Yokuthoma YeenKronike
26 Iingaba zabalindisango+ bezingalendlela: kumaKhorarhi, bekunguMetjhelemiya+ indodana kaKhore wamadodana ka-Asafa. 2 UMetjhelemiya bekanamadodana: BekunguZakariya izibulo, uJediyeli angowesibili, uZebadiya angowesithathu, uJatiniyeli angowesine, 3 u-Elamu angowesihlanu, uJehorhanani angowesithandathu, u-Eliyowenayi angowekhomba. 4 U-Obede-Edomu bekanamadodana: BekunguTjhemaya izibulo, uJehozabadi angowesibili, uJowarhi angowesithathu, uSakari angowesine, uNetaneli angowesihlanu, 5 u-Amiyeli angowesithandathu, u-Isakari angowekhomba begodu uPewuletayi angewobunane ngombana uZimu wambusisa.
6 Endodanenakhe uTjhemaya, kwabelethwa amadodana ebewababusi bekorwabo ngombana bewamadoda anamandla nobukghoni. 7 Amadodana kaTjhemaya: Ngu-Otini, uRefayeli, u-Obede no-Elizabadi begodu abafowabo u-Elihu noSemakiya nabo bebamadoda anobukghoni. 8 Boke laba bekungebamadodana ka-Obede-Edomu; wona namadodanawo nabafowabo bebamadoda anobukghoni nafanelekela umsebenzi, sebaboke abangebaka-Obede-Edomu bebama-62. 9 UMetjhelemiya+ bekanamadodana nabafowabo, bekumadoda anobukghoni ali-18. 10 URhosa wamadodana kaMerari bekanamadodana. UTjhimri bekayihloko, ngitjho nanyana bekangasilizibulo, uyise wambeka bona abe yihloko, 11 uRhilikhiya angowesibili, uThebaliya angowesithathu, uZakariya angowesine. Woke amadodana nabafowabo bakaRhosa bebali-13.
12 Eengabeni zabalindisangwezi, iinhloko bezinemisebenzi njengabafowabo, wokusebenza endlini kaJehova. 13 Benza iimfumbe+ ngaphandle kokukhetha omncani nomkhulu ngokwekorwabo, benzela isango elinye nelinye. 14 Nje-ke ifumbe yepumalanga yawela kuTjhelemiya. Yadla indodanakhe uZakariya, umluleki onelemuko, benza iimfumbe begodu ifumbe yakhe yaphumela etlhagwini. 15 Ka-Obede-Edomu yawela esewula begodu amadodanakhe+ abelwa iinlulu. 16 KaTjhupimu nekaRhosa+ zawela etjingalanga, hlanu kweSango leTjhalekethi ngendleleni ekulu ekhuphukako, kunesiqhema sabonogada ngapha nangapha; 17 bekunamaLevi asithandathu ngepumalanga; ngetlhagwini, bekunamane qobe langa; ngesewula, bekunamane qobe langa; ngeenlulwini+ bekunamabili eqadi kwamanye amabili; 18 ngemathurini angetjingalanga, bebabane endleleni ekulu+ begodu bababili ngemathurini. 19 Lezi bekuziingaba zabalindisango kusuka emadodaneni wamaKhorarhi newamaMerari.
20 Malungana namaLevi, u-Arhiya bekangamele amabulungelo wamagugu wendlu kaZimu weqiniso namabulungelo wamagugu wezinto ezenziwe zacwengeka.*+ 21 Emadodaneni kaLadani, okumadodana womGeritjhoni avela kuLadani, iinhloko zekoro kaLadani umGeritjhoni bekunoJerhiyeli,+ 22 namadodana kaJerhiyeli, uZethamu nomfowabo uJuweli. Bebangamele amabulungelo wamagugu wendlu kaJehova.+ 23 Ukusuka kuma-Amramu, amaJitsihari, amaRhebroni nama-Uziyeli,+ 24 uTjhebuyeli indodana kaGeritjhomu indodana kaMosi bekamrholi ongamele iinlulu. 25 Abafowabo, ebebaziinzukulwana zaka-Eliyezeri,+ bekunguRerhabiya,+ uJosaya, uJoramu, uZikiri noTjhelomothi. 26 UTjhelomothi lo nabafowabo bebangamele woke amabulungelo wamagugu wezinto ezenziwe zacwengeka,+ lezo iKosi uDavida,+ iinhloko zeenkoro,+ iinduna zeenkulungwana nezamakhulu, neenduna zebutho ebezizenze zacwengeka. 27 Ingcenye yezinto ezifunyenwe epini+ bayenza yacwengeka bona kutlhogonyelwe indlu kaJehova; 28 kuhlanganise nakho koke uSamyela umboni wemibono,+ uSawula indodana kaKhitjhi, u-Abineri+ indodana kaNeri noJowabi+ indodana kaTseruya+ ebebakwenze kwacwengeka. Koke umuntu ebekakwenze kwacwengeka kwabekwa ngaphasi kwetjhejo lakaTjhelomithi nabafowabo.
29 KumaJitsihari,+ uKenaniya namadodanakhe bebabelwe izabelo ezihlukahlukeneko ngaphandle kwendlu kaZimu bona babe baphathi nabahluleli+ kwa-Israyeli.
30 KumaRhebroni,+ uRhatjhabiya nabafowabo, amadoda anobukghoni ayi-1 700, bewangamele kwa-Israyeli esifundeni setjingalanga yeJordani bangamele woke umsebenzi kaJehova nomsebenzi wekosi. 31 KumaRhebroni, uJeriya+ bekayihloko yamaRhebroni ngokwerhelo lokulandelana kweenzukulwana zekorwawo. Ngomnyaka wama-40 wokubusa kwakaDavida,+ kwafunwa amadoda anamandla nanobukghoni begodu afunyanwa hlangana nabo eJazeri+ eGiliyadi. 32 Isibalo sabafowabo bekumadoda anobukghoni azii-2 700, iinhloko zeenkoro. Nje-ke iKosi uDavida yababela bona baphathe bakwaRubeni, bakwaGadi nengcenye yekoro kaManase, malungana nazo zoke iindaba zakaZimu weqiniso neendaba zekosi.