AbaHlulelii
14 USamsoni wehlela eTimna begodu wabona intombi emFilista.* 2 Ngalokho wakhuphuka, watjela uyise nonina wathi: “Ngiphandlwe yintombi emFilista eTimna begodu ngifuna ungithathele yona ibe mkami.” 3 Kodwana uyise nonina bathi kuye: “Angeze wakghona na ukufumana umfazi hlangana neenhlobo zakho nakibo boke abantu bekhethu?+ Kghani kufuze ukhambe uyokuthatha umfazi hlangana namaFilista angakasoki?” Kodwana uSamsoni wathi kuyise: “Ngithathela yena, ngombana nguye ongilungeleko.” 4 Uyise nonina akhenge balemuke bona lokhu bekuvela kuJehova, ngombana uZimu bekafuna ithuba lokulwa namaFilista, njengombana amaFilista bewabusa u-Israyeli ngesikhatheso.+
5 Yeke uSamsoni, uyise nonina behlela eTimna. Kwathi nakafika esimini yamadiribe yeTimna, ibhubezi* leza kuye libhodla. 6 Ummoya kaJehova wehlela phezu kwakhe,+ walihlukanisa phakathi njengalokha othileko ahlukanisa imbuzana phakathi ngezandla zakhe. Kodwana akhenge atjele uyise nonina bona wenzeni. 7 Ngemva kwalokho, uSamsoni wehla wayokukhuluma nentombi leya bese wafumana ukuthi usathathekile ngayo.+
8 Ngemva kwesikhathi nakabuyela bona ayoyithatha aye nayo ekhaya,+ waphambuka ayokuqala ibhubezi elifilekwela, bekuneenyosi neliju ngaphakathi kwebhubezelo. 9 Wathatha iliju ngezandla zakhe wakhamba alidla. Kwathi nakafika kuyise nonina, wabapha bona balidle. Kodwana akhenge abatjele bona ilijwelo ulithethe ngaphakathi kwebhubezi elifileko.
10 Uyise noSamsoni behlela entombini leyo begodu uSamsoni wenza umnyanya lapho, ngombana ngilokho amasokana ebekajayele ukukwenza. 11 Kuthe nabambonako, bamlethela abaphekeleli bamadoda abama-30 bona bamphekelele. 12 USamsoni wathi kibo: “Ngibawa ukunenzela isirarejo. Nange nikghona ukusirarulula emalangeni alikhomba womnyanya bese niyangiphendula, ngizoninikela izambatho zelineni zangaphasi ezima-30 nezambatho ezima-30. 13 Kodwana nange ningakghoni ukungiphendula, kufuze nina ninginikele izambatho zelineni zangaphasi ezima-30 nezambatho ezima-30.” Bathi kuye: “Sitjela isirarejo; sifuna ukusizwa.” 14 Wathi kibo:
“Kodlako kuphume into edliwako,
Konamandla kuphume into emnandi.”+
Kodwana akhenge zikghone ukurarulula isirarejo bekwadlula amalanga amathathu. 15 Ngelanga lesine, bathi kumkaSamsoni: “Khohlisa indodakho+ bona isitjele ipendulo yesirarejo. Nakungasinjalo, sizokutjhisa wena nomndeni kayihlo ngomlilo. Kghani nisimemele la bona nizokuthatha izinto zethu?” 16 Ngalokho umkaSamsoni wamlilela wathi kiyo: “Ungihloyile; awungithandi.+ Utjele abantu bekhethu isirarejo, kodwana awukangitjeli ipendulo yaso.” Kilokho uSamsoni wathi: “Afe-ke, ngitjho nobaba nomma angikabatjeli! Alo, kubayini kufuze ngitjele wena?” 17 Kodwana wasolo amlilela amalanga alikhomba woke womnyanya. Ekugcineni wamtjela ngelanga lekhomba, ngombana bekasolo amgandelela. Yeke watjela abantu bekhabo ipendulo yesirarejo.+ 18 Ngelanga lekhomba ngaphambi kobana ilanga litjhinge,* amadoda wedorobhenelo athi kuye:
“Khuyini emnandi ukudlula iliju,
Begodu khuyini enamandla ukudlula ibhubezi?”+
Wawaphendula wathi:
“Ngathana anikalimi ngethole lami,+
Bengeze nisirarulule isirarejo sami.”
19 Ngemva kwalokho, ummoya kaJehova wehlela kuye+ begodu waya e-Atjhikheloni,*+ wabulala amadoda ama-30 wathatha izambatho zawo wazinikela abaphendule isirarejo.+ Bekathukuthele khulu njengombana akhuphukela endlini kayise.
20 UmkaSamsoni+ wanikelwa komunye wabaphekeleli ebebaphekelele uSamsoni.+