USamyela Wokuthoma
25 Ngokukhamba kwesikhathi uSamyela+ wahlongakala; ama-Israyeli woke ahlangana bona azomlilela begodu ambulunge endlinakhe eRama.+ Ngemva kwalokho, uDavida watjhinga emmangweni weParana.
2 Nje-ke bekunomuntu eMawoni+ obekasebenzela eKarameli.*+ Umuntu lo bekanjinge khulu; bekanezimvu ezizii-3 000 neembuzi eziyi-1 000 begodu ngesikhatheso bekarhuna izimvu zakhe eKarameli. 3 Igama lomuntu lo bekunguNabhali,+ igama lomkakhe bekungu-Abigeyili.+ Umkakhe bekanelemuko begodu amuhle kodwana indoda le, engeyomndeni kaKalebi,+ beyibukhali begodu iziphethe kumbi.+ 4 UDavida wezwa asemmangweni bona uNabhali urhuna izimvu zakhe. 5 Yeke uDavida wathumela amasokana alitjhumi kuye, wathi kiwo: “Khuphukelani eKarameli, nanifika kuNabhali nimtjele bona uDavida ubuza amavuko. 6 Bese nithi kuye, ‘Kwanga ungaphila isikhathi eside bewube nokuthula, nomuzakho nakho koke onakho kwanga kungaba nokuthula. 7 Nje-ke ngizwa bathi urhuna izimvu. Ngesikhathi abelusi bakho banathi, azange sibalimaze+ begodu azange balahlekelwe lilitho soke isikhathi baseKarameli. 8 Buza amasokanakho azokutjela. Kwanga ungaba nomusa emasokanenami ngombana size ngesikhathi sethabo. Sibawa unikele iinsebenzi zakho nendodanakho uDavida nanyana yini ongakghona ukusinikela yona.’”+
9 Yeke amasokana kaDavida akhamba atjela uNabhali koke okutjhiwo nguDavida. Nawaqedako, 10 uNabhali waphendula iinsebenzi zakaDavidezi wathi: “Ngubani uDavida begodu ngubani indodana kaJese? Amalanga la zinengi iinsebenzi ezibalekela amakhosazo.+ 11 Kghani kufuze ngithathe uburotho bami namanzami nenyama engiyihlabele abarhuni bami ngiyinikele abantu abangaziwako nokuthi bavelaphi?”
12 Yeke amasokana kaDavida abuyela emva ayombikela woke amezwi la. 13 Khonokho uDavida wathi ebantwini bakhe: “Ngamunye akabophele isabulakhe!”+ Yeke boke babophela iinsabula zabo noDavida wabophela isabulakhe begodu amadoda angaba ma-400 akhuphuka noDavida, kwathi ama-200 asala nomthwalo.
14 Ngesikhatheso esinye seensebenzi sabikela u-Abigeyili umkaNabhali sathi: “Qala! UDavida uthumele iinthunywa ezivela emmangweni ziphathele ikosethu iimfiselakuhle kodwana yona izithuke yatjhiya elikhohliweko.+ 15 Abantwaba bebasiphethe kuhle khulu. Azange basilimaze begodu azange silahlekelwe nayinto yinye ngaso soke isikhathi sinabo emmangweni.+ 16 Bebanjengeboda lesivikelo elisibhodileko ubusuku nemini, ngaso soke isikhathi sinabo siluse umhlambi. 17 Nje-ke qunta bona uzokwenzani ngombana lokhu kuzokuletha ihlekelele nakanjani ekosinethu nendlinayo yoke,+ ngombana iyindoda engazisiko+ kangangobana akunamuntu ongakhuluma nayo.”
18 Yeke msinyana u-Abigeyili+ wathatha uburotho obuma-200, imijeka emikhulu yewayini emibili, izimvu ezihlanu ezihlatjiweko, iinlinganiso ezihlanu zeseya* zeenthoro ezikhanzingiweko, amakuke ali-100 wamadiribe omisiweko namakuke ama-200 wamafeyi agangadelweko wazilayitjha phezu kwabodumbana.+ 19 Ngemva kwalokho, wathi eensebenzini zakhe: “Khambani phambi kwami; mina ngizonilandela.” Kodwana akhenge atjho litho kuNabhali indodakhe.
20 Kwathi nakakhamba ngodumbana asithwe yintaba, uDavida nabantu bakhe bebehla ngendlela leyo, yeke wahlangana nabo. 21 Nje-ke uDavida bekathi: “Kutjho ukuthi umrhali lo akathokozi ngazo zoke izinto zakhe engimgadele zona emmangweni. Akunalitho lakhe elilahlekileko+ kodwana yena ungibuyisela okumbi ngokuhle engimenzele khona.+ 22 Kwanga uZimu angawajezisa kabuhlungu amanaba kaDavida* nangingavumela namunye umuntu wembaji wendlu kaNabhali bona aphile bekube sekuseni.”
