Duteronomi

4 “Nina ma-Israyeli, lalelani iinqophiso nemithetho enginifundisa yona, niyenze khona nizokuphila,+ nikhambe nithathe inarha uJehova uZimu wabokhokho benu aninikela yona bona ibe lilifa lenu. 2 Ningangezeleli litho namkha niphungule kilokhu enginiyala ngakho,+ lalelani imithetho kaJehova uZimenu enginiyala ngayo.

3 “Nikubonile lokho uJehova akwenza endabeni kaBhali wePewori; uJehova uZimenu watjhabalalisa woke umuntu hlangana nani obekalandela uBhali wePewori.+ 4 Kodwana nina enisakakarele kuJehova uZimenu nisaphila noke namhlanjesi. 5 Qalani, nginifundise iinqophiso nemithetho+ njengombana uJehova uZimami angiyalile bona niyilalele enarheni enizoyithatha bona ibe ngeyenu. 6 Kufuze nilalele koke lokhu ngokutjhejisisa+ ngombana abantu abazokuzwa ngeenqophiswezi bazokubona ukuthi nihlakaniphile+ beniyazwisisa,+ bazokuthi, ‘Abantwaba bahlakaniphile begodu bayazwisisa.’+ 7 UJehova uZimethu uyasizwa qobe nasithandaza kuye, sikhona na isitjhaba esikhulu abozimu baso abaseduze naso?+ 8 Ngisiphi isitjhaba esikhulu esineenqophiso nemithetho elungileko, njengomThetho lo engininikela wona namhlanjesi?+

9 “Zitjhejeni beniqiniseke bona anizilibali izinto enazibonako ukuthi zingasuki eenhliziyweni zenu ukuphila kwenu koke. Kufuze nizitjele amadodanenu neenzukulwana zenu.+ 10 Ngelanga enajama ngalo phambi kwakaJehova uZimenu eRhorebe, uJehova wathi kimi, ‘Hlanganisa abantu phambi kwami bona bezwe amezwami,+ bafunde ukungisaba+ kikho koke ukuphila kwabo begodu bafundise namadodanabo.’+

11 Nje-ke natjhidela najama hlanu kwentaba, intaba beyivutha, umlilo wakhona ufika ezulwini, bekumnyama kunelifu elinzima.+ 12 UJehova wakhuluma nani asemlilweni.+ Nezwa umuntu akhuluma kodwana akhenge nimbone,+ nezwa ilizwi kwaphela.+ 13 Wanitjela isivumelwano sakhe,+ aniyala bona nisilalele okumiYalo eliTjhumi.+ Ngemva kwalokho, wayitlola ematjeni amabili.+ 14 Ngesikhatheso uJehova wangiyala bona nginifundise iinqophiso nemithetho okufuze niyilalele enarheni enizokungena kiyo.

15 “Ngelanga uJehova akhuluma nani eRhorebe aphakathi komlilo, akhenge nimbone, nje-ke zitjhejeni 16 bona ningaziphathi ngendlela ekhohlakeleko nizenzele iinthombe ezibaziweko, ezimfanekiso wananyana yini, ezijamele indoda namkha umfazi,+ 17 umfanekiso wananyana ngisiphi isilwana sephasini namkha umfanekiso wananyana ngiyiphi inyoni,+ 18 umfanekiso wananyana yini erhurhubako namkha umfanekiso wananyana ngiyiphi ihlambi.+ 19 Naniqala phezulu nibona loke ibutho lezulwini, ilanga, inyezi neenkwekwezi, ningayengeki bona nizikhothamele benizilotjhe.+ UJehova uZimenu uzidalele boke abantu ephasini. 20 UJehova wanikhupha emlilweni wokuncibilikisa isimbi eGibhide, bona nibe babantu bakhe abakhethekileko+ njengombana ningibo namhlanjesi.

21 UJehova wasilingeka ngami ngebanga lenu,+ wafunga ukuthi angeze ngiyamele ngale kweJordani namkha ngiye enarheni ehle uJehova uZimenu aninikela yona bona ibe lilifa lenu.+ 22 Mina ngizokufela enarheni le; angekhe ngiyame iJordani+ kodwana nina nizoyiyama benithathe inarha ehle le bona ibe ngeyenu. 23 Ningasilibali isivumelwano uJehova uZimenu asenze nani,+ ningazenzeli isithombe esibaziweko sananyana yini uJehova uZimenu athe ningayenzi.+ 24 Ngombana uJehova uZimenu umlilo otjhabalalisako,+ unguZimu ofuna kulotjhwe yena yedwa.+

25 “Nange nihlezi isikhathi eside enarheni naba nabantwana neenzukulu, nenza ngokukhohlakeleko, nazenzela isithombe esibaziweko+ sananyana yini begodu nenza into embi kuJehova uZimenu bona nimzwise ubuhlungu,+ 26 ngithatha izulu nephasi bona zibe bofakazi bami ngokujamelene nani namhlanjesi ukuthi nangambala nizokutjhabalala msinya enarheni eniyama iJordani bona niyoyithatha. Angekhe nihlale kiyo isikhathi eside, nizokutjhatjalaliswa.+ 27 UJehova uzoniqothela eentjhabeni,+ bambalwa abazokusinda+ eentjhabeni uJehova azoniqothela kizo. 28 Lapho nizokulotjha abozimu abenziwe ngeengodo, ngamatje, abenziwe babantu,+ abozimu abangaboniko, abangezwako, abangadliko nabanganukeleliko.

