Hezekiyeli

38 Ilizwi lakaJehova lafika kimi godu, lathi: 2 “Ndodana yomuntu, qalisa ubuso bakho ngokujamelene noGogi enarheni yakwaMagogi,+ ikosana eyihloko yeMetjheki neTubali,+ uphorofide ngokujamelene nayo.+ 3 Uthi, ‘Nakhu iKosi ePhakemeko uJehova ekutjhoko: “Qala ngijamelene nawe, maye! Gogi kosana eyihloko yeMetjheki neTubali. 4 Ngizokuphendula ngifake amawugu emihlathinakho+ ngikukhuphe nawo woke amabuthwakho,+ iinjomani nabakhweli beenjomani boke bambethe izambatho eziphazimulako, ibandla elikhulu liphethe iimviko ezikulu nezincani* nabo boke abaphatha iinsabula; 5 IPheresiya, iTopiya nePhuthi+ banabo, boke banesiviko esincani nesikoporo; 6 IGomere nawo woke amasotjayo, indlu yeTogarima+ evela eengcenyeni ezikude zetlhagwini kuhlanganise nawo woke amasotjayo nesitjhaba esinengi esinabo.+

7 “‘“Zilungiseleleni ukusahlela, zilungiseleleni ipi nina nawo woke amabuthwenu ahlangene nani begodu nizokuba balawuli babo.

8 “‘“Nizokutjhejwa ngemva kwamalanga amanengi. Emihleni yokuphela yeminyaka, nizokusahlela inarha abantu bakhona ababuyiswa ekulinyazweni yisabula, babuthelelwe ndawonye eentjhabeni ezinengi eentabeni zakwa-Israyeli ezatjhatjalaliswa kade. Izakhamuzi zenarha le zabuyiswa esitjhabeni begodu zoke zizokuhlala ngokuvikeleka.+ 9 Uzokuza njengesiwuruwuru, uzokugubuzesa inarha njengamafu, wena nawo woke amasotjakho nesitjhaba esinengi esinawe.”’

10 “Nakhu iKosi ePhakemeko uJehova ekutjhoko: ‘Ngelangelo imicabango izokungena ehliziywenakho begodu uzokuluka amano akhohlakeleko. 11 Uzokuthi: “Ngizokusahlela inarha neendawo ezingakavikeleki.+ Ngizokuza ngokujamelene nalabo abahlala ngokuvikeleka, ngaphandle kokuthikaziswa, nabo boke abahlala eendaweni ezingakavikelwa maboda, ziinsimbi namkha amasango.” 12 Umnqophwayo uzokuba kuthatha izinto ezinengi begodu idlelezele, isahlele iindawo ezitjhatjalalisiweko esele zinezakhamuzi+ nabantu ababuthelelweko eentjhabeni,+ ababuthelela umnotho nepahla,+ labo abahlala ekabeni yephasi.

13 “‘ITjheba+ neDedani+ nabathengisi beTaratjhitjhi+ nazo zoke iingorho zayo zizokuthi kuwe: “Inga-kghani usahlela bona ufumane izinto ezinengi begodu udlelezele? Kghani uhlanganise amabuthwakho bona athathe isiliva negolide, athathe umnotho nepahla, athathe izinto ezinengi khulu?”’

14 “Nje-ke phorofida ndodana yomuntu, uthi kuGogi, ‘Nakhu iKosi ePhakemeko uJehova ekutjhoko: “Kghani angekhe wazi na, lokha abantu bami u-Israyeli nabahlala ngokuvikeleka?+ 15 Uzokuza uvela endawenakho, eengcenyeni ezikude zetlhagwini,+ wena unesitjhaba sakho esinengi, soke sikhwele iinjomani, ihlangano ekulu, ibutho elinengi.+ 16 Njengamafu agubuzese inarha, uzokuza ngokujamelene nabantu bami, u-Israyeli. Emihleni yokuphela, ngizokuletha bona ujamelane nenarhami+ ukuthi iintjhaba zazi mina, nangizicwengisako ngawe phambi kwamehlwazo, maye! Gogi.”’+

17 “Nakhu iKosi ePhakemeko uJehova ekutjhoko: ‘Kghani akusinguwe engakhuluma ngaye emalangeni wakade ngeenceku zami abaphorofidi bakwa-Israyeli zaphorofida eminyakeni eminengi bona wena uzokulethwa ngokujamelene nama-Israyeli?’

18 “‘Ngelangelo, ngelanga uGogi asahlela inarha yakwa-Israyeli,’ kutjho iKosi ePhakemeko uJehova, ‘ilaka lami lizokuvutha.+ 19 Ngobukhali bami, ngomlilo welaka lami ngizokukhuluma; ngelangelo kuzokuba nokusikinyeka okukhulu kwephasi enarheni yakwa-Israyeli. 20 Ngebanga lami, iimfesi zelwandle, iinyoni zomkayi, iimbandana, zoke iinlwana ezirhurhuba phasi, boke abantu bephasini bazokuhlengezela neentaba zizokuwa,+ amawa azokuwa nawo woke amaboda azokugirikela phasi.’

21 “Ngizokubiza isabula ngokujamelene naye kizo zoke iintaba zami,’ kutjho iKosi ePhakemeko uJehova. ‘Isabula yawo woke umuntu izokujamelana nomfowabo.+ 22 Ngizokuletha isahlulelo ngokujamelene naye ngokugula,+ ngokuphalaka kweengazi; ngizokunisa izulu elikhulu, isinanja,+ umlilo+ nangesibabuli+ kuye nemasotjenakhe nesitjhabeni esinengi esinaye.+ 23 Nakanjani ngizozikhulisa, ngizicwengise, ngizenze ngaziwe phambi kwamehlo weentjhaba, kuzokufuze zazi ukuthi nginguJehova.’