Yesibili YeenKronike
3 Nje-ke uSolomoni wathoma ukwakha indlu kaJehova+ eJerusalema eNtabeni iMoriya,+ lapha uJehova abonakala khona kuyise uDavida,+ endaweni eyalungiselelwa nguDavida, eselelweni saka-Orinani+ umJebusi. 2 Wathoma ukwakha ngelanga lesibili lenyanga yesibili, ngomnyaka wesine wokubusa kwakhe. 3 Isisekelo esabekwa nguSolomoni sokwakha indlu kaZimu weqiniso besimakhubhithi ama-60 ubude namakhubhithi ama-20 ububanzi,+ ngokwesilinganiso saphambilini.* 4 Ithuri elingaphambili belimakhubhithi ama-20 ubude, lilingana nobubanzi bendlu, ukuphakama kwalo bekuli-120;* walisinda ngaphakathi ngegolide elicwengileko.+ 5 Wanameka indlu ekulu ngesigodo somjunipha, wayisinda ngegolide+ lezinga eliphezulu, ngemva kwalokho wayikghabisa ngemigwalo+ yomuthi wesundu neenketani.+ 6 Ngaphezu kwalokho, wakghabisa indlu ngamatje amahle aligugu;+ igolide alisebenzisako bekuligolide+ elivela eParivayimu. 7 Wasinda indlu, iingodo zephahla, iindawo zokungena, amaboda neminyangwayo ngegolide;+ wagwala imifanekiso yamakherubhi ngokugobhodlha emabodeni.+
8 Ngemva kwalokho, wenza ilawu eliCwengeke Khulu;+ ubude balo balingana nobubanzi bendlu, bumakhubhithi ama-20, ububanzi balo bebumakhubhithi ama-20. Walisinda ngegolide lezinga eliphezulu elimatalende* ama-600.+ 9 Ubudisi begolide leempikiri bebumatjhekeli* ama-50; wasinda amalawu asephahleni ngegolide.
10 Ngemva kwalokho, ngaphakathi kwelawu eliCwengeke Khulu, wabaza amakherubhi amabili, wawasinda ngegolide.+ 11 Sebuboke ubude bamaphiko wamakherubhi+ bebumakhubhithi ama-20; iphiko linye lekherubhi lokuthoma belimakhubhithi amahlanu ubude begodu belithinta ebodeni lendlu, elinye iphiko lalo belimakhubhithi amahlanu ubude, lithinta elinye lamaphiko welinye ikherubhi. 12 Iphiko linye lelinye ikherubhi belimakhubhithi amahlanu ubude begodu lithinta elinye iboda lendlu, kuthi elinye iphiko lalo limakhubhithi amahlanu ubude begodu lithinta elinye lamaphiko wekherubhi lokuthoma. 13 Amaphiko wamakherubhi la bewaluleke aba makhubhithi ama-20; bewajame ngeenyawo zawo, aqale ngaphakathi.*
14 Godu wenza irharideni ngerhara+ ehlaza komkayi, ngewulu esipiridzana, ngewulu etleberede nangetjhila lezinga eliphezulu, wagwala nomgwalo wamakherubhi kilo.+
15 Ngemva kwalokho, wenza iinsika ezimbili+ phambi kwendlu, zimakhubhithi ama-35 ubude, ipundu ephezu kwesika ngayinye beyimakhubhithi amahlanu.+ 16 Godu wenza iinketani ezinjengemigejiso yentanyeni, wazibeka phezu kweensika, wenza amarharinada ali-100, wawabeka phezu kwamaketani. 17 Wajamisa iinsika phambi kwethempeli, enye ngesidleni* enye ngesinceleni;* engesidleni wayithiya ngokuthi yiJakini,* engesinceleni wayithiya ngokuthi yiBhowazi.*