USamyela Wesibili

13 U-Absalomu indodana kaDavida bekanodadwabo omuhle ekuthiwa nguTamari+ begodu u-Amnoni indodana kaDavida+ bekamthanda. 2 U-Amnoni bekagandeleleke khulu ngebanga lakadadwabo uTamari bewagula ngombana bekamntazana omsulwa begodu kubonakala kunganalitho u-Amnoni angamenza lona. 3 Nje-ke u-Amnoni bekanomngani ekuthiwa nguJonadaba,+ indodana kaTjhimeya,+ umfowabo kaDavida; uJonadaba bekayindoda enobuqili khulu. 4 Yeke uJonadaba wabuza u-Amnoni wathi: “Kubayini wena, indodana yekosi, uhlala ugandeleleke kangaka qobe ekuseni? Kubayini ungangitjeli?” U-Amnoni wamphendula wathi: “Ngithanda uTamari, udadwabo+ kamfowethu u-Absalomu.” 5 UJonadaba wathi kuye: “Lala embhedenakho wenze ngasuthi uyagula. Uyihlo nakezako azokubona, uthi kuye, ‘Ngibawa uthumele udadwethu uTamari bona azongenzela ukudla. Nange angangilungiselela ukudla okunikelwa abantu abagulako phambi kwami, ngizokudla esandleni sakhe.’”

6 Yeke u-Amnoni walala wenza ngasuthi uyagula, ikosi yangena ngakuye izombona. U-Amnoni wathi ekosini: “Ngibawa uthumele udadwethu uTamari angene azokubhaga amakhekhe amabili asahliziyo phambi kwami bona ngidle esandleni sakhe.” 7 Ngalokho uDavida wathumela umlayezo kuTamari ekhaya, wathi: “Ngibawa uye endlini yomfowenu u-Amnoni uyomenzela ukudla.” 8 Ngalokho uTamari waya endlini yomfowabo u-Amnoni, lapho ebekalele khona. Wakiniya ihlama wenza amakhekhe phambi kwakhe. 9 Ngemva kwalokho, wathatha ipani wamphakululela. Kodwana u-Amnoni wala ukudla wathi: “Woke umuntu akaphume!” Boke baphuma.

10 U-Amnoni wathi kuTamari: “Letha ukudla ngekumbeni ngizokudla esandleni sakho.” UTamari wathatha amakhekhe asahliziyo awenzileko wawaletha kumfowabo u-Amnoni ngekumbeni. 11 Kwathi nakawaletha kuye bona adle, wambamba wathi: “Yiza, lala nami dadwethu.” 12 Kodwana wathi kuye: “Awa mfowethu! Ungangirhubutjhi ngombana into enje ayenziwa kwa-Israyeli.+ Ungalenzi ihlazo elingaka!+ 13 Ngingaphila njani nehlazo lami? Nawe uzokuqalwa njengenye yamadoda angazisiko wakwa-Israyeli. Nje-ke ngibetha isandla phezu kwesinye, khuluma nekosi ngombana angeze ikwalele ngami.” 14 Kodwana wala ukumlalela, wamhlula ngamandla bewamrhubutjha ngokumkata. 15 Ngemva kwalokho, u-Amnoni wathoma ukumhloya ngehloyo ekulu khulu, kangangokuthi indlela ebekamhloye ngayo yadlula indlela ebekamthanda ngayo. U-Amnoni wathi kuye: “Vuka; khamba!” 16 Wamphendula wathi: “Awa mfowethu, ukungiqotha nje kumbi ukudlula lokho ongenze khona!” Kodwana wabhala ukumlalela.

17 Yeke wabiza isisebenzi sakhe esisesesitjha wathi: “Ngibawa ususe umuntu lo phambi kwami, ngemva kwalokho ulodlhele umnyango.” 18 (UTamari bekambethe isambatho esikhethekileko,* ngombana bezinjalo izambatho ezimbathwa madodakazi wekosi amsulwa.) Nje-ke isisebenzi saka-Amnoni samkhuphela ngaphandle, nasiqedako salodlhela umnyango. 19 Yeke uTamari wazithela ngomlotha ehloko,+ warathula isambatho sakanokutjho ebekasimbethe; wathwala imikhono ehloko wakhamba alila.

