Hezekiyeli
1 Ngomnyaka wama-30, ngelanga lesihlanu lenyanga yesine, ngesikhathi ngihlala phakathi kwabantu abadingisiweko+ emlanjeni weKebari,+ izulu lavuleka bese ngathoma ukubona imibono kaZimu. 2 Ngelanga lesihlanu lenyanga okumnyaka wesihlanu, wokudingiswa kweKosi uJehoyakini,+ 3 ilizwi lakaJehova lafika kuHezekiyeli,* indodana kaBhuzi umphristi, ngemlanjeni iKebari enarheni yamaKhaledi.*+ Endaweni leyo* amandla kaJehova ehlela kuye.+
4 Njengombana ngiqalile, ngabona isiwuruwuru+ sivela etlhagwini, bekunelifu elikhulu nomlilo* obenyezelako+ ubhodwe mkhanyo omkhulu, emlilweni loyo bekunento ephazima njengegolide elivangwe nesiliva.+ 5 Phakathi kwayo, bekunokuthileko okunjengeembunjwa ezine eziphilako,+ ngayinye yazo beyiqaleka njengomuntu. 6 Ngayinye yazo beyinobuso obune namaphiko amane.+ 7 Iinyawo zazo bezijame rwe, iinthende zeenyawo zazo bezifana nezekonyana, beziphazima njengekhopha emanyazelako.+ 8 Bezinezandla zomuntu ngaphasi kwamaphikwazo kiwo woke amahlangothi amane, zoke iimbunjwa ezinezi bezinobuso namaphiko. 9 Amaphikwazo bekathintana. Bezingajiki nazikhambako; zoke bezikhamba zinqophe phambili.+
10 Nasi indlela ubuso bazo ebebuqaleka ngayo: Ngayinye kwezinezo beyinobuso bomuntu obunobuso bebhubezi+ ngesidleni nobuso bekunzi+ ngesinceleni begodu zozine njalo bezinobuso+ bekhozi.+ 11 Bebunjalo-ke ubuso bazo. Amaphikwazo bekavulekele phezu kwazo. Ngayinye beyinamaphiko amabili athintanako begodu amaphiko amabili bewaphuthela imizimbazo.+
12 Zoke bezikhamba zinqophe phambili, ziya nanyana kukuphi lapho ummoya uzinqophisela khona.+ Bezingajiki njengombana zikhamba. 13 Iimbunjwa eziphilako bezibonakala ngasuthi malahle avuthako begodu okuthileko okufana neembani okukhanya njengomlilo bekutjhinga phasi phezulu hlangana neembunjwa eziphilako, nomkhanyo bewubenyezela uphuma emlilweni.+ 14 Iimbunjwa eziphilako nazikhambako nalokha nazibuyako, indlela ebezikhamba ngayo beyiqaleka njengokuphazima kombani.
15 Njengombana bengiqale iimbunjwa eziphilako, ngabona ivili linye ephasini hlanu kweembunjwa eziphilako ezinobuso obune.+ 16 Amavili nokubumbeka kwawo bekuqaleka njengokuphazima kwekhrisolithe, womane njalo bekafana. Ukuqaleka kwawo nokwakheka kwawo bekubonakala ngasuthi livili ngaphakathi kwelinye ivili. 17 Nakakhambako, bekangaya kinanyana ngimaphi amahlangothi amane ngaphandle kokujika njengombana akhamba. 18 Amarimu wakhona bewaphakeme khulu ngendlela ebabazekako, amarimu woke womane bekazele ngamehlo kiyo yoke indawo.+ 19 Nanyana kunini iimbunjwa eziphilako nazikhambako, amavili nawo bekakhamba nazo, lokha iimbunjwa eziphilako naziphakamako ephasini, namavili bekaphakama.+ 20 Beziya nanyana kukuphi lapho ummoya ozithumela khona, nanyana kukuphi lapho ummoya uya khona. Amavili bewaphakama kunye nazo, ngombana ummoya ebewusembunjweni eziphilako bewuba semavilini. 21 Nazikhambako, nawo bekakhamba; nazijamako nawo bekajama, naziphakanyiswako ephasini, amavili nawo bewaphakama kunye nazo ngombana ummoya ebewuseembunjweni eziphilako bewubuye ube semavilini.
22 Phezu kweenhloko zeembunjwa eziphilako, bekunokuthileko okunjengomkayi okubenyezela njengerhwaba eliyikarisomraro, linabe phezu kweenhloko zazo.+ 23 Ngaphasi komkayi, amaphikwazo bewajame rwe,* elinye lithinte elinye. Ngasinye sazo besinamaphiko amabili agubuzese elinye ihlangothi lemizimbaso begodu amabili agubuseze elinye ihlangothi. 24 Nangizwa itjhada lamaphikwazo, belizwakala njengetjhada lamanzi agijimako njengetjhada loMninimandla Woke.+ Nazikhambako, bekuzwakala ngasuthi litjhada lebutho. Nazijamako, bezehlisa amaphikwazo.
25 Bekunelizwi phezu komkayi, phezu kweenhloko zazo. (Nazijamako, bezehlisa amaphikwazo.) 26 Ngaphezu komkayi, phezu kweenhloko zazo bekunokuthileko okunjengelitje lesafire,+ bekufana nesihlalo sobukhosi.+ Obekahlezi esihlalweni sobukhosi phezulu bekungothileko oqaleka njengomuntu.+ 27 Ngibone okuthileko okuphazima njengegolide elivangwe nesiliva,+ ebekunjengomlilo ovela entweni ethileko eqaleka njengedini lakhe ukutjhinga phezulu; ukusuka edinini lakhe ukuya phasi, ngabona okuthileko okunjengomlilo.+ Bekunokubenyezela okumzombileko 28 njengezungu lekosi+ emafini nakuna izulu. Leyo yindlela umkhanyo obenyezelako ebewumbhodileko ebewuqaleka ngayo. Bewuqaleka njengephazimulo kaJehova.+ Nangilibonako, ngaguqa, ngakhothamisela ihloko phasi begodu ngathoma ukuzwa ilizwi lomuntu okhulumako.