Hezekiyeli
13 Ilizwi lakaJehova lafika kimi godu, lathi: 2 “Ndodana yomuntu, phorofida ngokujamelene nabaphorofidi bakwa-Israyeli+ begodu uthi kilabo abazithomela iimphorofido zabo,+ ‘Lalelani ilizwi lakaJehova. 3 Nakhu iKosi ePhakemeko uJehova ekutjhoko: “Maye! Ebaphorofidini abaziindlhadlha, abalandela iinhliziyo zabo, lokha nabangakaboni litho!+ 4 Maye! Israyeli abaphorofidi bakho babe njengeempungutjha hlangana namarubhi. 5 Angekhe niye eendaweni eziphukileko emabodeni wamatje bona niwavuselelele indlu ka-Israyeli,+ ukuthi u-Israyeli aragele phambili ajamile epini ngelanga lakaJehova.”+ 6 “Babone imibono yamala begodu babikezela amala, labo abathi, ‘Leli lilizwi lakaJehova,’ kukulapho uJehova angakhenge abathumele begodu balindele bona ilizwi labo lizaliseke.+ 7 Kghani akusimbono omamala eniwubonileko, namala eniwabikezeleko nanithi, ‘Ilizwi lakaJehova lithi,’ lokha ngingakatjho litho?”’
8 “‘Nje-ke nakhu iKosi ePhakemeko uJehova ekutjhoko: “‘Ngombana nikhulume amala begodu imibonwenu imamala, ngijamelene nani,’ kutjho iKosi ePhakemeko uJehova.”+ 9 Isandla sami sijamelene nabaphorofidi, imibonwabo emamala begodu babikezela amala.+ Angekhe babe hlangana nabantu engibathembako; angekhe batloliswe encwadini yakwa-Israyeli; angekhe babuyele enarheni yakwa-Israyeli begodu kuzokufuze nazi ukuthi ngiyiKosi ePhakemeko uJehova.+ 10 Koke lokhu kwenzeke ngebanga lokuthi badurhise abantu bami nabathi, “Kunokuthula!” Kukulapho kunganakuthula.+ Lokha nakwakhiwa iboda elingakaqini lokuhlukanisa, balipenda ngepende emhlophe.’*+
11 “Tjela labo abapenda iboda ngepende emhlophe ukuthi lizokuwa. Kuzokuza izulu elina ngamandla, isinanja nesiwuruwuru esikhulu sizoligiriza.+ 12 Iboda naliwako bazokuthi, ‘Kusize ngani ukulipenda kwenu’?+
13 Nakhu iKosi ePhakemeko uJehova ekutjhoko: ‘Ngizokubangela isiwuruwuru esinamandla ngebanga lelaka lami, izulu elina ngamandla ngebanga lokusilingeka kwami nesinanja ngelaka elitjhabalalisako. 14 Ngizokugiriza iboda enilipende ngepende emhlophe begodu lizokuwa nesisekelo salo sizokubonakala. Lokha idorobho naliwako nizokutjhatjalaliswa kilo; kuzokufuze nazi ukuthi nginguJehova.’
15 “Lokha nangikhupha ilaka lami ngokupheleleko phezu kweboda naphezu kwalabo abalipende ngepende emhlophe, ngizokuthi kini: “Iboda alisekho nalabo abalipendileko abasekho.+ 16 Abaphorofidi bakwa-Israyeli abasekho, labo abaphorofide ngeJerusalema nababone imibono yokuthula kilo, kukulapho kunganakuthula,”’+ kutjho iKosi ePhakemeko uJehova.
17 “Nakunguwe ndodana yomuntu, qala amadodakazi wekhenu azithomele iimphorofido zawo, begodu uphorofide ngokujamelene nawo. 18 Uthi kiwo, nakhu iKosi ePhakemeko uJehova ekutjhoko: “Maye! Ebafazini abathunge iinthukulo zayo yoke imikhono* nabenza amatjhila athwalwa ehloko weenlinganiso zoke bona azume ukuphila kwabantu! Inga-kghani nizuma ukuphila kwabantu bami begodu nilinga ukusindisa ukuphila kwenu? 19 Kghani nizongisilaphaza hlangana nabantu bami ngebanga lebhali elincani nangebanga leensalela zoburotho,+ ngokubulala labo ekufuze bangafi nangokulisa labo ekufuze bangaphili baphila, nenza njalo ngokukhuluma amala ebantwini bami, abalalela amalenu?”’+
20 Nakhu iKosi ePhakemeko uJehova ekutjhoko: ‘Qalani ngijamelene neenthukulo zenu, Maye! Nina bafazi, enizisebenzisela ukuthiya abantu ngasuthi nithiya iinyoni begodu ngizozirathula emikhonwenenu ngitjhaphulule labo enibazuma njeengenyoni. 21 Ngizokurathula namatjhilenu wokugubuzesa ubuso, ngisindise nabantu bami ezandleni zenu, angekhe basaba yinto eniyibambako nanizumako; kuzokufuze nazi ukuthi nginguJehova.+ 22 Ngombana niqede olungileko amandla ngamalenu+ lokha nanimbangela ukugandeleleka, nizwise umuntu olungileko ubuhlungu lokha mina ngingafuni ezwe ubuhlungu begodu niqinise izandla zokhohlakeleko,+ bona angaphenduki endlelenakhe embi begodu ahlale aphila.+ 23 Nje-ke, nina bafazi angekhe nisabona imibono emamala nezenzo zokuthukula;+ ngizokusindisa abantu bami ezandleni zenu, kuzokufuze nazi ukuthi nginguJehova.’”