20 U-Absalomu+ wambuza wathi: “Kghani bewunomfowenu u-Amnoni? Thula dadwethu. Ungumfowenu.+ Ungabeki ihliziywakho endabeni le.” Nje-ke uTamari wahlala yedwa endlini kamfowabo u-Absalomu. 21 UDavida ikosi nakezwa ngakho koke lokhu, wasilingeka khulu.+ Kodwana akhenge afune ukuzwisa u-Amnoni indodanakhe ubuhlungu ngombana bekamthanda njengombana alizibulo lakhe. 22 U-Absalomu akhenge atjho litho ku-Amnoni, ehle namkha embi; ngombana u-Absalomu bekamhloyile+ u-Amnoni ngebanga lokuthi urhubutjhe udadwabo uTamari.+

23 Ngemva kweminyaka emibili ezeleko, abarhuni bezimvu baka-Absalomu bebaseBhali-Rhatsori, eduze nakwa-Efrayimu,+ begodu u-Absalomu wamema woke amadodana wekosi.+ 24 Yeke u-Absalomu wangena ngekosini wathi: “Isisebenzi sakho sirhuna izimvu zaso. Ngibawa ikosi neensebenzi zayo bakhambe nami.” 25 Kodwana ikosi yathi ku-Absalomu: “Awa ndodanami. Nasingakhamba soke, sizokuba mthwalo kuwe.” Ngitjho nanyana bekasolo ayirabhela, azange ivume ukukhamba kodwana yambusisa. 26 Yeke u-Absalomu wathi: “Nangabe wena awukhambi, ngibawa uvumele umfowethu u-Amnoni akhambe nathi.”+ Ikosi yamphendula yathi: “Kubayini kufuze akhambe nani?” 27 Kodwana u-Absalomu wayincenga, yeke yathumela u-Amnoni nawo woke amadodana wekosi bona akhambe naye.

28 Yeke u-Absalomu wayala iinsebenzi zakhe wathi: “Tjhejani, ihliziyo ka-Amnoni nayithakasileko ngebanga lewayini, ngizokuthi kini, ‘Rhayilani u-Amnoni!’ Kufuze nimbulale ngesikhatheso. Ningasabi. Angithi ngimi oniyalako? Qinani nibe nesibindi.” 29 Iinsebenzi zaka-Absalomu zenza njengombana u-Absalomu aziyalile ku-Amnoni; ngalokho woke amanye amadodana wekosi asikima, ngayinye yabophela imeyilayo yabaleka. 30 Kwathi asesesendleleni, kwafika umbiko kuDavida othi: “U-Absalomu urhayile woke amadodana wekosi, ayikho nayinye ephunyurhileko.” 31 Nayizwa lokho ikosi yasikima yarathula izambatho zayo, yalala phasi begodu zoke iinsebenzi zekosi bezijame eqadi kwayo, izambatho zazo zirathukile.

32 Kodwana uJonadaba+ indodana kaTjhimeya,+ umfowabo kaDavida wathi: “Ikosami ayingacabangi ukuthi kubulewe woke amadodana amancani wekosi ngombana ngu-Amnoni kwaphela ohlongakeleko.+ Lokho kwenzeke ngomyalo ka-Absalomu, owaqunta ukwenza lokhu+ kusukela ngelanga u-Amnoni arhubutjha ngalo udadwabo+ uTamari.+ 33 Nje-ke ikosami ayingawuthatheli ehloko umbiko othi, ‘Woke amadodana wekosi ahlongakele’; ngu-Amnoni kwaphela ohlongakeleko.”

34 U-Absalomu wabaleka.+ Ngokukhamba kwesikhathi, umlindi waphakamisa amehlwakhe wabona ukuthi kunabantu abanengi abeza ngendlela engemva kwakhe hlanu kwentaba. 35 Yeke uJonadaba wathi ekosini: “Qala! Amadodana wekosi abuyile. Kunjengombana isisebenzi sakho sitjhwile.” 36 Nakaqeda ukukhuluma, amadodana wekosi angena, arhahlawula isililo; godu ikosi nazo zoke iinsebenzi zayo zakhihla isililo esibuhlungu. 37 Kodwana u-Absalomu wabalekela kuTalimayi+ indodana ka-Amihudi ikosi yeGetjhuri. UDavida walilela indodanakhe amalanga amanengi. 38 U-Absalomu wabalekela eGetjhuri,+ wahlala lapho iminyaka emithathu.

39 Ngelikade ikosi uDavida yahlulukela u-Absalomu ngombana besele iduduzekile ngemva kokuhlongakala kwaka-Amnoni.