29 “Nanifuna uJehova uZimenu lapho, nizomfumana,+ nanimfuna ngeenhliziyo zenu zoke nangemiphefumulwenu* yoke.+ 30 Esikhathini esizako nanisebuhlungwini begodu zoke izintwezi zenzeke kini, nizokubuyela kuJehova uZimenu nilalele ilizwi lakhe.+ 31 Ngombana uJehova uZimenu, unguZimu onomusa.+ Angekhe anilahle, angekhe anitjhabalalise namkha alibale isivumelwano asifunga kibokhokho benu.+

32 “Nje-ke buzani ngezinto ezenzeka esikhathini esidlulileko, ngaphambi kobana nibe khona; kusukela ngelanga uZimu adala ngalo umuntu ephasini, funisisani kusukela komunye umkhawulo wephasi ukuya komunye. Into ekulu kangaka yakhe yenzeka namkha ukhona na okhe wezwa ngayo?+ 33 Bakhona na abanye abantu abakhe bezwa ilizwi lakaZimu likhuluma emlilweni ngendlela enalizwa ngayo begodu baragela phambili baphila?+ 34 Kghani uZimu wakhe walingeka bona azithathele isitjhaba hlangana nesinye isitjhaba ngezahlulelo, ngamatshwayo, ngemmangaliso,+ ngepi,+ ngesandla esinamandla,+ ngomkhono onamandla nangezinto ezithusako,+ njengombana uJehova uZimenu anenzela eGibhide phambi kwenu? 35 Nina natjengiswa izintwezi bona nazi ukuthi uJehova unguZimu weqiniso,+ akakho omunye ngaphandle kwakhe.+ 36 Wanenza nezwa ilizwi lakhe lisuka ezulwini bona anilungise, wanenza nabona umlilo omkhulu ephasini, nezwa namezwakhe aphuma emlilweni.+

37 “Ngebanga lokuthi bekabathanda abokhokho benu, wakhetha iinzukulwana zabo bona zibe babantu bakhe,+ wakhamba nani lokha nakanikhupha eGibhide ngamandlakhe amakhulu. 38 Waqotha phambi kwenu iintjhaba ezikulu nezinamandla kunani bona anilethe enarhenazo begodu aninikele inarhazo ibe lilifa lenu njengombana kunjalo namhlanjesi.+ 39 Namhlanjesi, kufuze nazi benikhumbule ukuthi uJehova unguZimu weqiniso ezulwini nephasini.+ Akekho omunye.+ 40 Kufuze nilalele iinqophiso nemiyalwakhe enginiyala ngayo namhlanjesi, khona kuzanikhambela kuhle nina namadodanenu bona niphile isikhathi eside enarheni uJehova uZimenu aninikela yona.”+

41 Khonokho uMosi wakhetha amadorobho amathathu angepumalanga yeJordani.+ 42 Nange umuntu abulala omunye umuntu angakahlosi begodu angakhenge amhloye,+ kufuze abalekele kwelinye lamadorobho la, angekhe abulawe.+ 43 Idorobho iBhetseri+ elisemmangweni osembundwini lizokuba ngelabakwaRubeni, iRamothi+ eseGiliyadi izokuba ngeyakwabaGadi, iGolana+ eseBhatjhani izokuba ngeyabakwaManase.+

44 Lo, mThetho+ uMosi awunikela abantu bakwa-Israyeli. 45 Lezi ziinkhumbuzo, iinqophiso, nemithetho uMosi ayinikela ama-Israyeli ngemva kokuphuma eGibhide,+ 46 esifundeni seJordani, emrhobeni oqalene neBhethe-Pewori,+ enarheni kaSirhoni iKosi yama-Amori obekahlala eRhetjhibhoni+ loyo uMosi nama-Israyeli abamhlulako nabaqeda ukuphuma eGibhide.+ 47 Bathatha inarhakhe nenarha ka-Ogi iKosi+ yeBhatjhani, amakhosi amabili wama-Amori ebewahlala esifundeni esingepumalanga yeJordani, 48 Ukusuka e-Aroweri+ esemkhawulweni womRhoba i-Arinoni, ukukhuphukela eNtabeni iSiwoni okuyiRherimoni,+ 49 naso soke isifunda se-Araba esisepumalanga yeJordani, ukuyokufika eLwandle le-Araba, ekuthomeni kwemikhuphukela yePisiga.+