Yesibili YamaKhosi
12 Ngomnyaka wekhomba wokubusa kwakaJehu,+ uJowatjhi+ waba yikosi, wabusa iminyaka ema-40 eJerusalema. Igama lakanina bekunguTsibiya weBheritjheba.+ 2 UJowatjhi waraga nokwenza okuhle emehlweni kaJehova phakathi naso soke isikhathi uJehoyada umphristi amumelulekakhe. 3 Kodwana iindawo eziphakemeko+ akhenge zisuswe, abantu bebasenza imihlatjelo begodu bathunyisa intuthu yomhlatjelo eendaweni eziphakemeko.
4 UJowatjhi wathi kubaphristi: “Thathani yoke imali yeminikelo ecwengileko elethwa endlini kaJehova,+ imali yomthelo womuntu ngamunye,+ imali enikelwe njengesilinganiso sentengo yomuntu, nayo yoke imali umuntu ngamunye ayilethe endlini kaJehova ngokusuka ehliziywenakhe.+ 5 Abaphristi bazoyithatha ngokwabo ebantwini abanikelako, bayisebenzisele ukulungisa indlu nanyana kukuphi lapho kunomonakalo khona.”+
6 Ngomnyaka wama-23 weKosi uJowatjhi, abaphristi bebangakabi ukuwulungisa umonakalo wendlu.+ 7 Yeke iKosi uJowatjhi, yabiza uJehoyada+ umphristi nabanye abaphristi yathi kibo: “Kubayini ningalungisi umonakalo wendlu? Nje-ke ningasathatha imali ebantwini abazokunikela, ngaphandle kokuthi isetjenziselwe ukulungisa indlu.”+ 8 Yeke abaphristi bavuma ukungasathathi imali ebantwini nokuthi kungasabi mthwalwabo ukulungiswa kwendlu.
9 UJehoyada umphristi wathatha ikasi+ wavula imbobo esivalweni salo, walibeka eduze ne-aldara, ngesidleni sobungeno bendlu kaJehova. Abaphristi ababalindisango bekufuze bayifake lapho yoke imali ebeyilethwa endlini kaJehova.+ 10 Qobe nababona ukuthi sekunemali enengi ngekasini, unobhala wekosi nomphristi ophakemeko bebeza bayibuthelele* begodu babale imali elethwe endlini kaJehova.+ 11 Bebathatha imali ebaliweko leyo bayinikele labo abaphathiswe umsebenzi owenziwa endlini kaJehova. Bona bebabhadela abasebenza ngekhuni nabakhi ebebasebenza endlini kaJehova,+ 12 nalabo abakha ngamatje nabasiki bamatje. Bathenga iingodo namatje asikiweko bona balungise umonakalo endlini kaJehova begodu basebenzisa imali leyo ukubhadela nazo zoke ezinye iindleko zokulungisa indlu.
13 Kodwana ayikho imali eyalethwa endlini kaJehova eyasetjenziselwa ukwenza izitja zokuhlambela zesiliva, iincimamlilo, iinkotlelo, iimbhorompita+ namkha nanyana ngiyiphi into yegolide namkha yesiliva yendlu kaJehova.+ 14 Beyinikelwa kwaphela labo abenza umsebenzi, balungisa ngayo indlu kaJehova. 15 Amadoda ebebawanikela imali bona ayinikele iinsebenzi bebangawabuzi ukuthi enzeni ngemali ngombana bekumadoda athembekileko.+ 16 Kodwana imali yeminikelo yomlandu+ nemali yeminikelo yesono beyingalethwa endlini kaJehova; bekungeyabaphristi.+
17 Ngesikhatheso uRhazayeli+ iKosi yeSiriya wakhuphuka wayokulwa neGathi,+ wayithumba, ngemva kwalokho waqunta ukusahlela iJerusalema.+ 18 Yeke, ikosi yakwaJuda uJowatjhi yathatha yoke iminikelo ecwengileko eyacwengiswa bokhokho bayo uJehotjhafathi, uJehoramu no-Arhaziya amakhosi wakwaJuda, kuhlanganise neyakhe iminikelo ecwengileko nalo loke igolide ebelisemabulungelweni wamagugu wendlu kaJehova newendlu yekosi,* yayithumela kuRhazayeli ikosi yeSiriya.+ Ngalokho uRhazayeli akhenge asasahlela iJerusalema.
19 Malungana nawo woke omunye umlando kaJowatjhi, koke akwenzileko, akukatlolwa na encwadini yomlando weenkhathi zamakhosi wakwaJuda? 20 Nanyana kunjalo, iinsebenzi zakhe zahlanganyela ekulukeni amano wokumsahlela+ begodu zamsahlela endlini yeNdunduma,*+ endleleni eyehlela eSila. 21 Iinsebenzi zakhe ezamsahlelako bezambulala nguJozakhari indodana kaTjhimeyati noJehozabadi indodana kaTjhomeri.+ Bambulunga nabokhokho bakhe eDorobheni lakaDavida, indodanakhe u-Amaziya yaba yikosi esikhundleni sakhe.+