Yesibili YeenKronike
14 Ngemva kwalokho, u-Abhiya walaliswa nabokhokho bakhe, bambulunga eDorobheni lakaDavida;+ indodanakhe u-Asa yaba yikosi esikhundleni sakhe. Nayithoma ukubusa, inarha yaba nokuthula* iminyaka elitjhumi.
2 U-Asa wenza okuhle nokulungileko emehlweni kaJehova uZimakhe. 3 Wasusa ama-aldara wabozimu+ abatjhili neendawo eziphakemeko, waphihliza iinsika ezicwengileko,+ waqunta neengodo ezicwengileko.*+ 4 Ukungezelela kilokho, watjela uJuda bona alotjhe* uJehova uZimu wabokhokho babo begodu aphethe umThetho nakho koke abatjela ukuthi bakwenze. 5 Nje-ke wasusa emadorobheni woke wakwaJuda iindawo eziphakemeko ne-aldara lepepho+ begodu ngaphasi kokubusa kwakhe, umbuso waraga ngaphandle kokuthikanyezwa. 6 Wakha amadorobho avikelekileko kwaJuda,+ ngombana inarha beyinganalitho eliyithikamezako begodu bekunganapi hlangana neminyaka le ngombana uJehova wamupha ukuphumula.+ 7 Wathi kuJuda: “Asakheni amadorobho la, siwakampele ngamaboda nangemibhotjhongo,+ ngamasango nangeensimbi. Inarha le isesengeyethu ngombana sifune uJehova uZimethu. Simfunile bese wasinikela ukuphumula mahlangothi woke.” Nje-ke umsebenzabo wokwakha waphumelela.+
8 U-Asa bekanebutho lamadoda azii-300 000 avela kwaJuda, ahlome ngeemviko ezikulu nemikhonto. KwaBhenjamini bekuneengorho ezizii-280 000 ziphethe iimviko ezincani* begodu zihlome ngemisebe.+
9 Ngokukhamba kwesikhathi, uZerarhi umTopiya weza azokulwa nabo anebutho lamadoda asi-1 000 000 neenkarana ezima-300.+ Nakafika eMaretjha,+ 10 u-Asa waphuma ayokulwa naye begodu bajama ngendlela ehlelekileko njengeenqhema zamasotja eMrhobeni weTsefata eMaretjha. 11 Nje-ke u-Asa wabiza uJehova uZimakhe,+ wathi: “Jehova, kuwe akukaqakatheki ukuthi labo obasizako banengi namkha abanamandla.+ Jehova Zimethu, sisiza ngombana sithembele kuwe,+ ngegama lakho size bona sizokulwa nesiqubuthwesi.+ Jehova unguZimethu. Ungavumeli umuntu ofako akuhlule.”+
12 Nje-ke uJehova wahlula amaTopiya phambi kwaka-Asa naphambi kwakaJuda begodu amaTopiya abaleka.+ 13 U-Asa nabantu egade akhamba nabo bawagijimisa bafika eGerari,+ amaTopiya bekasolo awa bese ahlongakala woke ngombana atjhatjalaliswa nguJehova nebutho lakhe. Ngemva kwalokho, bazithathela izinto ezinengi khulu ezifunyenwe epini. 14 Ukungezelela kilokho, bakghone ukuhlula woke amadorobho abhode iGerari ngombana uJehova wenza amadorobho lawo afikelwa kusaba, baphanga woke amadorobho ngombana bekukunengi ebebangakuthatha lapho. 15 Godu basahlela namatende walabo abanefuyo, bathumba imihlambi eminengi khulu namakamela, ngemva kwalokho babuyela eJerusalema.