IsAmbulo Esiya KuJwanisi
18 Ngemva kwalokhu ngabona enye ingilozi yehla ivela ezulwini inamandla amakhulu nephasi belikhanyiswa yiphazimulwayo. 2 Yarhuwelela ngelizwi elikhulu, ithi: “Liwile! IBhabhiloni eliKhulu liwile,+ selibe yindawo yokuhlala amadimoni nendawo yayo yoke imimoya esilapheleko* nesidleke sazo zoke iinyoni ezisilapheleko nezihloyiweko!+ 3 Ngebanga lewayini lekanuko* yokuziphatha kumbi ngokomseme,* zoke iintjhaba zibe bongazimbi balo+ namakhosi wephasi aziphethe kumbi ngokomseme nalo*+ nabarhwebi* bephasi banjinge ngebanga lokuphila lingananhloni ngebanga lamandla womnothwalo.”
4 Ngezwa elinye ilizwi ezulwini lithi: “Phumani kilo, bantu bami,+ nangabe anifuni ukuhlanganyela nalo ezonweni zalo begodu nangabe anifuni ukwamukela ingcenye yeembetho zalo.+ 5 Ngombana izono zalo zipakelene bezafika ezulwini,+ uZimu uzikhumbulile izenzo zalo ezinganabulungiswa.*+ 6 Liphatheni ngendlela elaphatha ngayo abanye,+ libuyiseleleni ngokubuyelelwe kabili lokhu elakwenzako:+ ekaphweni+ eliqarhe kiyo, liqarheleni ngokubuyelelwe kabili.+ 7 Ngezinga eliziphazimulise ngalo begodu laphila lingananhloni emnothwenalo, ngezingelo linikeleni ukuhlunguphazwa nokulila. Ngombana lisolo lithi ehliziywenalo: ‘Ngihlezi njengendlovukazi, angisimhlolokazi begodu angekhe ngilile.’+ 8 Kungebangelo iimbetho zalo zizokufika ngelanga linye, ukufa, ukulila nendlala begodu lizokutjhiswa ngokupheleleko ngomlilo+ ngombana uJehova* uZimu, olahlulelako, unamandla.+
9 “Amakhosi wephasi aziphethe kumbi nalo ngokomseme* nalo begodu aphila angananhloni emnothwenalo, azokulila azibethe asesizini ngebanga lalo nakabona intuthu yokutjhiswa kwalo. 10 Bazokujamela kude ngebanga lokusaba ukuhlunguphazwa kwalo bathi: ‘Maye! Maye! Wena dorobho elikhulu,+ Bhabhiloni dorobho eliqinileko ngombana ukwahlulelwa kwakho kufike nge-iri linye!’
11 “Godu abarhwebi bephasi bayalililela begodu balizilele ngombana akusanamuntu othenga ipahlabo, 12 ipahla yegolide, isiliva, amatje aligugu, amaparele, ilineni elisezingeni eliphezulu, amatjhila asipiridzana, isilika, amatjhila abomvu be! Nakho koke okwenziwe ngekhuni elinamakha nayo yoke imihlobo yezinto ezenziwe ngezinyo lendlovu nangekhuni eliligugu, ikhopha, isimbi, imabula 13 nesinamoni, isinongo seNdiya, ipepho, amafutha anuka kamnandi, ipepho emhlophe, iwayini, amafutha we-oliva, iflowuru, ikoroyi, iinkomo, izimvu, iinjomani, iinkarana nokuphila kwabantu.* 14 Isithelo esihle obewusikhanukela* awusanaso nazo zoke izinto ezimnandi nezihle zitjhabalele kuwe, angekhe zifunyanwe godu.
15 “Abarhwebi abathengise izintwezi, abanjinge ngalo, bazokujamela kude ngebanga lokusaba ukuhlunguphazwa kwalo begodu bazokulila bebalizilele, 16 bathi: ‘Maye! Maye! Dorobho elikhulu, elembathiswe ilineni elisezingeni eliphezulu, elisipiridzana nelibomvu be! Elihlotjiswe ngokunothileko ngemihlobiso yegolide, amatje aligugu namaparele+ 17 ngombana ubunjinga obungaka butjhabalele nge-iri linye!’
“Nabo boke abokapteni bemikhumbi nabo boke abantu abakhambakhamba elwandle, abathayi ngesikepe nabo boke abaziphilisa ngelwandle bajamele kude 18 barhuwelela njengombana baqale intuthu yokutjhiswa kwalo bathi: ‘Ngiliphi idorobho elinjengedorobho elikhulu?’ 19 Bazithela ngethuli eenhloko zabo barhuwelela, balila begodu bazila bathi: ‘Maye! Maye! Dorobho elikhulu, ngalo boke abanemikhumbi elwandle banjinge ngomnothwalo ngombana litjhatjalaliswe nge-iri linye.’+
20 “Thabani ngalokho okwenzeke kilo, nina abasezulwini+ nani abacwengileko+ nabapostoli nabaphorofidi ngombana ngebanga lenu uZimu ulahlulele!”+
21 Ingilozi enamandla yaphakamisa ilitje elinjengelitje lokusila, yaliphosela ngelwandle, yathi: “Ngokunjalo neBhabhiloni idorobho elikhulu lizokuphoselwa phasi ngokuphazima kwelihlo begodu angekhe lisafumaneka.+ 22 Itjhada labavumi abadlala isidonodono, abadlala ifuludi, ababetha amabhorompita nabanye abavumi angekhe lisazwakala kuwe. Angekhe kusafumaneka kuwe isisebenzi sobukghwari esenza nanyana ngimuphi umsebenzi begodu akunatjhada lelitje lokusila elisazokuzwakala kuwe. 23 Ukukhanya kwesibani angekhe kusakukhanyisela nelizwi lomkhwenyana nelakamakoti angekhe lisazwakala kuwe ngombana abarhwebi bakho bebaziinkhulu zephasi begodu ngezenzo zakho zobungoma+ zoke iintjhaba zadurhiswa. 24 Kwamambala, kilo kufumaneke iingazi zabaphorofidi nabacwengileko+ nezabo boke ababuleweko ephasini.”+