Jotjhuwa
1 Ngemva kokuhlongakala kwakaMosi inceku kaJehova, uJehova wathi kuJotjhuwa*+ indodana kaNuni, umsizi+ kaMosi: 2 “UMosi incekwami uhlongakele.+ Nje-ke zilungiselele, uyame iJordani wena nabo boke abantwaba, uye enarheni engiyinikela abantu bakwa-Israyeli.+ 3 Ngizoninikela yoke indawo lapho kugadange khona iinyawo zenu, njengombana ngathembisa uMosi.+ 4 Inarhenu izokusuka emmangweni beyiyokufika eLibhanoni nemlanjeni omkhulu iYufrathe, okutjho yoke inarha yamaRhiti+ neLwandle eliKhulu* ngetjingalanga.+ 5 Akunamuntu ozokuhlula yoke imihla yokuphila kwakho.+ Njengombana benginoMosi, ngizokuba nawe.+ Angekhe ngikulahle namkha ngikutjhiye.+ 6 Qina ube nesibindi,+ ngombana nguwe ozokwenza abantwaba bafumane inarha engafunga kibokhokho babo bona ngizobanikela yona.+
7 “Kwaphela qina ube nesibindi, utjhejisise bona wenze koke okusemThethweni uMosi incekwami akuyala ngakho. Ungaphambuki kiwo uye ngesidleni namkha ngesinceleni+ bona wenze ngokuhlakanipha nanyana kukuphi lapho uya khona.+ 8 Incwadi yomThetho le akukafuzi isuke emlonyenakho,+ kufuze uyifunde ngelizwi eliphasi* imini nobusuku bona utjhejisise, wenze nakho koke okutlolwe kiyo;+ ngalokho iindlela zakho zizokuphumelela begodu uzokwenza ngokuhlakanipha.+ 9 Akhenge ngikuyale na? Qina ube nesibindi. Ungabi nevalo namkha usabe, ngombana uJehova uZimakho unawe nanyana kukuphi lapho uya khona.”+
10 Yeke uJotjhuwa wayala iinduna zabantu wathi: 11 “Khambani ikampa yoke nitjele abantu umyalo lo, ‘Lungisani imiphako, ngombana emalangeni amathathu nizokuyama iJordani niyokuthumba inarha uJehova uZimenu aninikela yona.’”+
12 UJotjhuwa wathi kebakwaRubeni, bakwaGadi nesiquntwini sekoro yakwaManase: 13 “Khumbulani lokho uMosi inceku kaJehova aniyale ngakho:+ ‘UJehova uZimenu uninikela ukuphumula begodu uninikele nenarha le. 14 Abafazi benu, abantwabenu nefuywenu bazokuhlala enarheni uMosi aninikele yona ngakileli ihlangothi leJordani*+ kodwana noke nina eniziingorho,+ kufuze niyame ngendlela ehlelekileko njengeenqhema zamasotja phambi kwabafowenu.+ Kufuze nibasize 15 bekube kulapho uJehova anikela abafowenu ukuphumula, njengombana nani aninikele begodu bathathe inarha uJehova uZimenu abanikela yona. Ngemva kwalokho, buyelani niyokuhlala enarheni eninikelwe yona bona nihlale kiyo, inarha uMosi inceku kaJehova aninikele yona ngepumalanga yeJordani.’”+
16 Baphendula uJotjhuwa bathi: “Sizokwenza koke osiyale ngakho begodu sizokuya nanyana kukuphi lapho usithuma khona.+ 17 Njengombana salalela koke uMosi akutjhwileko, nawe sizokulalela. Kwaphela kwanga uJehova uZimakho angaba nawe njengombana bekanoMosi.+ 18 Nanyana ngubani ophikisana nomyalwakho begodu angalaleli yoke imiyalo omnikela yona, uzokubulawa.+ Kwaphela qina ube nesibindi.”+