Yesibili YeenKronike
15 Nje-ke ummoya kaZimu waba phezu kwaka-Azariya indodana ka-Odedi. 2 Yeke waphuma wayokuhlangabeza u-Asa, wafese wathi kuye: “Akhungilalele Asa nani noke bantu bakwaJuda nabakwaBhenjamini! UJehova uzokuba nani kwaphela nange nihlala ningakuye+ begodu nange nimfuna uzokwenza bona nimfumane,+ kodwana nange nimtjhiya naye uzonitjhiya.+ 3 Abantu bakwa-Israyeli bahlezi isikhathi eside bangalotjhi uZimu weqiniso, banganamphristi ozabafundisa begodu bangaphili ngomthetho.+ 4 Nokho ngesikhathi bagandelelekile babuyela kuJehova uZimu wakwa-Israyeli, bamfuna begodu wenza bona bamfumane.+ 5 Ngesikhatheso bekungakaphephi ukukhamba ngebanga lokuthi bekunganakuthula phakathi kwezakhamuzi zeendawo zakwa-Israyeli. 6 Isitjhaba besibulala esinye isitjhaba, idorobho libulala elinye idorobho, ngombana uZimu bekasolo abenza bahlangahlangane ngemiraro ehlukahlukeneko.+ 7 Kodwana nina qinani begodu ningapheli amandla*+ ngombana nizowufumana umvuzo walokho enikwenzako.”
8 Kwathi ngemva kokuthi u-Asa ezwe amezwi la nesiphorofido saka-Odedi, waba nesibindi begodu wasusa iinthombe ezinyenyisako kiyo yoke inarha yakwaJuda,+ yakwaBhenjamini nemadorobheni awathumba esifundeni seentaba sakwa-Efrayimu. Wavuselela ne-aldara lakaJehova ebeliphambi kwethuri lendlu kaJehova.+ 9 Yeke wahlanganisa boke abantu bakwaJuda, bakwaBhenjamini nabo boke abantu abavela kwezinye iinarha abahlala kwa-Efrayimu, kwaManase nakwaSimiyoni.+ Beza kuye basuka kwa-Israyeli ngobunengi babo ngombana babona ukuthi uJehova uZimakhe unaye. 10 Bahlangana eJerusalema ngenyanga yesithathu yomnyaka we-15 wokubusa kwaka-Asa. 11 Mhlokho benza umhlatjelo kuJehova ngezinto abazifumene epini, ngeenkomo ezima-700 nezimvu ezizii-7 000. 12 Godu benza isivumelwano sokuthi bazokulotjha* uJehova uZimu wabokhokho babo ngeenhliziyo zabo zoke nangomphefumulwabo* woke.+ 13 Yeke nanyana ngubani obekangekhe alotjhe uJehova uZimu wakwa-Israyeli bekuzokufuze abulawe, kungaba ngomncani, omdala, indoda namkha umfazi.+ 14 Barhuwelela benza isifungo kuJehova, bathabile, babetha iimbhorompita neempalapala. 15 Nje-ke boke abantu bakwaJuda bathaba ngesifungo abasenzileko ngombana basenza ngeenhliziyo zabo zoke, bazimisela ekufuneni uZimu begodu wenza bona bamfumane.+ UJehova waragela phambili nokubapha ukuphumula kikho koke.+
16 U-Asa ikosi wasusa ngitjho noMaka+ ugogwakhe esikhundleni sokuba yindlovukazi, ngombana wenza isithombe esinyenyisako bona kulotjhwe isigodo esicwengileko.*+ U-Asa waqunta isithombeso, wasiphihliza begodu wasitjhisela ngemRhobeni iKidroni.+ 17 Kodwana iindawo eziphakemeko akhenge zisuswe+ kwa-Israyeli,+ nanyana kunjalo, ihliziyo ka-Asa beyiphelele kuZimu ukuphila kwakhe koke.+ 18 Waletha ngendlini kaZimu weqiniso izinto yena noyise abazenza zacwengeka, isiliva, igolide nezitja ezihlukahlukeneko.+ 19 Akhenge kube nepi bekwaba minyaka ema-35 yokubusa kwaka-Asa.+