23 Kwathi u-Abigeyili nakabona uDavida, wehla msinyana phezu kwakadumbana, wahloma ihloko phasi, waguqa phambi kwaDavida. 24 Wawela eenyaweni zakhe wathi: “Kosami, umlandu awube kimi; vumela isisebenzi sakho sikhulume nawe begodu ulalele amezwi wesisebenzi sakho. 25 Ngibawa ikosami ingamtjheji uNabhali ongazisiko lo ngombana ufana negama lakhe. Igama lakhe nguNabhali*+ begodu akanangqondo. Kodwana mina ncekukazakho, akhenge ngiwabone amasokana ikosami ebeyiwathumele. 26 Nje-ke kosami, ngifunga ngoJehova uZimu ophilako nangokuphila kwakho, ukuthi nguJehova okubambileko+ bona ungabi necala leengazi+ begodu ungazibuyiseleli ngesandla sakho. Kwanga amanabakho nalabo abafuna ukulimaza ikosami bangaba njengoNabhali. 27 Yeke ngibawa bona isipho*+ esilethwe sisebenzi sakho esisikazi sinikelwe amasokana alandela ikosami.+ 28 Ngibawa ulibalele isono sesisebenzi sakho esisikazi ngombana akunakuzaza ukuthi uJehova uzokwenza iinzukulwana zakho zibuse isikhathi eside,+ ngebanga lokuthi ikosami ilwa izipi zakaJehova+ begodu abukho ubumbi obufunyenwe kuwe ukuphila kwakho koke.+ 29 Nakungaba nomuntu osikimako bona akugijimise begodu afune ukuphila kwakho, uJehova uZimakho uzokuvikela njengombana umuntu avikela amagugu aphuthelwe ngemgodleni,* namanabakho uzowaphosela kude njengamatje aphoswa ngesarwayi. 30 Lokha uJehova sekenzele ikosami zoke izinto ezihle azithembisileko begodu akubeka bona ube mrholi phezu kwaka-Israyeli,+ 31 angeze uzisole ehliziywenakho ngokuthulula iingazi ngaphandle kwesizathu nangokuvumela isandla sekosami bona sizibuyiselele.+ Lokha uJehova nakanikela ikosami okuhle, ungasikhohlwa isisebenzi sakho esisikazi.”
32 Kilokho uDavida wathi ku-Abigeyili: “Akadunyiswe uJehova uZimu ka-Israyeli, okuthumele bona uzongihlangabeza namhlanjesi! 33 Akubusiswe ukuvuthwa kwakho! Kwanga ungabusiswa ngokungikhandela namhlanjesi bona ngingabi necala leengazi+ begodu ngingazibuyiseleli ngezandla zami. 34 Ngifunga ngoJehova uZimu ophilako ka-Israyeli, ongikhandeleko bona ngingakulimazi,+ ukuthi ngathana akhenge uze msinyana uzongihlangabeza,+ bengekhe kube namunye umuntu wembaji ongokaNabhali+ ophilako kusasa ekuseni.” 35 Yeke uDavida wamukela lokho ebekamlethele khona, wathi kuye: “Khuphukela endlinakho ngokuthula. Qala, ngikulalele begodu ngizokwenza ngokwesibawo sakho.”
36 Ngokukhamba kwesikhathi, u-Abigeyili wabuyela kuNabhali, obekagidinga njengekosi ngendlinakhe, uNabhali bekathabile begodu adakwe afile. U-Abigeyili akhenge amtjele litho bekwaba sekuseni. 37 Kwathi ekuseni uNabhali nakaqaqulukileko, umkakhe wamtjela izintwezi. Yeke ihliziywakhe yaba njengeyomuntu ohlongakeleko bese waqina ngho njengelitje. 38 Ngemva kwamalanga angaba litjhumi, uJehova wabetha uNabhali begodu wahlongakala.
39 Kwathi uDavida nakezwa bona uNabhali uhlongakele, wathi: “Akadunyiswe uJehova, ojamele indabami+ yokunyefulwa nguNabhali+ nobambe isisebenzi sakhe bona singenzi litho elimbi,+ uJehova ubuyisele ubumbi bakaNabhali phezu kwehlokwakhe!” Ngemva kwalokho, uDavida wathumela ilizwi lokusoma u-Abigeyili ukuthi abe mkakhe. 40 Yeke iinsebenzi zakaDavida zafika ku-Abigeyili eKarameli zathi kuye: “UDavida usithumele kuwe bona sizokuthatha ube mkakhe.” 41 Wasikima khonokho, wakhothama wahloma ihloko phasi wathi: “Nasi isigqila senu esizokuba sisebenzi esizokuhlambisa iinyawo+ zeensebenzi zekosami.” 42 Nje-ke u-Abigeyili+ wasikima msinyana wakhwela udumbanakhe, iinsebenzi zakhe ezisikazi ezihlanu bezikhamba ngemva kwakhe; wakhamba neenthunywa zakaDavida begodu waba mkakhe.
43 Godu uDavida bekatjhade no-Arhinowami+ weJizriyela,+ yeke bobabili baba bafazi bakhe.+
44 Kodwana uSawula bekanikele indodakazakhe uMikali,+ umkaDavida, kuPalithi+ indodana kaLayitjhi, obekavela eGalima.