Eksodusi
33 UJehova waraga wathi kuMosi: “Khamba nabantwaba owabakhupha enarheni yeGibhide. Niye enarheni engafunga ku-Abrahama, u-Isaka nakuJakopo ngathi, ‘Ngizoyinikela iinzukulwana zenu.’+ 2 Ngizokuthumela ingilozi phambi kwenu+ iqothe amaKanana, ama-Amori, amaRhiti, amaPerizi, amaRhivi namaJebusi.+ 3 Khambani niye enarheni egeleza ibisi neliju+ kodwana mina angekhe ngikhambe nani ngombana ninekani+ begodu nginganitjhabalalisa endleleni.”+
4 Abantu nabezwa amezwi ahlabako la, badana khulu begodu akekho namunye owambatha izinto zokuzikghabisa. 5 UJehova wathi kuMosi: “Khuluma nama-Israyeli uthi, ‘Ninekani,+ ngesikhatjhana ngingakhamba phakathi kwenu benginitjhabalalise.+ Nje-ke ningazimbathi izinto zenu zokuzikghabisa ngombana ngisacabanga bona nginenzeni.’” 6 Kusukela eNtabeni iRhorebe ukuya phambili ama-Israyeli akhenge asambatha izinto zawo zokuzikghabisa.
7 UMosi wathatha itendakhe wayihloma ngaphandle kwekampa, kudanyana nekampa bewayibiza ngokuthi yitende yokuhlangana. Woke umuntu obekafuna ukubuza uJehova,+ bekaya etendeni lokuhlangana ebelingaphandle kwekampa. 8 Bekuthi uMosi nakaphuma ngetendeni, boke abantu basikime bajame ebungenweni bamatendabo begodu bebamqala bekayokungena ngetendeni. 9 Bekuthi uMosi nakangena ngetendeni bona uZimu akhulume naye, isika yelifu beyehla ijame ebungenweni betende.+ 10 Boke abantu nababona isika yelifu ijame ebungenweni betende, omunye nomunye bekakhothama ebungenweni betende lakhe. 11 UJehova wakhuluma noMosi ubuso nobuso+ njengombana umuntu angakhuluma nomunye. Lokha uMosi nakabuyela ngekampeni, uJotjhuwa+ indodana kaNuni umsizakhe bekangaphumi ngetendeni.+
12 Nje-ke uMosi wathi kuJehova: “Qala, uthi kimi, ‘Khuphuka nabantwaba’ kodwana awukangitjeli bona ngizokukhamba nobani. Ngaphezu kwalokho uthe, ‘Ngikukhethile bengikwamukele.’* 13 Nangabe ungamukele, ngibawa ungenze ngazi iindlela zakho,+ ukwenzela bona ngikwazi begodu ngihlale ngamukeleka kuwe. Ungalibali nokuthi isitjhabesi ngesakho.”+ 14 Nje-ke uZimu wathi: “Ngizokukhamba nawe+ begodu ngizokwenza ube nokuthula.”+ 15 UMosi wathi kuye: “Nangabe awukhambi nathi, ungasisusi endaweni le. 16 Alo, kuzokwazeka njani bona mina nabantu bakho usamukele? Angeze kwazeke na ngokuthi wena ukhambe nathi+ bona singafani nabantu abaphila ephasini?”+
17 UJehova waraga wathi kuMosi: “Ngizokwenza nalokho okubawileko ngombana ngikwamukele begodu ngikwazi kuhle.”* 18 Yeke uMosi wathi: “Ngibawa ungitjengise iphazimulwakho.” 19 Kodwana uZimu wathi: “Ngizokwenza ubone ubuhle bami, ngizokumemezela bona igama lami nginguJehova+ begodu ngizokukhetha engimthandako, ngibe nomusa kiloyo engizomkhetha.”+ 20 UZimu waraga wathi: “Angeze wabubona ubuso bami ngombana akunamuntu ongangibona begodu aphile.”
21 Godu uJehova wathi: “Nasi indawo hlanu kwami. Hlala elitjeneli. 22 Nje-ke nakudlula iphazimulwami, ngizokufaka ngerholweni begodu ngizokusitha ngesandla sami bengidlule. 23 Ngemva kwalokho, ngizokususa isandla sami begodu uzokubona umgogodlhami kodwana ubuso bami angekhe ububone.”+