Nerhemiya
8 Nje-ke boke abantu bahlangana ngomnqopho munye etatawini eliphambi kweSango laManzi,+ batjela u-Ezra+ umkopululi* bona alethe incwadi yomThetho kaMosi,+ lowo uJehova ayala ngawo ama-Israyeli.+ 2 Ngalokho, ngelanga lokuthoma lenyanga yekhomba, u-Ezra umphristi weza nomThetho phambi kwebandla lamadoda,+ labafazi nelabo boke ebebakghona ukulalela bebazwisise.+ 3 Wawufunda ngokuzwakalako+ phambi kwetatawu eliphambi kweSango laManzi, kusukela nakuphuma ilanga bekwaba semini ekulu, afundela amadoda, abafazi nabo boke abangakghona ukuzwisisa; abantu balalelisisa+ njengombana kufundwa incwadi yomThetho. 4 U-Ezra umkopululi* bekajame endaweni yesikhulumi ephezudlwana eyenziwe ngeengodo, eyenzelwe isenzakalweso; eqadi kwakhe ngesidleni bekujame uMatitiya, uTjhema, u-Anaya, u-Uriya, uRhilikhiya noMaseya; ngesinceleni sakhe bekunoPedaya, uMitjhayeli, uMalikiya,+ uRhatjhumu, uRhatjhibhadana, uZakariya noMetjhulamu.
5 U-Ezra wavula incwadi abonwa ngibo boke abantu, ngombana bekajame endaweni ephezulu kunabo boke. Njengombana ayivula, boke abantu basikima. 6 Yeke u-Ezra wadumisa uJehova uZimu weqiniso, uZimu omKhulu, nabamzwako abantu bathi, “Amen!* Amen!”+ Baphakamisa nezandla. Ngemva kwalokho baguqa phambi kwakaJehova bahloma iinhloko phasi. 7 UJetjhuwa, uBhani, uTjherebiya,+ uJamini, u-Akhubu, uTjhabetayi, uHodiya, uMaseya, uKhelitha, u-Azariya, uJozabadi,+ uRhanani noPelaya ebebamaLevi, bahlathululela abantu umThetho,+ abantu baraga njalo bajamile. 8 Baraga nokufunda ngokuzwakalako incwadi yomThetho kaZimu weqiniso, bawuhlathulula ngokukhanyako, baveza nokuthi lokho abakufundako kutjho ukuthini; yeke basiza abantu bona bazwisise lokho ebekufundwa.+
9 UNerhemiya obekambusi ngesikhatheso, u-Ezra+ umphristi begodu omkopululi,* namaLevi ebewafundisa abantu bathi kibo boke abantu: “Ilangeli licwengile kuJehova uZimenu.+ Ningatlhuwi namkha nilile.” Batjho lokho ngombana boke abantu bebalila nabezwa amezwi womThetho. 10 Wathi kibo: “Khambani nidle ukudla okumnandi, nisele izinto ezisudu, nabelane ukudla+ nalabo abanganakho; ngombana ilangeli licwengile eKosinethu, ningadani, ngombana ithabo elivela kuJehova lisiphephelo senu.”* 11 AmaLevi bewathulisa boke abantu, athi: “Ningalili! Ngombana ilangeli licwengile begodu ningadani.” 12 Nje-ke boke abantu bakhamba bayokudla, basela, babelana ukudla, bathaba khulu,+ ngombana bawazwisisa amezwi abahlathululelwe wona.+
13 Ngelanga lesibili, iinhloko zemindeni zabo boke abantu, abaphristi namaLevi zabungelela u-Ezra umkopululi* bona zifumane ilwazi elingeneleleko lamezwi womThetho. 14 Bafumana ukuthi emThethweni kutlolwe bona uJehova wakhupha umyalo ngoMosi, wokuthi ama-Israyeli kufuze ahlale emitlhatlhaneni ngesikhathi somnyanya ngenyanga yekhomba,+ 15 nokuthi kufuze benze isaziso bamemezele+ emadorobhenawo woke neJerusalema yoke, bathi: “Iyani eentabeni nize neempande ezinamakari zemithi yama-oliva, yamaphehlo, yemiritlili* neyesundu neempande ezinamakari zeminye imithi nizokwenza imitlhatlhana ngokuvumelana nalokho okutloliweko.”
16 Nje-ke abantu baphuma beza nazo, bona bazozenzela imitlhatlhana omunye nomunye ephahleni lakhe, esirhodlweni sakhe, esirhodlweni sendlu kaZimu weqiniso,+ etatawini leSango laManzi+ netatawini leSango lakwa-Efrayimu.+ 17 Nje-ke loke ibandla lababuya ekuthunjweni lenza imitlhatlhana lahlala kiyo; ama-Israyeli agcina ukwenza ngalendlela emihleni kaJotjhuwa+ indodana kaNuni, ngalokho kwaba nethabo elikhulu khulu.+ 18 Ilanga nelanga bekufundwa incwadi yomThetho kaZimu weqiniso,+ kusukela ngelanga lokuthoma bekwaba lilanga lokugcina. Baba nomnyanya amalanga alikhomba, kwathi ngelanga lobunane baba nomhlangano okhethekileko njengombana kutjho umThetho.+