Joromiya
25 Ilizwi elafika kuJoromiya malungana nabo boke abantu bakwaJuda ngomnyaka wesine kaJehoyakhimu+ indodana kaJosiya, ikosi yakwaJuda, obekumnyaka wokuthoma weKosi uNebukadinetsari* yeBhabhiloni. 2 Nakhu uJoromiya umphorofidi akukhulumileko malungana nabo boke abantu bakwaJuda nakizo zoke izakhamuzi zeJerusalema:
3 “Kusukela ngomnyaka we-13 kaJosiya+ indodana ka-Amoni, ikosi yakwaJuda bekube kunamhlanjesi, sekuminyaka ema-23, ilizwi lakaJehova lafika kimi begodu bengisolo ngikhuluma nani ngokubuyelelweko kodwana akhenge nilalele.+ 4 UJehova wathumela zoke iinsebenzi zakhe ezibaphorofidi kini, wazithumela ngokubuyelelweko kodwana akhenge nilalele namkha nilalelisise.+ 5 Bebathi, ‘Sibawa nitjhuguluke, omunye nomunye eendleleni zakhe ezimbi nezenzweni zakhe ezimbi,+ nanenza njalo nizokuragela phambili nihlala isikhathi eside enarheni uJehova aninikela yona kade nina nabokhokho benu. 6 Ningalandeli abanye abozimu, nibalotjhe begodu nibakhothamele, ningizwise ubuhlungu ngomsebenzi wezandla zenu; nakungasinjalo, ngizonilethela ihlekelele.’
7 “‘Kodwana akhenge ningilalele,’ kutjho uJehova. ‘Kunalokho ningizwise ubuhlungu ngomsebenzi wezandla zenu, nazibangela ihlekelele.’+
8 “Nje-ke nakhu uJehova wamabutho akutjhoko, ‘“Ngebanga lokuthi akhenge nilalele amezwami, 9 ngibiza yoke imindeni yetlhagwini,”+ kutjho uJehova, “ngibiza iKosi uNebukadinetsari* yeBhabhiloni, incekwami+ begodu ngizobaletha ngokujamelene nenarha le+ nangokujamelene nezakhamuzi zayo nangokujamelene nazo zoke iintjhaba eziyibhodileko.+ Ngizobanikela ekutjhatjalalisweni, ngibenze into ethusako nento ezokubetjhelwa umlozi begodu bazokutjhabalala ngokungapheliko. 10 Ngizokuqeda itjhada lokuthaba netjhada lokujekezela kibo,+ ilizwi lomkhwenyana nelizwi lakamakoti,+ itjhada lelitje lokusila nomkhanyo wesibani. 11 Yoke inarha le izokuba marubhi, izokuba yinto ethusako begodu iintjhabezi zizokusebenzela ikosi yeBhabhiloni iminyaka ema-70.”’+
12 “‘Nakuphela iminyaka ema-70,+ ngizokujezisa ikosi yeBhabhiloni nesitjhabeso ngebanga lomtjhaphwabo,’+ kutjho uJehova ‘begodu ngizokwenza inarha yamaKhaledi* ibe marubhi ngokungapheliko.+ 13 Ngizokuzalisa woke amezwami engiwakhulumileko ngokujamelene nenarha le, koke okutlolwe encwadini uJoromiya aphorofida ngakho ngokujamelene nazo zoke iintjhaba. 14 Ngombana iintjhaba ezinengi namakhosi amakhulu+ azobenza iingqila+ begodu ngizozibuyiselela kibo ngokuya ngokwezenzo zabo nangomsebenzi wezandla zabo.’”+
15 Ngombana nakhu uJehova uZimu ka-Israyeli akutjhoko kimi: “Thatha ikapho yewayini lelaka esesandleni sami, useze zoke iintjhaba engizokuthumela kizo. 16 Bazokusela, batherezele begodu baziphathe njengomuntu ohlanyako ngebanga lesabula engibalethela yona.”+
