kaLevi,+ ngokwemindenawo: NguGeritjhoni, uKhehathi noMerari.+ ULevi waphila iminyaka eli-137.
17 Amadodana kaGeritjhoni ngokwemindenawo, bekunguLibini noTjhimeyi.+
18 Amadodana kaKhehathi bekungu-Amramu, uJitsihari, uRhebroni no-Uziyeli.+ UKhehathi waphila iminyaka eli-133.
19 Amadodana kaMerari bekunguMarhili noMutjhi.
Le bekumindeni yamaLevi, ngokweenkoro zawo.+
20 Nje-ke u-Amramu wathatha uJokobedi udadwabo kayise bona abe mkakhe.+ Wambelethela u-Aroni noMosi.+ U-Amramu waphila iminyaka eli-137.
21 Amadodana kaJitsihari bekunguKhorarhi,+ uNefegi noZikiri.
22 Amadodana ka-Uziyeli bekunguMitjhayeli, u-Elitsafani+ noSitiri.
23 U-Aroni wathatha u-Elitjheba indodakazi ka-Aminadaba, udadwabo kaNarhitjhoni+ bona abe mkakhe. Wambelethela uNadabi, u-Abihu, u-Elazara no-Itamara.+
24 Amadodana kaKhorarhi bekungu-Asiri, u-Elikhana no-Abiyasafi.+ Le bekumindeni yamaKhorarhi.+
25 U-Elazara+ indodana ka-Aroni, wathatha enye yamadodakazi kaPuthiyeli bona ibe mkakhe. Yambelethela uFiniyasi.+
Lezi bekuziinhloko zeenkoro zamaLevi ngokwemindenawo.+
26 UJehova wathi ku-Aroni noMosi: “Khuphani abantu bakwa-Israyeli eGibhide ngokweenqhema zabo.+ 27 Ngu-Aroni noMosi abakhuluma noFaro ikosi yeGibhide bona akhuphe ama-Israyeli eGibhide.+
28 Ngelanga uJehova akhuluma ngalo noMosi enarheni yeGibhide, 29 uJehova wathi kuMosi: “NginguJehova. Tjela uFaro ikosi yeGibhide koke engikutjela khona.” 30 Nje-ke uMosi wathi kuJehova: “Angikghoni ukukhuluma kuhle, alo uFaro uzongilalela njani?+