Joromiya

29 Naka amezwi wencwadi kaJoromiya umphorofidi ayithumela aseJerusalema kibo boke abadala abahlangana nabantu abasekudingisweni, ebaphristini, ebaphorofidini nakibo boke abantu uNebukadinetsari abathatha eJerusalema wabadingisela eBhabhiloni, 2 ngemva kobana iKosi uJokoniya,+ unina leKosi,+ iinkhulu zesigodlo, amakhosana wakwaJuda neweJerusalema, iinsebenzi zobukghwari neensebenzi zesimbi* sele zikhambile eJerusalema.+ 3 Wathumela incwadi ngesandla saka-Elasa indodana kaTjhafani+ noGemariya indodana kaRhilikhiya, labo uTsedekhiya+ iKosi yakwaJuda eyabathumela eBhabhiloni, eKosini yeBhabhiloni uNebukadinetsari. Ithi:

4 “Ngilokhu uJehova wamabutho uZimu ka-Israyeli akutjhoko kibo boke abantu abasekudingisweni, engabasa ekudingisweni basuka eJerusalema baya eBhabhiloni, 5 ‘Yakhani izindlu nihlale kizo. Tjalani amasimu nidle iinthelo zawo. 6 Thathani abafazi nibe namadodana namadodakazi; nithathele amadodanenu abafazi, nitjhadise namadodakazenu. Bona nawo abe namadodana namadodakazi nibe banengi lapho, ningaphunguki. 7 Funani ukuthula kwedorobho enginidingisele kilo, nilithandazele kuJehova ngombana nalinokuthula nani nizokuba nokuthula.+ 8 Ngilokhu uJehova wamabutho, uZimu ka-Israyeli akutjhoko: “Ningavumeli abaphorofidi benu nabathukuli benu abahlangana nani banikhohlise,+ ningalaleli amabhudango abawabhudangako. 9 Ngombana baphorofida amala egameni lami. Akhenge ngibathume kini,’+ kutjho uJehova.”’”

10 “Ngombana ngilokhu uJehova akutjhoko, ‘Nasele kuzaliseke iminyaka ema-70 eBhabhiloni, ngizonitjheja+ begodu ngizokwenza enginithembise khona ngokunibuyisela endaweni le.’+

11 “‘Ngombana ngiyazi kuhle imicabango enginayo ngani,’ kutjho uJehova, ‘micabango yokuthula, ingasi yehlekelele,+ bona ngininikele ingomuso nethemba.+ 12 Nizongibiza, nize kimi nithandaze kimi begodu ngizonilalela.’+

13 “‘Nizongifuna begodu nizongithola+ ngombana nizongifuna ngeenhliziyo zenu zoke.+ 14 Ngizozenza ngifumaneke,’+ kutjho uJehova. ‘Begodu ngizokubuthelela abathunjiweko benu nginihlanganise ndawonye, nginikhuphe kizo zoke iintjhaba neendawo ebenirhatjhekele kizo,’+ kutjho uJehova. ‘Ngizonikhupha endaweni ebengibangele bona nidingiselwe kiyo.’+

15 “Kodwana nina nithe, ‘UJehova usilethele abaphorifidi eBhabhiloni.’

16 “Ngilokhu uJehova akutjhoko ekosini ehlezi esihlalweni sobukhosi sakaDavida+ nakibo boke abantu abahlala edorobheneli, abafowenu abangakhenge bakhambe nani ekudingisweni, 17 Ngilokho uJehova wamabutho akutjhoko: “Ngithumela isabula, indlala nesibetho,*+ ngokujamelene nabo begodu ngizobenza babe njengamafeyi abolileko angekhe adliwa.”’+

18 “‘Ngizobagijimisa ngesabula,+ ngendlala nangesibetho,* ngizobenza into ethusako kiyo yoke imibuso yephasi,+ ngibaqalekise begodu ngibenze into yokumangalelwa, into ebetjhelwa umlozi,+ into ehlazisako kizo zoke iintjhaba engibarhatjhele kizo+ 19 ngombana akhenge balalele amezwami engiwathumele ngeenceku zami abaphorofidi,’ kutjho uJehova, ‘ngibathumele kanengi.’+

“‘Kodwana akhenge balalele,’+ kutjho uJehova.

20 “Nje-ke, lalelani ilizwi lakaJehova, noke nina bantu ebebadingisiwe, enginisuse eJerusalema nganisa eBhabhiloni. 21 Nakhu uJehova wamabutho, uZimu ka-Israyeli akutjhoko malungana no-Arhabi indodana kaKholaya namalungana noTsedekhiya indodana kaMaseya abaphorofida amala kini ngegama lami,+ ‘Nje-ke ngibanikela esandleni seKosi yeBhabhiloni uNebukadinetsari* begodu uzobabulalela phambi kwamehlwenu. 22 Okwenzeke kibo kuzokuba siqalekiso boke abadingisiweko bakwaJuda abaseBhabhiloni abakhuluma ngaso bathi: “Kwanga uJehova angenza kuwe ngendlela enze ngayo kuTsedekhiya no-Arhabi labo ikosi yeBhabhiloni eyabatjhisa emlilweni!” 23 Ngombana baziphathe ngokuhlazisako kwa-Israyeli,+ bafebe nabafazi babomakhelwana babo begodu bakhuluma amezwi amamala egameni lami engingakhenge ngibayale ngawo.+

“‘“Ngimi owaziko begodu ngingufakazi,”+ kutjho uJehova.’”

24 “Kufuze uthi kuTjhemaya+ weNerhelamu, 25 ‘Nakhu uJehova wamabutho, uZimu ka-Israyeli akutjhoko: “Ngombana uthumele iincwadi ngegama lakho kibo boke abantu abaseJerusalema, kuZefaniya+ indodana kaMaseya, umphristi, nakibo boke abaphristi wathi, 26 ‘UJehova ukwenze umphristi esikhundleni sakaJehoyada umphristi bona ube mtlhogomeli wendlu kaJehova, ulawule nanyana ngubani ohlanyako ozenza umphorofidi, umfake esitokisini;+ 27 kubayini-ke ungakhenge ukhalime uJoromiya we-Anatothi,+ oziphatha njengomphorofidi kuwe?+ 28 Ngombana usithumele nencwadi siseBhabhiloni wathi: “Nizokuhlala isikhathi eside! Yakhani izindlu, nihlale kizo. Tjalani amasimu, nidle iinthelo zawo . . .”’”’”+

29 Lokha uZefaniya+ umphristi nakafunda incwadi le phambi kwakaJoromiya umphorofidi, 30 ilizwi lakaJehova lafika kuJoromiya lathi: 31 “Thumela kibo boke abantu abadingisiweko uthi, ‘Nakhu uJehova akutjhoko malungana noTjhemaya weNerhelamu uthi: “Ngombana uTjhemaya uphorofide kini ngitjho nanyana ngingakamthumeli, walinga nokunenza nithembele amala,+ 32 nje-ke nakhu uJehova akutjhoko, ‘Qalani ngijezisa uTjhemaya weNerhelamu neenzukulwana zakhe. Akakho namunye wabantwaba ozokusinda, begodu angekhe akubone okuhle engikwenzele abantu bami,’ kutjho uJehova, ‘ngombana ukhuthaze ukuhlubuka kuJehova.’”’”