17 Yeke ngathatha ikapho esesandleni sakaJehova ngaseza zoke iintjhaba uJehova angithumele kizo:+ 18 ngizokuthoma ngeJerusalema namadorobho wakwaJuda,+ amakhosayo namakhosanayo, bona kube marubhi, into ethusako, into ezokubetjhelwa umlozi, esiqalekiso,+ bekube kunamhlanjesi; 19 noFaro ikosi yeGibhide neensebenzi zakhe, amakhosanakhe nabo boke abantu bakhe,+ 20 yoke imihlobo ehlukahlukeneko yabantu; woke amakhosi wenarheni ye-Utsi; woke amakhosi wenarheni yamaFilista,+ e-Atjhikheloni,+ eGaza, e-Ekroni nabaseleko be-Atjhidodi; 21 be-Edomu,+ bakwaMowabi+ nabakwa-Amoni;+ 22 woke amakhosi weTirosi, woke amakhosi weTsidoni+ namakhosi wesihlengeleni selwandle; 23 beDedani,+ beTema, beBhuzi nabo boke abanamarhwanqa arhuniweko;+ 24 woke amakhosi wama-Arabhu+ nawo woke amakhosi wemihlobo yabantu ehlukahlukeneko abahlala emmangweni; 25 woke amakhosi weZimri, woke amakhosi we-Elamu+ nawo woke amakhosi weMediya;+ 26 nawo woke amakhosi wetlhagwini akude naseduze ngokulandelana kwawo nayo yoke eminye imibuso yephasini nekosi uTjhetjhaki+ uzokusela ngemva kwabo.
27 Kufuze uthi kiwo, ‘Nakhu uJehova wamabutho, uZimu ka-Israyeli akutjhoko: “Selani nidakwe, niphalaze begodu niwe bona ningakghoni ukusikima+ ngebanga lesabula engiyithumela kini.”’ 28 Nangabe bayabhala ukuthatha ikapho esesandleni sakho bona basele, kufuze uthi kibo, ‘Nakhu uJehova wamabutho akutjhoko: “Kufuze nisele! 29 Ngombana qalani! Nangabe ngizokuthoma ngokuletha ihlekelele edorobheni elibiza igama lami,+ kghani kufuze ngingalijezisi?”’+
“‘Angekhe ningajeziswa, ngiletha isabula ngokujamelene nazo zoke izakhamuzi zephasi,’ kutjho uJehova wamabutho.
30 “Kufuze uphorofide woke amezwi la kibo uthi,
‘UJehova uzokubhodla aphezulu
Begodu asendawenakhe ecwengileko uzokwenza ilizwi lakhe lizwakale.
Uzokubhodlela phezulu ngokujamelene nendawo ahlala kiyo.
Bazokurhuwelela njengalabo abatlhodlha iwayini,
Uzokubhina ajekezele ngokujamelene nazo zoke izakhamuzi zephasi.’
31 ‘Itjhada lizokuzwakala emaphethelweni wephasi,
Ngombana uJehova ujamelene neentjhaba.
Yena ngokwakhe uzokwahlulela boke abantu.+
Begodu uzokubulala okhohlakeleko ngesabula,’ kutjho uJehova.
32 Nakhu uJehova wamabutho akutjhoko:
‘Qala! Ihlekelele izokurhatjheka eentjhabeni ngeentjhaba,+
Nesiwuruwuru esikhulu sizokufika eengcenyeni ezikude zephasi.+
33 “‘Ababulewe nguJehova ngelangelo bazabe bavela ephasini loke. Angekhe balilelwe namkha bahlanganiswe namkha babulungwe. Bazokuba njengomsuqwa ehlabathini.’
34 Lilani nina belusi, nirhahlawule!
Nizibhudabhude nina baphathi bemihlambi,
Ngombana sesifikile isikhathi senu sokobana nihlatjwe beniphadlhalale,
Begodu nizokuwa njengesitja esikhethekileko!
35 Abelusi akunandawo lapha bangabalekela khona,
Nabaphathi bemihlambi abanandlela yokuphunyurha.
36 Yizwa ukurhahlawula kwabelusi
Nesililo sabaphathi bemihlambi,
Ngombana uJehova utjhabalalisa amadlelwabo.
37 Neendawo ezinokuthula azisaphili
Ngebanga lelaka elivuthako lakaJehova.
38 Utjhiye indawakhe yobuphephelo njengebhubezana,+
Ngombana inarhabo ibe yinto ethusako
Ngebanga lesabula enelunya
Nangebanga lelaka lakhe elivuthako.”