Hezekiyeli

34 Ilizwi lakaJehova lafika kimi godu, lathi: 2 “Ndodana yomuntu, phorofida ngokujamelene nabelusi bakwa-Israyeli. Phorofida uthi ebelusini, ‘Nakhu iKosi ePhakemeko uJehova ekutjhoko: “Maye! Kubelusi bakwa-Israyeli,+ ebebazondla bona! Kghani akusimhlambi okufuze abelusi bawondle?+ 3 Nidla amafutha, nizimbathise ngewulu, nihlabe isilwana esinonileko+ begodu aniwondli umhlambi.+ 4 Akhenge niqinise ezibuthakathaka, nilaphe ezigulako, nibophe amanceba wezilimeleko, nibuyise eziphambukileko endleleni,+ nifune ezilahlekileko kunalokho niziphathe kabuhlungu nazenza iingqila.+ 5 Yeke zarhatjheka ngebanga lokobana bezinganamelusi;+ zarhatjheka begodu zaba kukudla kwazo zoke iimbandana. 6 Izimvu zami beziphambukela kizo zoke iintaba nakiyo yoke imibundu ephakemeko; izimvu zami bezirhatjhekele kilo loke iphasi, kunganamuntu ozizumako namkha ozifunako.

7 “‘“Nje-ke, nina belusi yizwani ilizwi lakaJehova: 8 ‘“Nangisaphilako,” kutjho iKosi ePhakemeko uJehova, “ngebanga lokuthi izimvu zami zibe ziinyamazana, ukudla kwazo zoke iimbandana, ngombana bezinganamelusi begodu abelusi bami akhenge bazifune izimvu zami, kunalokho bebasolo bazondla bona, akhenge bondle izimvu zami,”’ 9 nje-ke nina belusi, yizwani ilizwi lakaJehova. 10 Nakhu iKosi ePhakemeko uJehova ekutjhoko: ‘Ngijamelene nabelusi, ngizobenza baphendule ngebanga lezimvu zami,* ngizobasusa angekhe basondla izimvu zami+ begodu angekhe basazondla bona. Ngizokusindisa izimvu zami emlonyenabo, angekhe zisaba kukudla kibo.’”

11 “‘Ngombana ngilokhu iKosi ePhakemeko uJehova ekutjhoko: “Qala, mina ngokwami ngizozifuna izimvu zami bese ngizozitlhogomela.+ 12 Ngizokutlhogomela izimvu zami njengomelusi ofumene izimvu zakhe zirhatjhekile begodu azondle.+ Ngizozisindisa kizo zoke iindawo ebezirhatjhekele kizo ngelanga lamafu nobumnyama obukhulu.+ 13 Ngizobakhupha esitjhabeni, ngibabuthelele ndawonye eenarheni ngibalethe enarhenabo, ngibondle eentabeni zakwa-Israyeli,+ eduze nomlanjana nakizo zoke iindawo abahlala kizo enarheni. 14 Ngizozenza zidlele emadlelweni amahle, inarha ezizokudla kiyo izokuba kwa-Israyeli eentabeni eziphezulu.+ Zizokulala lapho phasi, enarheni enamadlelo amahle+ begodu zizokudla emadlelweni aphuma phambili eentabeni zakwa-Israyeli.”

15 “‘“Mina ngokwami ngizokondla izimvu zami,+ mina ngokwami ngizozenza zilale phasi,”+ kutjho iKosi ePhakemeko uJehova. 16 Elahlekileko ngizoyizuma,+ ephambukileko ngizoyibuyisa endleleni, elimeleko ngizoyibopha amanceba, ebuthakathaka ngizoyiqinisa; kodwana enonileko neqinileko ngizoyitjhabalalisa. Ngizoyondla ngesahlulelo.”

17 “‘Nakungini zimvu zami, nakhu iKosi ePhakemeko uJehova ekutjhoko: “Ngizokwahlulela imvu nemvu, ngahlulele hlangana namaramu neempongo.+ 18 Kghani akukaneli ngani bona nidle emadlelweni amahle? Kghani kufuze nigadange woke amadlelwenu ngeenyawo zenu? Ngemva kobana nisele amanzi ahlanzekileko, kghani kufuze niwasilaphaze ngokufaka iinyawo zenu kizo? 19 Kghani izimvu zami kufuze zidle emadlelweni eniwagadange ngeenyawo zenu begodu zisele amanzi eniwasilaphaze ngokufaka iinyawo zenu kiwo?”

20 “‘Nakhu iKosi ePhakemeko uJehova ekutjhoko: “Qala, mina ngokwami ngizokwahlulela hlangana nemvu enonileko neyondileko, 21 ngombana ngehlangothi nangehlombe lenu benisolo nisunduza, ngeempondo zenu boke abagulako bekwaba kulapho nibarhatjhela kude. 22 Ngizokusindisa izimvu zami, angekhe zisaba ziinyamazana,+ ngizokwahlulela phakathi kwemvu nemvu. 23 Ngizokubeka umelusi phezu kwabo,+ incekwami uDavida,+ yena ngokwakhe uzobondla abe ngumelusabo.+ 24 Mina Jehova ngizokuba nguZimabo,+ incekwami uDavida izokuba mdosiphambilabo.+ Mina Jehova ngikhulumile.

25 “‘“Ngizokwenza isivumelwano sokuthula nabo,+ ngizokuqotha enarheni iimbandana eziyingozi+ bona bahlale ngokuvikeleka emmangweni, balale nemahlathini.+ 26 Ngizokwenza ukuthi bona nendawo ebhode umbundwami ibe sibusiso,+ ngizokubangela izulu line ngesikhathi esifaneleko. Iimbusiso zizokuna njengezulu.+ 27 Imithi yesimu izokuveza iinthelo zayo nehlabathi izokuveza umkhiqizwayo,+ bazokuhlala ngokuvikeleka enarheni begodu kuzokufuze bazi ukuthi nginguJehova nangiphula iinsimbi zabo zejogi,+ ngibasindise kilabo ababagqilazako. 28 Angekhe basaba ziinyamazana zeenarha, iimbandana zephasi angekhe zisabarhiribidela, bazokuhlala ngokuvikeleka kungabi nomuntu obathusako.+

29 “‘“Ngizobenzela isitjalo sedumo, angekhe basabulawa yindlala enarheni+ begodu angekhe basahlaziswa ziintjhaba.+ 30 ‘Nje-ke kuzokufuze bazi ukuthi mina Jehova uZimabo nginabo nokuthi bona, indlu yakwa-Israyeli bababantu bami,’+ kutjho iKosi ePhakemeko uJehova.”’

31 “‘Nakungini zimvu zami,+ izimvu engizitlhogomelako, nibabantu kwaphela begodu mina nginguZimenu,’ kutjho iKosi ePhakemeko uJehova.”