USamyela Wokuthoma
28 Emihleni leyo amaFilista ahlanganisa amabuthwawo bona ayokulwa no-Israyeli.+ Yeke u-Akhitjhi wathi kuDavida: “Uyazi angithi ukuthi wena nabantu bakho kufuze nikhambe nami epini?”+ 2 UDavida waphendula u-Akhitjhi wathi: “Wazi kuhle ukuthi isisebenzi sakho sizokwenzani.” U-Akhitjhi wathi kuDavida: “Kungebangelo ngizokubeka bona ube ngunogadami unomphela.”+
3 Nje-ke uSamyela bekahlongakele, woke ama-Israyeli bewamlilele begodu ambulunga eRama, okulidorobho ebekavela kilo.+ USawula bekasuse zoke izangoma nababikezeli bekusasa enarheni.+
4 AmaFilista ahlangana, akhamba ayokuhloma ikampa eTjhunemu.+ Nje-ke uSawula wahlanganisa u-Israyeli woke begodu bahloma ikampa eGilibowa.+ 5 Kwathi uSawula nakabona ikampa yamaFilista, wathukwa begodu ihliziywakhe yabetha ngamandla.+ 6 Ngitjho nanyana uSawula bekabuza uJehova,+ uJehova bekangamphenduli, kungaba ngamabhudango, nge-Urimi+ namkha ngabaphorofidi. 7 Ekugcineni uSawula wathi eensebenzini zakhe: “Ngifunelani umfazi osisangoma,+ ngizokuya ngiyokubuza kuye.” Iinsebenzi zakhe zathi: “Qala! Kunomfazi osisangoma e-Eni-Dori.”+
8 Yeke uSawula wazifihla bewambatha ezinye izambatho watjhinga emfazini loyo ebusuku, akhamba nabantu bakhe ababili. Wathi kuye: “Ngibawa uthukule ngokusebenzisa ubungoma bakho,+ ungibizele loyo engizokutjela yena.” 9 Kodwana umfazi lo wathi kuye: “Kufuze bona uyakwazi okwenziwe nguSawula, ukuthi uzisuse njani izangoma nababikezeli bekusasa enarheni.+ Alo kubayini ulinga ukungithiya bona ngibulawe?”+ 10 Yeke uSawula wafunga kuye ngoJehova, wathi: “Ngifunga ngoJehova uZimu ophilako, angekhe ube mlandu endabeni le!” 11 Ngalokho umfazi lo wathi: “Ngikubizele bani?” Wathi: “Ngibizela uSamyela.” 12 Kwathi umfazi lo nakabona “uSamyela,”*+ warhuwelela ngelizwi lakhe loke wathi kuSawula: “Ungikhohliseleni? UnguSawula!” 13 Ikosi yathi kuye: “Ungasabi kodwana ubonani?” Umfazi wathi kuSawula: “Ngibona othileko onjengozimu akhuphuka aphuma ephasini.” 14 Khonokho uSawula wambuza wathi: “Uqaleka njani?” Umfazi wathi: “Liqhegu elikhuphukako, limbethe ijasi enganamikhono.”+ Yeke uSawula walemuka ukuthi “bekunguSamyela,” wakhothama wahloma ihloko phasi bewaguqa.
15 “USamyela” wathi kuSawula: “Ungithikaziselani ngokwenza bona ngibizwe?” USawula wathi: “Ngisemrarweni omkhulu. AmaFilista alwa nami, uZimu ungitjhiyile begodu akasangiphenduli, kungaba ngabaphorofidi namkha ngamabhudango;+ kungebangelo ngibiza wena bona uzongitjela ukuthi ngenzeni.”+
16 “USamyela” wathi: “Kubayini sewubuza mina nje njengombana uJehova sekakutjhiyile+ begodu sekaphikisana nawe? 17 UJehova uzozenzela lokho akubikezela ngami: UJehova uzokuhluthula umbuso esandleni sakho awunikele omunye umuntu, uDavida.+ 18 Ngebanga lokuthi azange ulalele ilizwi lakaJehova begodu azange uveze ilaka lakhe elivuthako kuma-Amalekhi,+ kungebangelo uJehova akwenza lokhu namhlanjesi. 19 Godu uJehova uzokunikela wena no-Israyeli esandleni samaFilista,+ kusasa wena+ namadodanakho+ nizabe ninami. UJehova uzokunikela nebutho lakwa-Israyeli ezandleni zamaFilista.”+
20 Khonokho uSawula wawa warabhalala phasi bewathukwa khulu ngebanga lamezwi “kaSamyela.” Bekangasanamandla ngombana bekangakadli ilanga loke nobusuku boke. 21 Umfazi loya nakafika kuSawula abona nokuthi utshwenyeke khulu, wathi kuye: “Isisebenzi sakho sikulalele lokho okutjhoko, ngifake ukuphila kwami+ engozini ngenza lokho ongitjele khona. 22 Nje-ke ngibawa ulalele lokho okutjhiwo sisebenzi sakho. Ngivumela ngibeke uburotho phambi kwakho bese uyadla ukwenzela bona ube namandla wokubona oze ngayo.” 23 Kodwana wala wathi: “Angekhe ngidle.” Nanyana kunjalo, iinsebenzi zakhe nomfazi lo basolo bamncenga. Ekugcineni wabalalela, wavuka phasi wahlala embhedeni. 24 Umfazi lo bekanethole elinonisiweko ngendlini, yeke walihlaba* msinyana begodu wathatha iflowuru wabhica ihlama wabhaga uburotho obunganasibiliso. 25 Wanikela uSawula neensebenzi zakhe, badla. Ngemva kwalokho basikima bakhamba ebusuku.+